រាជធានីភ្នំពេញ ៖ កាលពីថ្ងៃទី៥-៦ មេសា ២០១២ អ្នកយកព័ត៌មានកោះសន្តិភាព និងក្រុមតារាចម្រៀង និងតន្ត្រីប្រពៃណីប្រមាណជិត១០នាក់ បានឡើងភ្នំតាថាវ ដើម្បីសួរសុខទុក្ខកងទ័ពជួរមុខដែលកំពុងឈរជើងការពារបូរណភាពទឹកដី ។ ឈ្លៀតឱកាសនោះលោកវណ្ណ ច័ន្ទរស្មី អ្នកយកព័ត៌មានកាសែតកោះសន្តិភាពបានជួបសម្ភាសន៍ជាមួយលោកវរសេនីយ៍ទោ សៀ រឿន ប្រធានវរសេនាតូចលេខ៣៧៥ ច្រកភ្នំតាថាវ។
លោកវរសេនីយ៍ទោ សៀ រឿន បានឱ្យដឹងថា ដំណើរជីវិតជាកងទ័ពលោកបានធ្វើដំណើរស្ទើរគ្រប់ខេត្ត-ក្រុងនៅតាមព្រំដែន ហើយចុងក្រោយលោកបានមកឈរជើងនៅភ្នំតាថាវ នាឆ្នាំ២០០៤ ដោយដឹកនាំកងទ័ពការពារបូរណភាពទឹកដីប្រមាណជាង៤០០នាក់ សព្វថ្ងៃកំពុងឈរជើងយ៉ាងរឹងមាំ។ លោកបន្តឱ្យដឹងថា ចាប់តាំងពីឆ្នាំ២០០៨ មក ពេលដែលកងទ័ពសៀមចូលលុកលុយបម្រុងដណ្តើមប្រាសាទព្រះវិហារ ភ្នំទ្រព្យ ភ្នំតាថាវ និងតំបន់ផ្សេងៗលោកបានដឹកនាំកងទ័ពក្រាញននៀលតតាំងការពារបូរណភាពទឹកដីយ៉ាងរឹងមាំបំផុត ទោះបីជាកងទ័ពសៀមបាញ់កាំភ្លើងត្បាល់ មកលើទីតាំងរបស់លោករាប់ពាន់គ្រាប់ក៏កងទ័ពរបស់យើងមិនតក់ស្លុត និងបានវាយបកទៅវិញយ៉ាងចាស់ដៃធ្វើឱ្យទ័ពសៀមខកបំណងក្នុងការដណ្តើមទីតាំងប្រាសាទព្រះវិហារ ។ លោកវរសេនីយ៍ទោ សៀ រឿន បន្តទៀតថា ក្រោយពីសៀមខកបំណងក្នុងការលុកលុយឈ្លានពាននៅតំបន់ប្រាសាទព្រះវិហារ ភ្នំពេទ្យ វាលឥន្ទ្រី ភ្នំតាថាវ សម្តេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដឹកនាំអភិវឌ្ឍន៍ និងផ្តល់អំណោយជាផ្លូវក្រាលបេតុងឡើងលើភ្នំតាថាវ បានយ៉ាងល្អ ដែលពេលនេះស្ថាបនារួចរាល់ហើយ ។ លោកថា ភ្នំតាថាវពេលនេះជិតក្លាយជាតំបន់ទេសចរណ៍ធម្មជាតិ និងវប្បធម៌ផងដែរ ។ លោកវរសេនីយ៍ទោ សៀ រឿន បន្តថា ឆ្លងកាត់អនុស្សាវរីយ៍ជូរចត់កន្លងមក សព្វថ្ងៃកងទ័ពកម្ពុជា និងកងទ័ពសៀមកំពុងចាប់ដៃគ្នាកសាងមិត្តភាពហើយសន្យាថា មិនឱ្យផ្ទុះអាវុធទៀតទេ។ លោកបញ្ជាក់ថា កងទ័ពកម្ពុជា និងកងទ័ពសៀមតែងតែជួបពិភាក្សា និងលេងកីឡាជាមួយគ្នារាល់ថ្ងៃ ព្រោះបន្ទាយកងទ័ពទាំងពីរមានចម្ងាយពីគ្នាតែ៣០ម៉ែត្រប៉ុណ្ណោះ ។
ជាចុងក្រោយលោកវរសេនីយ៍ទោ សៀ រឿន បានថ្លែងអំណរគុណចំពោះសម្តេចតេជោដែលបានខិតខំប្រឹងប្រែងកសាងអភិវឌ្ឍន៍ប្រទេសកម្ពុជាលើគ្រប់វិស័យ ជាពិសេសផ្លូវថ្នល់តាមក្រវាត់ព្រំដែនដែលពីមុនគ្មានផ្លូវសោះ តែឥឡូវមានផ្លូវក្រួសក្រហមផ្លូវបេតុង និងកៅស៊ូយ៉ាងរលោងងាយស្រួលនដល់ប្រជាជនធ្វើដំណើរទៅមក ពិសេសភ្ញៀវទេសចរជាតិ និងអន្តរជាតិ ៕
ចែករំលែកព័តមាននេះ