បុរស​បម្រើ​ការ​នៅ​សួន​សត្វ​មួយ​ស្ថិត​ក្នុង​ខេត្ត Hubei ​ប្រទេស​ចិន ព្រោះ​តែ​ជួយ​សង្គ្រោះ​ជីវិត​កូន​ស្វា​តូច​មួយ គាត់​បាន​សម្រេច​ចិត្ត​លិទ្ធ​គូថ​កូន​ស្វា​នោះ​ដើម្បី​ជួយ​សម្រួល​ចលនា​ពោះ​វៀន​របស់​វា​ ។​ នេះ​បើ​យោង​តាម​ប្រភព​ពី​គេ​ហ​ទំព័រ​មេយ​ដេលី ចេញ​ផ្សាយ​ថ្ងៃ​ទី​២ ឧសភា ឆ្នាំ​២០១២ ។

ប្រភព​បន្ត​ថា បុរស​ដែល​លិទ្ធ​គូថ​ស្វា​នោះ​ឈ្មោះ Zhang Bangshen ជា​បុគ្គលិក​បម្រើ​ការ​នៅ​សួន​សត្វ Wuhan Zoo ។ ថ្ងៃ​មួយ​ គាត់​បាន​ប្រទះ​ឃើញ​កូនស្វា​មួយ​ក្បាល​ ទើប​តែ​​មាន​អាយុ៣​ខែ​ និង​ពុំ​ទាន់​ដុះ​ធ្មេញ​សោះ បាន​លេប​សណ្តែក​ដី​១គ្រាប់ ដែលភ្ញៀវ​ទេសចរ​បាន​បោះ​ឱ្យវា​ស៊ី ហើយក្រោយ​មក​កូន​ស្វា​នោះ​ក៏​មាន​ជំងឺ​​ជុះ​អាចម៍​មិន​ចេញ​ ប្រឈម​នឹង​​គ្រោះ​ថ្នាក់​ដល់​អាយុ​ជីវិត​ ព្រោះ​វា​នៅ​តូច​ពេក​មិន​អាច​ឱ្យ​វា​លេប​ថ្នាំ​ដើម្បី​បញ្ចុះ​គ្រាប់​សណ្តែក​នោះ​បាន​ទេ ។

ប្រភព​បន្ត​ថា ក្រោយ​មក ​លោក Zhang Bangshen បាន​យក​កូន​ស្វា​នោះ​ទៅ​លាង​ទឹក​សម្អាត​ផ្នែក​ខាង​ក្រោយ​របស់​វា (សម្អាត​គូទ) រួច​យក​អណ្តាត​របស់​គាត់​លិទ្ធ​គូថ​កូន​ស្វា​នោះ​រយៈ​ពេល​ជាង​១​ម៉ោង ទើប​គ្រាប់​សណ្តែក​ដី​ដែល​វា​​លេប​ចូល​ក្នុង​ពោះ​​នោះ​ចេញ​មកវិញ ។
នេះ​បញ្ជាក់​ថា គាត់​ពិត​ជា​មនុស្ស​​ដែល​ស្រឡាញ់​​សត្វ​ និង​មាន​ជំនាញ​ខាង​ថែ​ទាំ​សត្វ​ពិត​​ប្រាកដមែន ៕