កីឡា​ករ​អេ​ស្ប៉ាញ​​​ Francisco José Ventoso Alberdi បាន​​សម្តែង​​​ក្តី​​រី​ក​​រាយ​ជា​ខ្លាំង​ក្រោយ​ពី​រូប​គេ​យក​ឈ្នះ​ដំណាក់​ទី​៩​ប្រណាំង​​​កង់​កម្ម​វិធី Tour of Italyឬ​​ ​Giro d’Italia​នៅប្រ​ទេស​អ៊ីតា​លី​កាល​ពីថ្ងៃ​ទី​១៤​​​​​ខែ​សភា​​ ​។ ការ​ប្រណាំង​ក្នុង​ដំ​ណាក់​នេះ​បាន​បញ្ចប់​នៅ​ទី​ក្រុង​ Frosinoneប្រ​ទេស​អ៊ីតា​លី ។

Ventoso Alberdi​ដែល​ជិះ​កង់​ឱ្យ​​ក្រុម​Movistar Team​បាន​យក​ឈ្នះ​ដំណាក់​​មាន​ចម្ងាយផ្លូវ​១៧១​​​គី​ឡូ​ម៉ែត​ចេញ​ដំណើរ​ពី​ទី​ក្រុង ​San Giorgio nel Sannioទៅ​កាន់​ទី​ក្រុង Frosinoneប្រ​ទេស​អ៊ីតា​លី​ដោយ​ប្រើ​អស់​​ថិរវេលា​​៣​ម៉ោង៣៩​​​​នាទី​និង១៥​​​វិនាទី​យក​ឈ្នះ​កីឡាករ​ម្ចាស់​ផ្ទះ​ Fabio Fellineជិះ​ឱ្យ​ក្រុម​Androni Giocattoliនិង​ឈ្នះ​កីឡាករ​​​ម្ចាស់​ផ្ទះ​​ម្នាក់​ទៀតគឺ​​ Giacomo Nizzoloរបស់​​ក្រុម​ RadioShack-Nissan​ដែល​អ្នក​ទាំង​ពីរ​ប្រើ​ថិរវេលា​ច្រើន​ជាងស្មើ​ៗគ្នា​។​

ថ្លែង​បន្ទាប់​ពី​ទទួល​បាន​ជ័យជម្នះ​​ Ventoso Alberdi​​​​បញ្ជាក់​ថា​៖«ខ្ញុំ​មក​ប្រ​ណាំង​នៅ​ទី​នេះ​គឺ​ធ្វើ​យ៉ាង​ណា​យក​ឈ្នះ​ឱ្យ​បាន​មួយ​ដំ​ណាក់​ តែ​យ៉ាង​ណា គោល​ដៅ​ធំ​របស់​យើង​គឺ​នាំ​មុខ​នៅ​លើ​តារាង​ថិរវេលា​សរុប​​។​ ពេញ​មួយ​សប្តាហ៍​ ខ្ញុំ​បាន​ព្យាយាម​ធ្វើ​ឱ្យ​ខ្លួន​ឯង​ស្រស់​ស្រាយជា​និច្ច​​។ ទោះ​យ៉ាង​ណា យក​ឈ្នះ​ការ​ប្រ​ណាំង​នៅ​ថ្ងៃ​នេះ​ពិត​ជា​ពិ​បាក​ខ្លាំង​ណាស់​។ មាន​កីឡាករ​ជាច្រើន​បាន​ដួល​នៅ​ពេល​ប្រជែង​គ្នា​។ វា​ជា​ធម្ម​តា​ទេ​ ការ​ប្រ​ណាំង​ដែល​មាន​គ្នា​ច្រេើន​បែប​នេះ​គេ​ច​មិន​ផុត​ពី​ប៉ះ​ដៃ​ចង្កូត​គ្នា​ឡើយ​»។​
បើ​ទោះ​ណា​កីឡាករអេស្ប៉ាញ​​​​រូបនេះ​បាន​យក​ឈ្នះ​ដំណាក់​នេះ​ក៏​ពិត​មែន​ ប៉ុន្តែ​នៅ​លើ​តារាង​ពេល​វេលា​សរុប​គេ​ពុំ​អាច​ដណ្តើម​បាន​ការ​នាំ​មុខ​នៅ​ឡើយ​ទេ​ដ្បិត​ កីឡាករកា​ណា​ដា​​ ​​​Ryder Hesjedal​​​ដែល​បាន​បញ្ចប់​ដំណាក់​នេះ​ក្នុង​លំ​ដាប់ទី​៧​នោះ​នៅ​តែ​សន្សំ​ពេល​វេលា​បាន​យ៉ាង​ល្អ​បន្ត​គ្រង​អាវ​កាក់​ពណ៌​លឿង​ក្នុង​នាម​ជា​អ្នក​​នាំ​មុខ​គេ​ដដែល​​​ ។ វា​ជា​ថ្ងៃ​ទី​៣​ហើយ​ដែល​កីឡាករ​កា​ណា​ដា​រូបនេះ​នាំ​មុខ​នៅ​លើ​តារាង​ថិរវេលា​សរុប​ ។​

ឆ្លង​កាត់​ការ​ប្រណាំង​ចំនួន៩​​​ដំណាក់​មក​នេះ​ Hesjedal​​​ដែលជិះ​កង់​ឱ្យ​ក្រុម​ Garmin- Barracuda​​​​​​ប្រើ​អស់​ថិរវេលា​សរុប​តិច​ជាង​គេ​បំផុត​គឺ​៣៦​​ម៉ោង២​នា​ទី​និង៤០​​វិនាទី​នាំ​មុខ​កីឡាករអេស្ប៉ាញ Joaquim Rodriguez Oliver​​ដែល​ប្រើ​ថិរវេលា​ច្រើន​ជាង៩​​វិ​នា​ទី។ ឯកីឡាករ​​ម្ចាស់​ផ្ទះ​ Paolo Tiralongo​ស្ថិត​នៅ​លំ​ដាប់​ទី​៣​បន្ទាប់​ពី​​បាន​ប្រើ​ថិរ​វេលា​ច្រើន​ជាង​១៥​​វិ​នា​ទី​​ ។ការ​ប្រណាំងកម្ម​វិធី Tour of Italyឬ​ ​Giro d’Italia​ឆ្នាំ​នេះ​មាន​២១​​ដំណាក់​និង​មាន​ចម្ងាយ​ផ្លូវ​សរុប​៣៤៧៦​គី​ឡូ​ម៉ែត្រ​។ ដោយ​ឡែក​ដំណាក់​ទី​១០​​ដែល​ជា​ដំ​ណាក់​បន្ត​​មាន​ចម្ងាយ​ផ្លូវ​១៨៧​​​​គី​ឡូ​ម៉ែត្រ​ដោយ​ការ​ប្រ​ណាំងចាប់​ចេញ​ដំណើរ​ពី​ទី​ក្រុង ​Civitavecchia​ទៅ​កាន់​ទី​ក្រុង Assisiប្រ​ទេស​អុីតា​លី ៕