ខេត្តព្រះសីហនុ ៖ យ៉ាងហោចណាស់មនុស្សប្រុស-ស្រី ក្មេង ចាស់ ចំនួន១៩នាក់បានស្លាប់យ៉ាងអាណោចអាធ័មបំផុត និង៨នាក់ផ្សេងទៀតបានរងរបួស ក្នុងឧប្បត្តិហេតុគ្រោះថ្នាក់ចរាចរណ៍ដ៏មហារន្ធត់មួយ កាលពីវេលាម៉ោង១២និង១៥នាទីរសៀលថ្ងៃទី៤ មីនា នៅចំណុចផ្លូវចំណោតអូរត្រាវ ចន្លោះបង្គោលគីឡូម៉ែត្រលេខ២៤៤ និង២៤៥ ស្ថិតក្នុងភូមិពូធឿង ឃុំបិតត្រាំង ស្រុកព្រៃនប់ ។ នេះជាសោកនាដកម្មដ៏អាក្រក់បំផុតថ្មីមួយដែលបានកើតឡើង ខណៈពេលមេឃកំពុងភ្លៀងលើកំណាត់ផ្លូវជាតិលេខ៤ ដែលជាផ្លូវមមាញឹកបំផុតក្នុងការដឹកជញ្ជូនទាំងសម្ភារ និងអ្នកដំណើរ ។ កាលពីខែមុនក៏មានគ្រោះថ្នាក់បុកគ្នាឆេះជាអណ្តាតភ្លើង បានបង្កឱ្យមានការស្លាប់ និងរបួសជាច្រើននាក់ផងដែរ។
ឧប្បត្តិហេតុថ្មីនេះ តាមប្រភពព័ត៌មានជំហានដំបូងបានឱ្យដឹងថា បង្កឡើងដោយរថយន្តធុនធ្ងន់ដឹកដែកម៉ាក ASIA ពាក់ស្លាកលេខ ភ្នំពេញ 3B-0935 ដែលមានម្ចាស់ឈ្មោះលាង សុខង៉េង ភេទប្រុស បើកបរក្នុងទិសដៅពីខេត្តព្រះសីហនុ ឆ្ពោះទៅកាន់រាជធានីភ្នំពេញ ហើយបានបុកគ្នាពេញទំហឹងជាមួយរថយន្តទួរីស១៥កៅអី ម៉ាកសាន់យ៉ុង ពណ៌ស ពាក់ស្លាកលេខ ភ្នំពេញ 2C-9067 បើកបរក្នុងទិសដៅពីភ្នំពេញ ឆ្ពោះទៅខេត្តព្រះសីហនុ គឺបើកបរបញ្ច្រាសទិសគ្នា។យោងតាមប្រសាសន៍លោកព្រហ្ម ពៅ នាយការិយាល័យចរាចរណ៍ជើងគោកខេត្ត បានឱ្យដឹងថា ក្នុងឧប្បត្តិហេតុដ៏រន្ធត់នោះបណ្តាលឱ្យមនុស្សស្លាប់ចំនួន១៩នាក់ ក្នុងនោះស្រី៩នាក់ និងកុមារ៤នាក់ ។ ចំណែកអ្នករបួសធ្ងន់៨នាក់ ក្នុងនោះស្រី២នាក់ ។
ក្នុងចំណោមអ្នកស្លាប់នេះ គឺ១៨នាក់ជាអ្នកជិះក្នុងរថយន្តទួរីស និងអ្នកស្លាប់ម្នាក់ទៀតជាអ្នកបើកបររថយន្តដឹកដែក ។ ចំណែកអ្នករងរបួសធ្ងន់ និងមធ្យម៨នាក់ ក្នុងនោះក៏មានព្រូរថយន្តដឹកដែកម្នាក់ដែរ ។
ប្រភពដដែលបានបន្តថា រថយន្តទួរីស ពណ៌ស ដែលមានមនុស្សប្រុស-ស្រី ក្មេង ចាស់ ជិះចំនួន២៥នាក់នៅក្នុងរថយន្តនោះ ហើយដោយសារតែការបុកគ្នាយ៉ាងពេញទំហឹងបានធ្វើឱ្យតួរថយន្តត្រូវក្រពឹតដូចគេច្របាច់បញ្ចូលគ្នា គឺខូចខាតទាំងស្រុង រីឯរថយន្តធុនធ្ងន់ដឹកដែកត្រូវក្រឡាប់ផ្ងារជើងកៀបជាប់អ្នកបើកបរស្លាប់នៅក្នុងកាប៊ីន ឯព្រូរថយន្តបានរងរបួសធ្ងន់ដោយកៀបជាប់ដូចគ្នា ។ លោកនាយការិយាល័យបន្តថា ចំពោះសាកសពជនរងគ្រោះត្រូវបានសាច់ញាតិដឹកយកទៅរក្សាទុកនៅវត្តក្រោម ឯអ្នករងរបួសត្រូវបានបញ្ជូនទៅសម្រាកនៅគ្លីនិកឯកជនសេ តេ (គ្លីនិកឃ្លាំងលើ) ក្នុងនោះ២នាក់ត្រូវបានបញ្ជូនទៅព្យាបាលនៅប្រទេសវៀតណាម ។
យោងតាមសាក្សីនៅកន្លែងកើតហេតុបានរៀបរាប់ទាំងតក់ស្លុតថា នៅវេលាម៉ោងខាងលើ ពេលដែលមេឃកំពុងភ្លៀង គេបានឃើញរថយន្តដឹកដែកបើកចុះចំណោតមកយ៉ាងលឿន ពេលមកដល់ចំណុចកើេតហេតុនោះក៏បានរេចង្កូតធ្លាក់ផ្លូវទៅផ្នែកខាងស្តាំដៃ និងបុកបង្គោលថ្មចំនួន៤ដើម ដែលនៅអមផ្លូវ រួចក៏រេទៅឆ្វេងដៃវិញ (ឡើងថ្នល់) គឺពេលនោះហើយដែលបានបុករថយន្តទួរីសដែលកំពុងបើកបរលើផ្លូវសំដៅមកខេត្តព្រះសីហនុយ៉ាងពេញទំហឹង លាន់ឮសូរដូចរន្ទះបាញ់ ធ្វើឱ្យរថយន្តទាំងពីរក្រឡាប់បះជើងធ្លាក់ចូលក្នុងជង្ហុកផ្លូវជាតិជាហេតុបណ្តាលឱ្យអ្នកជិះក្នុងរថយន្តទួរីសស្លាប់ស្ទើរគ្មានសល់ ឯអ្នកបើកបររថយន្តធុនធ្ងន់នោះក៏ត្រូវកៀបស្លាប់ក្នុងកាប៊ីនរថយន្ត និងព្រូរថយន្តត្រូវរបួស ។ យោងតាមប្រភពពីសាច់ញាតិជនរងគ្រោះជិះក្នុងរថយន្តទួរីសសាន់យ៉ុង បានឱ្យដឹងថា អ្នករងគ្រោះដែលស្លាប់ និងរបួសយ៉ាងអាណោចអាធ័មនោះសុទ្ធតែជាសាច់ញាតិនឹងគ្នាទាំងអស់ ។
សាច់ញាតិដដែលឱ្យដឹងទៀតថា ជនរងគ្រោះដែលជិះក្នុងរថយន្តទួរីសមានគ្នា២៥នាក់ ធ្វើដំណើរចេញពីភូមិរំចេក ឃុំគិរីចុងកោះ ស្រុកគិរីវង់ ខេត្តតាកែវ សំដៅទៅខេត្តព្រះសីហនុ ដើម្បីចូលរួមពិធីមង្គលការបងប្អូននៅក្នុងភូមិ៤ សង្កាត់៤ ក្រុងព្រះសីហនុ ។ មង្គលការនេះពិសាភោជនាហារនៅថ្ងៃទី៥ មីនានេះ ។
រថយន្តទាំងពីរដែលបុកគ្នានិងត្រូវក្រឡាប់បះជើងក្បែរគ្នាត្រូវប៉ូលិសចរាចរជើងគោកខេត្តព្រះសីហនុ ស្ទូចយកទៅរក្សាទុកនៅការិយាល័យដើម្បីដោះស្រាយ ជុំវិញសោកនាដកម្មដ៏ធ្ងន់ធ្ងរបំផុតនេះ ។
សូមបញ្ជាក់ថា រថយន្តទួរីស ម៉ាកសាន់យ៉ុង បើកបរដោយឈ្មោះថុល ភេទប្រុស អាយុ៣៧ឆ្នាំ ជាអ្នករត់តាក់ស៊ី មានទីលំនៅក្នុងភូមិរំចេក ឃុំគិរីចុងកោះ ។ អ្នកធ្វើដំណើរលើរថយន្តរួមទាំងអ្នកបើកបរផង២៦នាក់។ អ្នករងរបួសធ្ងន់និងមធ្យមទាំង៨នាក់ក្នុងនោះអ្នកជិះក្នុងរថយន្តទួរីស ៧នាក់ និងព្រូឡានដឹកដែកម្នាក់ គឺ១-ឈ្មោះភក្តី ភេទប្រុស អាយុ២០ឆ្នាំ ២-ឈ្មោះសាំ រតណា ភេទស្រី អាយុ១៧ឆ្នាំ ៣-ឈ្មោះតែវ ផាណែត ភេទប្រុស អាយុ១៩ឆ្នាំ ៤-ឈ្មោះស៊ី ណា ភេទប្រុស អាយុ៣៧ឆ្នាំ ៥-ឈ្មោះជួន សុភ័ក្ត្រ ភេទប្រុស អាយុ១៥ឆ្នាំ ៦-ឈ្មោះឈល សោភា ភេទស្រី អាយុ១៤ឆ្នាំ ៧-ឈ្មោះអាវី ភេទប្រុស អាយុ១៨ឆ្នាំ ៨-ឈ្មោះស៊ីម រ៉ាវី ភេទប្រុស អាយុ២៣ឆ្នាំ ។ ប៉ូលិសឱ្យដឹងថា អ្នករបួសធ្ងន់២នាក់ ដែលបញ្ជូនទៅប្រទេសវៀតណមនោះ គឺរបួសផុងលលាដ៍ក្បាលនិងមិនដឹងថាអាចជួយជីវិតពីសេចក្តីស្លាប់ឬបែបណាទេ ៕
ចែករំលែកព័តមាននេះ