រាជធានីភ្នំពេញ ៖ យុវជនម្នាក់ បានខ្ទាតប៉ើងធ្លាក់ចូលប្រឡាយទឹកស្លាប់ភ្លាមៗនៅកន្លែងកើតហេតុ រីឯម៉ូតូរបស់ខ្លួនត្រូវបានរថយន្តម៉ាក Tundra បុកហើយអូសជនរងគ្រោះប្រមាណ១០០ម៉ែត្រ ទើបបណ្តាលឱ្យប៉ើងជនរងគ្រោះចូលទឹកប្រឡាយស្លាប់ភ្លាមៗនៅនឹងកន្លែង រួចរថយន្តបានអូសម៉ូតូប្រមាណជិត២គីឡូ ទើបឈប់លែងទៅមុខរួចហើយនាំគ្នាគេចខ្លួនបាត់តែម្តង។ គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង៤និង៥០នាទីរសៀលថ្ងៃទី១៤ កក្កដា ស្ថិតនៅលើកំណាត់ផ្លូវជាតិលេខ១ ទល់មុខវត្តកោះ ក្នុងស្រុកកៀនស្វាយ ខេត្តកណ្តាល។
ជនរងគ្រោះឈ្មោះធូ អៀវ ហៅចំណាប់ អាយុជាង២០ឆ្នាំ រស់នៅភូមិល្វាសក្រោម ស្រុកល្វាឯម ខេត្តកណ្តាល ជិះម៉ូតូម៉ាកឌ្រីមសេ ១២៥ ស៊េរីឆ្នាំ២០១២ តែម្នាក់ឯង។ អ្នកបើកបរ រួមទាំងអ្នកជិះ ក្នុងរថយន្តចំនួន៤នាក់ក្នុងនោះ ស្រី២នាក់ បានរត់គេចខ្លួនបាត់។
ក្រោយកើតហេតុសមត្ថកិច្ចបានចុះទៅវាស់វែង ហើយស្ទូចយកម៉ូតូ និងរថយន្តបង្កហេតុ ទៅរក្សាទុក ដើម្បីដោះស្រាយបន្តទៀត ខណៈដែលអ្នកបើកបររថយន្ត និងអ្នករួមដំណើរដែលគេមិនស្គាល់អត្តសញ្ញាណបាននិងកំពុងរត់គេចខ្លួន។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ