រាជធានីភ្នំពេញ ៖ បុរសម្នាក់ស្រវឹងធ្លាក់ភ្នែកបើករថយន្តទៅបុករបាំងចែកផ្លូវ បណ្តាលឱ្យបាក់អស់១២ផ្ទាំង ហើយព្យាយាមបើករត់គេចតែត្រូវសមត្ថកិច្ចដេញតាមចាប់បានវិញភ្លាមៗ។ ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលាម៉ោង៧និង៥នាទីយប់ថ្ងៃទី២៦ មេសា ២០១២ តាមបណ្តោយផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុមានរថយន្តមួយគ្រឿងម៉ាក SURE ពណ៌ខ្មៅ មួយគ្រឿងបើកបរដោយបុរសស្រវឹងម្នាក់ពីលិចទៅកើតតាមបណ្តោយវិថីសហព័ន្ធរុស្ស៊ី ។ លុះមកដល់ចំណុចកើតហេតុស្រាប់តែរេចង្កូតទៅបុករបាំងចែកផ្លូវពេញទំហឹង បណ្តាលឱ្យបាក់អស់១២ផ្ទាំង។
ភ្លាមៗនោះរថយន្តបង្កបានព្យាយាមបើករត់គេចខ្លួន តែត្រូវសមត្ថកិច្ចដែលប្រចាំការនៅម្តុំស្ពានអាកាស ៧មករា នោះឃើញក៏ដេញតាមពីក្រោយរហូតដល់ផ្លូវលេខ២៥៧ សង្កាត់ទឹកល្អក់ទី១ ខណ្ឌទួលគោក ក្បែរផ្សារគីឡូម៉ែត្រលេខ៤ ទើបចាប់បាន ៕
ចែករំលែកព័តមាននេះ