កីឡាករប្រដាល់អង់គ្លេសខាល ហ្វ្រច់បានក្លាយជាម្ចាស់ជើងឯកពិភពលោក៣ជំនាន់បន្ទាប់ពីបញ្ឈប់កីឡាករកាណាដា លូស៊ាន ប៊ូតក្នុងទឹកទី៥នៅសង្វៀន Nottingham Capital FM Arenaក្រុង Nottinghamប្រទេសអង់គ្លេសកាលពីរាត្រីថ្ងៃសៅរ៍ទី២៦ឧសភា ។
កីឡាករប្រដាល់អង់គ្លេសខាល ហ្វ្រច់បានក្លាយជាម្ចាស់ជើងឯកពិភពលោក៣ជំនាន់បន្ទាប់ពីបញ្ឈប់កីឡាករកាណាដា លូស៊ាន ប៊ូតក្នុងទឹកទី៥នៅសង្វៀន Nottingham Capital FM Arenaក្រុង Nottinghamប្រទេសអង់គ្លេសកាលពីរាត្រីថ្ងៃសៅរ៍ទី២៦ឧសភា ។
អំឡុងការប្រកួតក្នុងទឹកទី១និងទី២ កីឡាករទាំងពីរបានប្តូរកណ្តាប់ដៃគ្នាទៅវិញទៅមកយ៉ាងសាហាវ ប៉ុន្តែគ្មានអ្នកណាម្នាក់មានបញ្ហានោះឡើយ។ ឯទឹកទី៣ ការប្រកួតរឹតតែសាហាវជាងពីរទឹកដំបូង។ នៅក្នុងទឹកនេះ ប៊ូតត្រូវអាជ្ញាកណ្តាលរាប់ក្រោយពីភ្លាត់ស្នៀតចូលពេញកណ្តាប់ដៃខាល ហ្វ្រច់។ ជាថ្មីម្តងទៀតក្នុងទឹកទី៤ ខាល ហ្វ្រច់នៅតែធ្វើបានល្អដដែល។ គេបានធ្វើឱ្យប៊ូតងីងើវង្វេងរកកល់ដួល តែសំណាងល្អជួងបញ្ចប់ទឹកក៏បានបន្លឺឡើង។
ទោះជាយ៉ាងនេះក្តី ការប្រកួតត្រូវបានបញ្ចប់នៅទឹកទី៥ក្នុងនាទី ១:០៥ខណៈប៊ូតបានបញ្ចេញនូវភាពកំសាកនិងខ្លបខ្លាចមិនអាចវាយតបតលើហ្វ្រច់បាន ហើយយកខ្សែរេញជាបង្អែក។ ក្នុងទឹកនេះ ហ្វ្រច់បានប្រើកណ្តាប់ដៃស្តាំបំបាក់ស្មារតីគូប្រកួតនិងអមជាមួយកណ្តាប់ដៃឆ្វេង-ស្តាំយ៉ាងច្រើនរាប់ស្ទើរមិនទាន់។ ដោយមើលឃើញ ប៊ូតគ្មានលទ្ធភាពតបតបាន អាជ្ញាកណ្តាលក៏សម្រេចបញ្ឈប់ការប្រកួតក្នុងទឹកនេះ។
ហ្វ្រច់វ័យ៣៤ឆ្នាំធ្លាប់ប្រកួតបានចំនួន ៣១លើក(គិតទាំងលើកនេះ)ក្នុងនោះចាញ់២មិនដែលស្មើ និងធ្លាប់ផ្តួលដៃគូឱ្យសន្លប់ចំនួន២១លើក។ កាលពីប្រកួតនៅរដ្ឋញូវជើស៊ី សហរដ្ឋអាមេរិកថ្ងៃទី១៧ខែធ្នូឆ្នាំ២០១១ គេចាញ់ពិន្ទុកីឡាករអាមេរិក Andre Ward។ គិតពីខែតុលាឆ្នាំ២០០៩មក នេះជាលើកទី១ហើយដែលកីឡាកររូបនេះប្រកួតដណ្តើមខ្សែក្រវាត់នៅលើទឹកដីរបស់ខ្លួន។ ហ្វ្រច់មិនដែលធ្លាប់បរាជ័យម្តងណាទេនៅក្នុងការប្រកួត៤លើកនៅក្នុងប្រទេសអង់គ្លេស បើទោះបីកាលពីជាង២ឆ្នាំមុន គេឈ្នះកីឡាករ Andre Dirrellប្រផិតប្រផើយយ៉ាងណាក្តី ។
គេបានថ្លែងថា៖«បន្ទាប់ពីចាញ់ Andre Wardមក ខ្ញុំពិតជាខ្មាសគេខ្លាំងណាស់។ ខ្ញុំមកទីនេះគឺដើម្បីស្តារមុខមាត់ឡើងវិញ។ ខ្ញុំបានប្តេជ្ញាថានឹងធ្វើឱ្យបានល្អជាងលើកមុន»។ លូស៊ាន ប៊ូតដែលមានអាយុទើប៣២ឆ្នាំគឺធ្លាប់មានឯតទគ្គកម្មប្រកួតល្អបំផុត។ នៅក្នុងការឡើងសង្វៀន ៣១លើកនេះជាលើកទី១ហើយដែលគេបរាជ័យ។ កន្លងមក គេធ្លាប់ផ្តួលដៃគូឱ្យសន្លប់ចំនួន២៤លើក។ ប្រកួតកាលពីថ្ងៃទី ៥ខែវិច្ឆិកាឆ្នាំ២០១១នៅទីក្រុងកេបិចប្រទេសកាណាដាគេឈ្នះកីឡាករហ្សាម៉ាអុីក Glen Johnsonដោយពិន្ទុជាឯកច្ឆន្ទ ។
ចាប់ពីឈ្នះខ្សែក្រវាត់នេះក្នុងឆ្នាំ ២០០៧មក គេធ្លាប់បានឡើងការពារចំនួន៩លើកហើយដោយមិនរាប់បញ្ចូលលើកនេះ។ ភាគច្រើននៃការប្រកួតរបស់គេពីមុនមកធ្វើនៅប្រទេសកាណាដា។ នេះគឺជាលើកទី២ហើយដែលរូបគេឡើងប្រកួតការពារខ្សែក្រវាត់នៅក្រៅទឹកដី ៕
ចែករំលែកព័តមាននេះ