ខេត្តព្រះវិហារ ៖ ច្រកអានសេះ ដែលជាច្រកព្រំដែនកម្ពុជា-ថៃ លើកំពូលភ្នំដងរែក ក្នុងស្រុកជាំក្សាន្ត ពេលនេះបានក្លាយជាច្រកទ្វារអន្តរជាតិជាផ្លូវការហើយ។ ច្រកនេះ គឺជាចំណុចឆ្លងកាត់ថ្មើរជើងរបស់ប្រជាពលរដ្ឋខ្មែរក្នុងស្រុកជាំក្សាន្ត ខេត្តព្រះវិហារ ក្នុងការធ្វើទំនាក់ទំនងជាមួយប្រជាពលរដ្ឋថៃ ក្នុងស្រុកណាំយឺន ខេត្តឧប៊ុន អស់រាប់ទសវត្សមកហើយ ហើយពេលនេះរាជរដ្ឋាភិបាលកម្ពុជានិងថៃ បានព្រមព្រៀងគ្នាចុះហត្ថលេខាក្នុងការបើកច្រកទ្វារលើខ្នងភ្នំដងរែកនេះ ឱ្យទៅជាច្រកទ្វារអន្តរជាតិ។
នៅព្រឹកថ្ងៃទី១៤ សីហា លោកអ៊ុំ ម៉ារ៉ា អភិបាលខេត្តបានដឹកនាំប្រតិភូខេត្តគ្រប់ស្ថាប័នឡើងទៅកាន់កំពូលភ្នំដងរែក ចំណុចច្រកអានសេះ ដើម្បីជួបជាមួយអភិបាលខេត្តឧប៊ុន ប្រទេសថៃ ក្នុងការរួមសហការគ្នាពិនិត្យភូមិសាស្រ្តច្រកអានសេះដើម្បីបើកច្រកទ្វារនេះឱ្យទៅជាច្រកអន្តរជាតិជាផ្លូវការរវាងខេត្តព្រះវិហារ ជាមួយខេត្តឧប៊ុន ។
ការជួបគ្នានាព្រឹកនេះ ភាគីទាំងពីរបានសហការយ៉ាងល្អដោយនាំគ្នាដើរពិនិត្យទីតាំងរៀងៗខ្លួននិងពិនិត្យមើលការដោះដូរទំនិញរបស់ប្រជាពលរដ្ឋទាំង២ប្រទេសទៅវិញទៅមក ។ លោកអ៊ុំ ម៉ារ៉ា មានប្រសាសន៍ថា ការបើកច្រកទ្វារចំណុចអានសេះឱ្យទៅជាច្រកទ្វារអន្តរជាតិនាពេលនេះ គឺយោងតាមអនុសាសន៍របស់សម្តេចអគ្គមហាសេនាបតីតេជោហ៊ុន សែន ប្រមុខរាជរដ្ឋាភិបាលកម្ពុជា ធ្វើឱ្យព្រំដែនទាំងពីរមានសន្តិភាព និងការអភិវឌ្ឍនិងជាប្រយោជន៍ដល់ពលរដ្ឋទាំងពីរ ។
លោកអភិបាលខេត្តបានបន្តថា ភាគីកម្ពុជា នឹងចាប់ផ្តើមស្ថាបនាផ្លូវក្រាលបេតុងពីជើងភ្នំឡើងទៅកំពូលភ្នំដងរែកចំណុចច្រកអានសេះ នៅរដូវប្រាំងខាងមុខនេះ ហើយរដ្ឋាភិបាលកម្ពុជានឹងបន្តស្ថាបនាផ្លូវក្រាលកៅស៊ូពីទីប្រជុំជនស្រុកជាំក្សាន្តទៅកាន់ជើងភ្នំអានសេះ និងពីស្រុកជាំក្សាន្តទៅកាន់តំបន់មុំបីផងដែរ ។
ប្រជាពលរដ្ឋក្នុងស្រុកជាំក្សាន្ត និងគ្រួសារកងទ័ពដែលកំពុងរស់នៅតាមបណ្តោយជួរភ្នំ ដងរែក បន្ទាប់ពីមានការបើកច្រកទ្វារអានសេះ ឱ្យទៅជាច្រកទ្វារអន្តជាតិ ពួកគាត់សង្ឃឹមថា ការរស់នៅពិតជានឹងមានជីវភាពធូរធារជាងមុន ព្រោះការទាក់ទងគ្នាបានល្អគ្រប់បែបយ៉ាងទាំងខាងសេដ្ឋកិច្ច ពាណិជ្ជកម្ម វប្បធម៌ និងវិស័យទេសចរណ៍ជាដើម ។ ពួកគាត់មិនចាំបាច់នាំទំនិញពីរាជធានីភ្នំពេញទៅកាន់តំបន់ដាច់ស្រយាលនេះទៀតឡើយ ៕
ចែករំលែកព័តមាននេះ