កាន់ ម៉ូ និង Kader ចេញដំណើរទៅម៉ាឡេស៊ី ត្រៀមជួយ ASEAN All Stars ប្រកួតទល់នឹង Man Utd
រាជធានីភ្នំពេញ ៖ កីឡាករ កាន់ ម៉ូ និងកីឡាករ Abdel Kader Coulibaly សមាជិកក្រុមជម្រើសជាតិកម្ពុជា…
រាជធានីភ្នំពេញ ៖ កីឡាករ កាន់ ម៉ូ និងកីឡាករ Abdel Kader Coulibaly សមាជិកក្រុមជម្រើសជាតិកម្ពុជា បានចេញដំណើរទៅប្រទេសម៉ាឡេស៊ី នៅថ្ងៃទី២៦ ខែឧសភា ឆ្នាំ២០២៥ ដើម្បីចូលរួមជាមួយក្រុមតារាបាល់ទាត់ប្រចាំតំបន់អាស៊ាន ឬ ASEAN All Stars សម្រាប់ការប្រកួតមិត្តភាពសប្បុរសធម៌អន្ដរជាតិតទល់នឹងក្រុម Manchester United នាថ្ងៃទី២៨ ខែឧសភា ឆ្នាំ២០២៥ នៅប្រទេសម៉ាឡេស៊ី។ នេះតាមការបង្ហោះលើផេកផ្លូវការរបស់សហព័ន្ធកីឡាបាល់ទាត់កម្ពុជា។
សមាជិកក្រុមជម្រើសជាតិកម្ពុជាទាំង២រូប ខ្សែការពារ កាន់ ម៉ូ របស់ក្លិបវិសាខា និងខ្សែប្រយុទ្ធ Kader របស់ក្លិបអង្គរថាយហ្គឺរ ស្ថិតនៅក្នុងចំណោមកីឡាករឆ្នើម តំបន់អាស៊ានផ្សេងទៀត ដែលត្រូវបានជ្រើសរើសដោយលោក Kim Sang-sik បច្ចុប្បន្នគឺជាគ្រូបង្វឹកក្រុមជម្រើសជាតិវៀតណាម និងជាអ្នកទទួលភារកិច្ចដឹកនាំក្រុម ASEAN All Stars ប្រកួតមិត្តភាពសប្បុរសធម៌អន្តរជាតិទល់នឹងក្រុមបិសាចក្រហម Man Utd ដោយការប្រកួតនឹងធ្វើឡើងនៅឯកីឡដ្ឋានជាតិ Bukit Jalil ក្នុងទីក្រុងគូឡាឡាំពួរ។
ក្រៅពី កាន់ ម៉ូ និង Kader កីឡាករប្រកបអាជីពនៅលីគកំពូលកម្ពុជា២រូបផ្សេងទៀត គឺខ្សែប្រយុទ្ធឡាវ Bounphachan Bounkong របស់ក្លិបព្រះខ័នរាជស្វាយរៀង និងខ្សែប្រយុទ្ធទីម័រខាងកើត João Pedro របស់ក្លិបអង្គរថាយហ្គឺរ ក៏ត្រូវបានជ្រើសរើសដោយគ្រូបង្វឹកជនជាតិកូរ៉េខាងត្បូង លោក Kim Sang-sik សម្រាប់ការប្រកួតនៅថ្ងៃទី២៨ ខែឧសភា ខាងមុខផងដែរ។
ដោយឡែកក្រុម Man Utd ក៏ត្រូវបានរាយការណ៍ថាបានចាកចេញពីចក្រភពអង់គ្លេស ធ្វើដំណើរទៅប្រទេសម៉ាឡេស៊ីផងដែរ កាលពីថ្ងៃទី២៥ ខែឧសភា ពោលប៉ុន្មានម៉ោងប៉ុណ្ណោះ បន្ទាប់ពីចប់ការប្រកួតបិទរដូវកាលលីគកំពូលអង់គ្លេស Premier League ដែលពួកគេបានយកឈ្នះក្រុម Aston Villa ដោយលទ្ធផល ២ទល់នឹង០ ដ្បិតពួកគeបញ្ចប់យុទ្ធនាការរដូវកាល២០២៤-២៥នេះ នៅចំណាត់ថ្នាក់ទី១៥។
ប្រភពពីកាសែត Daily Mail ក៏បានរាយការណ៍ថា ក្រុមដែលទើបខកខានឱកាសឈ្នះពានរង្វាន់ Europa League រដូវកាល ២០២៤-២៥ ក្រោយចាញ់ក្រុម Tottenham Hotspur ក្នុងវគ្គផ្តាច់ព្រ័ត្រមួយនេះ នឹងត្រូវចំណាយប្រាក់ប្រហែល៨លានផោន ឬស្មើនឹងជាង១០លានដុល្លារអាមេរិក សម្រាប់ការធ្វើដំណើរទៅចូលរួមការប្រកួតមិត្តភាពសប្បុរសធម៌អន្ដរជាតិ ដែលនឹងឃើញពួកគេប្រកួតនៅទីក្រុងគូឡាឡាំពួរ ប្រទេសម៉ាឡេស៊ី បន្ទាប់មកនៅទីក្រុងហុងកុង៕ រូបភាព ៖ FFC និង Manchester United
ចែករំលែកព័តមាននេះ