ចាត់ទុកថាជាទិដ្ឋភាពដ៏កម្រជួបប្រទះមួយនៅលើលោក ដែលសុនខមួយគូពេលកំពុងរត់លេងនៅលើដងវិថី ស្រាប់តែសុនខញីត្រូវរថយន្តបុកងាប់ ។ អ្វីដែលធ្វើឱ្យគេភ្ញាក់ផ្អើលនោះគឺ សុនខឈ្មោលពេលដឹងថា សុនខញីជាដៃគូងាប់ វាមិនព្រមចាកចេញទៅណាទេ ដោយនៅនែបនិត្យ និងយកជើងបបោសអង្អែលខ្មោចសុនខញី បង្ហាញនូវក្តីអាឡោះអាល័យក្រៃលែង លាយឡំនឹងទឹកភ្នែកគួរឱ្យអាណិត ដ្បិតពួកវាគ្រាន់តែជាសត្វចិញ្ចឹមប៉ុណ្ណោះ ។
ទិដ្ឋភាពដ៏សង្វេគរបស់សត្វសុនខមួយគូនេះ បានកើតឡើងនៅក្រុង Quanzhou ខេត្ត Fujian ភាគអាគ្នេយ៍នៃប្រទេសចិន ។ នេះបើយោងតាមប្រភពពីគេហទំព័រ ដេលីម៉ែលរបស់អង់គ្លេស ចេញផ្សាយថ្ងៃទី២៣ មេសា ឆ្នាំ២០១២ កន្លងមក ។
ប្រភពបន្តថា បើតាមអ្នកស្រុករស់នៅទីនោះបាននិយាយថា សុនខមួយគូនេះប្រហែលជាវង្វេងម្ចាស់ ពួកវារស់នៅជាមួយគ្នាយូរយារណាស់មកហើយ នៅពេលដែលសុនខញីទៅណាមកណា គេឃើញសុនខឈ្មោលតែងតែដើរតាមពីក្រោយជានិច្ច ។
ដោយឡែក អ្នកដំណើរម្នាក់ដែលឃើញហេតុការណ៍នេះ បានទៅលើកខ្មោចសុនខញីនេះទៅដាក់នៅចិញ្ចើមផ្លូវ ហើយត្រូវសុនខឈ្មោលព្រុសគំរាមខាំទៀតផង ។ ក្រោយមកគាត់បានឃើញសុនខឈ្មោលនោះមិនព្រមចាកចេញទៅណាសោះ វានៅតែព្រុស និងលិទ្ធខ្មោចសុនខញី បង្ហាញនូវក្តីអាណិតអាសូរដល់ដៃគូរបស់វា រហូតដល់កម្មករបោសសម្អាតម្នាក់មកលើកខ្មោចសុនខញីដាក់ចូលក្នុងស្បោងយកទៅបោះចោល ៕
ចែករំលែកព័តមាននេះ