កីឡាករប្រដាល់ទម្ងន់ធ្ងន់ពិភពលោករបស់អង់គ្លេសឌីរ៉េក ស៊ីសូរ៉ាត្រូវបានគេដកហូតអាជ្ញាប័ណ្ណប្រកួតរបស់ខ្លួនកាលពីថ្ងៃពុធសប្តាហ៍នេះដោយសារឈ្លោះប្រកែកគ្នាជាមួយដេវីដ ហេនៅក្នុងសន្និសីទសារព័ត៌មានមួយនៅប្រទេសអាល្លឺម៉ង់ ពោលគឺបន្ទាប់ពីរូបគេចាញ់ការប្រកួតជាមួយកីឡាករអ៊ុយក្រែនវីតាលី ឃ្លីតស្កូ នៅក្រុងមុយនិច កាលពីថ្ងៃទី១៨ ខែកុម្ភៈ កន្លងមក។
ក្នុងពេលថ្មីៗនេះ ស៊ីសូរ៉ាត្រូវបានគេហៅឱ្យទៅពន្យល់ប្រាប់ក្រុមប្រឹក្សាប្រដាល់អង់គ្លេស(BBBC)ពីមូលហេតុដែលរូបគេវាយគ្នាជាមួយកីឡាករដេវីដ ហេ បន្ទាប់ពីបញ្ចប់ការប្រកួតជាមួយវីតាលី ឃ្លីតស្កូ។ នៅក្នុងពេលថ្លឹងទម្ងន់ប្រកួត ស៊ីសូរ៉ាក៏បានប្រព្រឹត្តកំហុសឆ្គងមួយលើកផងដែរដោយបានទះកំផ្លៀងគូប្រកួតនិងស្តោះទឹកមាត់ដាក់មុខវ្ល៉ាឌីមៀ ឃ្លីតស្កូទៀតផង។
លោករ៉ូបឺត ស្ម៊ីត លេខាធិការរបស់ក្រុមប្រឹក្សាBBBCបានថ្លែងថា៖« កីឡាករ ឌីរ៉េក ស៊ីសូរ៉ា មិនបានប្រព្រឹត្តក្នុងឫកពាដោយប្រកាន់យកថាខ្លួនជាកីឡាករអាជីពម្នាក់នោះទេ។គេមិនត្រឹមតែធ្វើឱ្យអាប់ឱនដល់ខ្លួនឯងនោះទេ តែថែមទាំងដល់គ្រួសារទៀតផង។ សមាជិករបស់ក្រុមប្រឹក្សាBBBCទាំងអស់ចង់ធ្វើឱ្យកាន់តែច្បាស់ថា ទង្វើបែបនេះចេញពីកីឡាករម្នាក់ដែលមានអាជ្ញាប័ណ្ណប្រកួតត្រឹមត្រូវនិងមិនត្រូវបានអត់ឱនឱ្យទេ»។
យ៉ាងណាក៏ដោយ ស៊ីសូរ៉ាមានពេល១៤ថ្ងៃដើម្បីធ្វើការប្តឹងឧទ្ធរណ៍ទៅនឹងសេចក្តីសម្រេចខាងលើ។ បញ្ហានេះលោក Frank Warrenអ្នករៀបចំការប្រកួតរបស់ស៊ីសូរ៉ាបានបញ្ជាក់ថា កំពុងស្ថិតនៅក្រោមការពិចារណា។ បន្ទាប់ពីបញ្ចប់សវនាការ ស៊ីសូរ៉ាមិនបានធ្វើ អត្ថាធិប្បាយជាចំហណាមួយនោះទេ។ ប៉ុន្តែគេបាននិយាយតែ៣អក្សរប៉ុណ្ណោះនោះគឺ ៖«MGM, ខ្ញុំមកហើយ»។
នេះមានន័យថា គេនិយាយសំដៅទៅលើទីកន្លែងដែលគេនឹងប្រកួតលើកក្រោយៗគឺនៅសង្វៀន MGM Grand ក្នុងទីក្រុងឡាសវេហ្គាស សហរដ្ឋអាមេរិក។ ទោះជាយ៉ាងណា គេមិនដឹងថា តើគណៈកម្មការកីឡាប្រចាំរដ្ឋនេវ៉ាដាព្រមផ្តល់ឱ្យស៊ីសូរ៉ានូវអាជ្ញាប័ណ្ណប្រកួតនៅទីនោះដែរឬយ៉ាងណាទេ។ កាលពីថ្ងៃទី២៨ខែកុម្ភៈកន្លងទៅ ស៊ីសូរ៉ាត្រូវបានស្ថាប័នប្រដាល់ពិភពលោក WBCប្រកាសព្យួរការប្រកួតរបស់គេដោយមិនកំណត់ពេលព្រមទាំងបានដកហូតចំណាត់ថ្នាក់របស់គេក្នុងស្ថាប័ននេះផង។
ក្រៅពីនេះ ស្ថាប័នWBCនៅមានគម្រោងផាកពិន័យជាប្រាក់បន្ថែមទៀត តែករណីនេះនឹងត្រូវសម្រេចក្នុងសវនាការលើកក្រោយ។ ស្ថាប័ន WBCបានពិពណ៌នាទង្វើរបស់ស៊ីសូរ៉ាថា«អាក្រក់ជាងគេបំផុតមិនធ្លាប់មានពីមុនមក»៕
ចែករំលែកព័តមាននេះ