ប៉ូលិសចាប់ខ្លួនលោកម៉ម សូណង់ដូ ព្រឹកនេះយកទៅសាកសួរនៅក្រសួងមហាផ្ទៃ

ថ្ងៃទី ១៥ ខែ កក្កដា ឆ្នាំ ២០១២2012-07-15T06:27:00+00:00
ម៉ោង ០៦:២៧
bopha bopha

រាជធានីភ្នំពេញ ៖ លោកម៉ម សូណង់ដូ ប្រធានសមាគមអ្នកប្រជាធិបតេយ្យ និងជានាយកវិទ្យុសំបុកឃ្មុំត្រូវបានប៉ូលិសសន្តិសុខផ្ទៃក្នុងក្រសួងមហាផ្ទៃសហការជាមួយប៉ូលិសមូលដ្ឋានធ្វើការចាប់ខ្លួន កាលពីព្រឹកថ្ងៃទី១៥ កក្កដា ២០១២ នៅផ្ទះរបស់គាត់ដែលជាស្ថានីយវិទ្យុសំបុកឃ្មុំ អគារលេខ៣៣ ផ្លូវលេខ២៦BT ក្រុម១ ភូមិត្នោតជ្រុំ២ សង្កាត់បឹងទំពុន ខណ្ឌមានជ័យ ពាក់ព័ន្ធបទល្មើសចាប់ដី ញុះញង់ឱ្យមានការចាប់ដីរដ្ឋខុសច្បាប់ និងពាក់ព័ន្ធចលនាបង្កើតតំបន់អបគមន៍នៅខេត្តក្រចេះ ។

ការចាប់ខ្លួនលោកម៉ម សូណង់ដូ នេះធ្វើឡើងតាមដីកាបង្គាប់របស់សាលាដំបូងខេត្តក្រចេះ ហើយឥឡូវនេះប៉ូលិសបាននាំខ្លួនលោកទៅសាកសួរនៅក្រសួងមហាផ្ទៃជុំវិញរឿងបង្កើតតំបន់អបគមន៍, ចាប់ដីរដ្ឋខុសឹច្បាប់…។

គួរបញ្ជាក់ថា ប្រធានសមាគមអ្នកប្រជាធិបតេយ្យ និងជានាយកវិទ្យុសំបុកឃ្មុំ លោកម៉ម សូណង់ដូ បានរងការចោទប្រកាន់ពាក់ព័ន្ធនឹងការបំផុសឲ្យប្រជាពលរដ្ឋចាប់ដីដោយខុសច្បាប់នៅស្រុកឆ្លូងខេត្តក្រចេះ ហើយថ្មីៗនេះលោកមកដល់ព្រលានយន្តហោះអន្តរជាតិភ្នំពេញ កាលពីវេលាម៉ោង១០យប់ថ្ងៃព្រហស្បតិ៍ ទី១២ កក្កដា ២០១២ ។

សូមបញ្ជាក់ថា កាលពីដើមខែកក្កដា២០១២នេះ សម្តេចនាយករដ្ឋមន្ត្រីហ៊ុន សែន បានប្រកាសចាត់វិធានការតាមផ្លូវច្បាប់ប្រឆាំង លោកម៉ម សូណង់ដូ ដោយសារតែជាប់ចោទនឹងករណីបំផុសឲ្យប្រជាពលរដ្ឋចាប់ដីខុសច្បាប់នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ ។

សូមរំលឹកថា នៅក្នុងសន្និសីទកាសែត កាលពីព្រឹកថ្ងៃសុក្រទី៦ កក្កដា ២០១២សមាគមអ្នកប្រជាធិបតេយ្យដែលដឹកនំាដោយ លោក ម៉ម សូណង់ដូ ប្រធានវិទ្យុសំបុកឃ្មុំ FM ១០៥ បានធ្វើការច្រានចោលថា ខ្លួនមិនមានការពាក់ព័ន្ធនឹងបញ្ហាដីធ្លីជុំវិញព្រឹត្តិការណ៍នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះនោះទេ ។ លោកជា បំរុង អនុប្រធានសមាគមអ្នកប្រជាធិបតេយ្យ បានថ្លែងបញ្ជាក់ក្នុងសន្និសីទកាសែតថា សមាគមអ្នកប្រជាធិបតេ្យមិនបានបញ្ជាឲ្យមានការធ្វើសកម្មភាពនៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះនោះទេ ហើយថា លោកម៉ម សូណង់ដូ ក៏ពុំមានការពាក់ព័ន្ធនឹងបញ្ហានេះដែរ ។

គួររំលឹកថា កាលពីថ្ងៃទី១៦ ឧសភា ២០១២កន្លងទៅ កម្លាំងប្រដាប់អាវុធរបស់រដ្ឋាភិបាលជិត១ពាន់នាក់ រួមជាមួយនឹងឧទ្ធម្ភាគចក្រផងបានធ្វើការឡោមព័ទ្ធនិងបង្រ្កាបក្រុមអ្នកភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ ដោយចោទថា ចាប់់ដីដោយខុសច្បាប់ និងបានប៉ុនប៉ងបង្កើតតំបន់អបគមន៍ ។ ក្នុងហេរុការណ៍ដែលរាជរដ្ឋាភិបាលអះអាងថា ជាការបង្រ្កាបក្រុមអនាធិបតេយ្យនាពេលនោះ បានធ្វើឲ្យកុមារីម្នាក់អាយុ១៤ឆ្នាំ ឈ្មោះហេង ចាន់ថា ស្លាប់ដោយគ្រាប់កំាភ្លើងរបស់សមត្ថកិច្ច ។

នៅថ្ងៃជាមួយគ្នានេះដែរ អ្នកនាំពាក្យក្រសួងមហាផ្ទៃបានចេញសេចក្តីថ្លែងការណ៍ដោយបានលើកឡើងថា នៅភូមិសាស្ដ្រភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ មានពួកអនាធិបតេយ្យមួយក្រុម មានតួនាទីជាអ្នកដឹកនាំ និងជាសមាជិករបស់សមាគមអ្នកប្រជាធិបតេយ្យមានឈ្មោះប៊ុន រដ្ឋា ជាមេខ្លោង ដោយបានប្រព្រឹត្តល្មើសច្បាប់រដ្ឋធម្មនុញ្ញនិងច្បាប់នានាជាធរមានរបស់ប្រទេសកម្ពុជា ហើយអាជ្ញាធរបានស្វែងរកចាប់ខ្លួនអ្នកទាំង៥នាក់នោះ មានឈ្មោះប៊ុន រដ្ឋា ភេទប្រុស អាយុ៣២ឆ្នាំ ប៊ុន ឆន ភេទប្រុស អាយុ៥៥ឆ្នាំ ឈ្មោះសុខ តុង ភេទប្រុស អាយុ៦១ឆ្នាំ ម៉ា ឆាង ភេទប្រុស អាយុ៤៧ឆ្នាំ និងខាត់ សារឿន ភេទប្រុស អាយុ៤២ឆ្នាំ ៕