រាជធានីភ្នំពេញ ៖ ប្រធានាធិបតីចិន លោក ហ៊ូ ជិនតាវ និង ភរិយា ព្រមទំាងគណៈប្រតិភូជាន់ខ្ពស់អមដំណើរផ្តើមដំណើរបំពេញទស្សនកិច្ចផ្លូវរដ្ឋនៅកម្ពុជានៅវេលាថ្ងៃទី៣០ មីនានេះហើយ ។
យោងតាមសេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជាបានបញ្ជាក់អោយដឹងថា ដំណើរទស្សនកិច្ចផ្លូវរដ្ឋរបស់លោកប្រធានាធិបតីចិននៅពេលនេះធ្វើឡើងតាមការអញ្ជើញរបស់ព្រះមហាក្សត្រកម្ពុជាព្រះករុណាព្រះបាទសម្តេចព្រះបរមនាថ នរោត្តម សីហមុនី ។ អំឡុងពេលទស្សនកិច្ចនេះលោកហ៊ូ ជិនតាវ នឹងចូលក្រាបបង្គំគាល់ព្រះមហាក្សត្រកម្ពុជាជួបជាមួយសម្តេចប្រធានព្រឹទ្ធសភា ជា ស៊ីម សម្តេចប្រធានរដ្ឋសភា ហេង សំរិន និងជួបសម្តេចតេជោនាយករដ្ឋមន្រ្តី ហ៊ុន សែន ផងដែរ ។ ក្នុងដំណើរបំពេញទស្សនកិច្ចផ្លូវរដ្ឋនៅកម្ពុជានដែរ លោកប្រធានាធិបតីចិនហ៊ូ ជិនតាវ និងសម្តេចនាយករដ្ឋមន្រ្តី ហ៊ុន សែន នឹងអញ្ជើញចូលរួមជាអធិបតីក្នុងពិធីចុះហត្ថលេខាលើឯកសារមួយចំនួន ហើយបន្ទាប់មកនឹងមានចេញសេចក្តីថ្លែងការណ៍រួមមួយនៅចុងបញ្ចប់នៃដំណើរទស្សនកិច្ចនេះ ។
សេចក្តីជូនព័ត៌មានរបស់ក្រសួងការបរទេសដដែលក៏បានបញ្ជាក់អោយដឹងទៀតថា មុននឹងបិទបញ្ចប់នូវដំណើរទស្សនកិច្ចផ្លូវរដ្ឋនៅថ្ងៃទី២ មេសា ២០១២ខាងមុខនេះ លោកប្រធានាធិបតីនៃសាធារណរដ្ឋប្រជាមានិតចិន ហ៊ូ ជិនតាវ និងភរិយា លីង យ៉ុងឈីង នឹងអញ្ជើញទៅទស្សនាប្រាសាទអង្គរវត្តក្នុងខេត្តសៀមរាបផងដែរ ។គួរបញ្ជាក់ដែរថា លោកហ៊ូ ជិនតាវ កើតនៅថ្ងៃទី២១ ធ្នូ ១៩៤២ ក្នុងតំបន់តៃហ្សូ៊នៃខេត្តចាង-ស៊ូ និងបានសិក្សានៅថ្នាក់មធ្យមសិក្សានៅក្នុងខេត្តនេះ ។ ស្ថិតក្នុងគ្រួសារក្រីក្រដែលមានឪពុកជាអ្នកចូលរួមធ្វើបដិវត្តន៍ និងម្តាយស្លាប់តំាងពីអាយុ៧ឆ្នាំ កុមារាហ៊ូ ជិនតាវ ជាមនុស្សតស៊ូរៀនពូកែ និងរស់នៅក្រោមការទំនុកបម្រុងពីម្តាយមីង ។ក្នុងឆ្នាំ១៩៦៤ លោក ហ៊ូ ជិនតាវ បានបន្តការសិក្សាផ្នែកវិស្វករធារាសាស្រ្តនៅសាកលវិទ្យាល័យស៊ីងហួរ ក្នុងទីក្រុងប៉េកាំង ។ នៅអំឡុងពេលនោះហើយ ដែលលោកហ៊ូ ជិនតាវ បានចូលជាសមាជិកបក្សកុម្មុយនីស្តចិន ។ ក្រោយមកលោកបានបន្តការសិក្សាជំនាញជាន់ខ្ពស់បន្ថែមទៀតផ្នែករដ្ឋបាលសេដ្ឋកិច្ច និងយោធា ។ នៅឆ្នាំ១៩៦៥ លោក ហ៊ូ ជិនតាវ បានរៀបអាពាហ៍ពិពាហ៍ជាមួយលីវ យ៉ុងឈីង និងមានកូន២នាក់ប្រុស១ស្រី១។ ក្នុងឆ្នាំ២០០២ លោកហ៊ូ ជិនតាវ ត្រូវបានជ្រើសតាំងជាអគ្គលេខាធិការបក្សកុម្មុយនីស្តចិន និងក្លាយជាប្រធានាធិបតីចិននៅឆ្នាំ២០០៣ ។
ជាមនុស្សសំខាន់ទី៩ នៅក្នុងអគ្គលខាធិការនៃគណៈកម្មាធិការមជ្ឈិមបក្សកុម្មុយនីស្តចិន លោកហ៊ូ ជិនតាវ ត្រូវបានប្រជាជនចិនចាត់ទុកជាមនុស្សកំណែទម្រង់រដ្ឋ និងមានប្រជាប្រិយបំផុត ៕
ចែករំលែកព័តមាននេះ