ចាត់ទុកថាជាហេតុការណ៍ដ៏កម្រមួយដែលកើតមាននៅលើលោកនេះ ហើយក៏អាចចាត់ទុកថាជាបទពិសោធន៍ថ្មីមួយសម្រាប់លោកវេជ្ជបណ្ឌិត ក៏ដូចជាក្រុមគ្រូពេទ្យផ្នែកវះកាត់អ្នកជំងឺផងដែរ ។
យោងតាមប្រភពពីគេហទំព័រឆាយណាប៊ឺសចេញផ្សាយថ្ងៃទី៧ ឧសភា ឆ្នាំ២០១២ ឱ្យដឹងថា កាលពីវេលាម៉ោង៣និង៣០នាទីរសៀលថ្ងៃទី៥ ឧសភា ឆ្នាំ២០១២ មានករណីអ្នកជំងឺម្នាក់ដែលត្រូវធ្វើការវះកាត់ បែរជាក្រោកឡើងអង្គុយ រួចសម្លឹងមើលមុខគ្រូពេទ្យម្នាក់ដែលគេស្គាល់ថា ឈ្មោះ លី (Li) ដោយគ្មានហេតុផលអ្វីសោះ រួចក៏ចុះចេញពីគ្រែវះកាត់ដេញវាយក្រុមគ្រូពេទ្យពេញ បន្ទប់ បណ្តាលឱ្យគ្រូពេទ្យរងរបួស និងសម្ភារបរិក្ខារពេទ្យមួយចំនួនត្រូវខូចខាត ព្រមទាំងវាយបំបែកកញ្ចក់បង្អួចក្នុងមន្ទីរពេទ្យទៀតផង ។ ហេតុការណ៍នេះកើតឡើងនៅក្នុងមន្ទីរពេទ្យ People’s Hospital ស្ថិតនៅក្រុងJingzhou ខេត្ត Hubei ប្រទេសចិន ។
យោងតាមប្រភពពីកាមេរ៉ាវីដេអូត្រួតពិនិត្យនៅក្នុងបន្ទប់វះកាត់បានបង្ហាញថា បុរសអ្នកជំងឺរូបនោះបានរុញលោកគ្រូពេទ្យលីចេញ បន្ទាប់ពីលោកគ្រូពេទ្យលីបញ្ចុះបញ្ចូលគាត់ឱ្យបន្តធ្វើការវះកាត់ ហើយអ្នកជំងឺរូបនេះក៏កញ្ឆក់បានឧបករណ៍បរិក្ខារពេទ្យមួយចំនួនគប់សំដៅទៅលោកគ្រូពេទ្យលីតែម្តង ។ ចំណែកវេជ្ជបណ្ឌិតឯទៀតក៏បានរត់ចេញពីបន្ទប់វះកាត់ នៅតែលោកគ្រូពេទ្យលី ដែលគាត់នៅឆ្ងាយពីទ្វារ ត្រូវអ្នកជំងឺរូបនេះវាយឱ្យរបួស ក ដៃ និងកន្លែងផ្សេងទៀតយ៉ាងដំណំ ។ ក្រោយមក បុរសអ្នកជំងឺក៏បានចាកចេញពីបន្ទប់វះកាត់ទៅ ។
នៅក្នុងនោះដែរ កញ្ចក់ការពារកាំរស្មីនៅតាមច្ររបៀងត្រូវអ្នកជំងឺរូបនេះវាយបំបែក បណ្តាលឱ្យមន្ទីរពេទ្យត្រូវបង្ខំចិត្តផ្អាកការវះកាត់ចំនួន១៥បន្ទប់ នៅក្នុងជាន់នេះតែម្តង ដោយពួកគេខ្លាចខ្យល់ខាងក្រៅបក់ចូលមក បណ្តាលឱ្យឆ្លងមេរោគដល់អ្នកជំងឺក្នុងអំឡុងពេលវះកាត់ ។
ប្រភពបន្តថា ក្រោយហេតុការណ៍នេះកើតឡើងរយៈពេល២០នាទី បន្ទាប់ពីមានការបញ្ចុះបញ្ចូលពីក្រុមគ្រួសារ និងជំនួយបន្ថែមពីក្រុមគ្រូពេទ្យ ទើបបុរសអ្នកជំងឺរូបនេះស្ងប់ចិត្ត និងយល់ព្រមធ្វើការវះកាត់ព្យាបាលជំងឺម្តងទៀត ។
លើកនេះ ដើម្បីការពារក្រែងមានករណីកើតឡើងម្តងទៀត និងដើម្បីដំណើរការវះកាត់បានជោគជ័យផងនោះ មន្ទីរពេទ្យបានយកគ្រូពេទ្យវះកាត់ម្នាក់ទៀតមកជំនួសលោកគ្រូពេទ្យលីវិញ ហើយអនុញ្ញាតឱ្យម្តាយ និងបងប្រុសរបស់អ្នកជំងឺនៅជាមួយក្នុងបន្ទប់វះកាត់នោះដែរ ។
ប្រភពពីមន្ទីរពេទ្យបានឱ្យដឹងថា អ្នកជំងឺរូបនេះត្រូវបានបញ្ជូនមកមន្ទីរពេទ្យយ៉ាងប្រញាប់ប្រញាល់ក្នុងអំឡុងម៉ោង៣រសៀល ដើម្បីធ្វើការវះកាត់បន្ទាន់ ។ គាត់ត្រូវបានគេដឹងថារងរបួសដោយសារកាំបិត និងស្រវឹងស្រា ។
ដោយឡែកម្តាយរបស់អ្នកជំងឺរូបនេះបាននិយាយថា កូនប្រុសរបស់គាត់ក៏ជាជនរងគ្រោះដែរ ។ គាត់ខឹងក្រុមគ្រូពេទ្យវះកាត់ ខណៈពេលគាត់មានអារម្មណ៍មិនល្អ ។
បច្ចុប្បន្ន ប៉ូលិសប្រចាំតំបន់កំពុងបើកការស៊ើបអង្កេតជុំវិញករណីនេះផងដែរ ៕
ចែករំលែកព័តមាននេះ