រាជធានីភ្នំពេញ ៖ មនុស្ស២នាក់រងរបួសធ្ងន់ និង២នាក់ទៀតរបួសស្រាល ខណៈពេលជិះម៉ូតូបុកគ្នានៅផ្លូវកែងលាន់ដូចរន្ទះមុខផ្ទះលេខ១៩ ផ្លូវលេខ២០៥កែង៣១០ ស្ថិតក្នុងភូមិ១០ សង្កាត់ទួលស្វាយព្រៃទី២ ខណ្ឌចំការមន កាលពីវេលាម៉ោង១១និង២០នាទីយប់ថ្ងៃទី១៨ កុម្ភៈ។
សាក្សីឃើញហេតុការណ៍បានឱ្យដឹងថា មុនពេលកើតហេតុ ម៉ូតូឌ្រីមសេ១២៥ ស៊េរី២០១១ ពណ៌ខ្មៅ ជិះគ្នា២នាក់ តាមបណ្តោយផ្លូវលេខ២០៥ ពីលិចទៅកើត ។ ចំណែកម៉ូតូសង់កូរ៉េ ពណ៌ទឹកក្រូច ជិះគ្នា២នាក់ដែរ តាមផ្លូវលេខ៣១០ ពីត្បូងទៅជើង ខណៈមកដល់ផ្លូវកែងម៉ូតូទាំងពីរបានបុកគ្នាពេញទំហឹងលាន់ដូចរន្ទះ បណ្ដាលឱ្យអ្នកជិះទាំងសងខាងផ្លោងទៅជាប់នឹងរបងមាត់ទ្វារចូលផ្ទះលេខ១៩តែម្តង ។
ប្រភពព័ត៌មានបន្ដទៀតថា ជនរងគ្រោះទាំង៤នាក់បានដួលបោកទៅនឹងរបងផ្ទះ និងខ្លះទៀតដួលនៅចិញ្ចើមផ្លូវ បណ្ដាលឱ្យរងរបួស ក្នុងនោះអ្នកបើកម៉ូតូឌ្រីមសេ១២៥សន្លប់ និងអ្នកបើកម៉ូតូសង់កូរ៉េរយះមុខមាត់ហូរឈាមស្រោចពេញផ្ទៃមុខ ឯអ្នកជិះពីក្រោយទាំងសងខាងរងរបួសស្រាល ។ ជនរងគ្រោះសន្លប់ត្រូវរថយន្ដសាមុយដឹកយកទៅសង្គ្រោះនៅគ្លីនិកឯកជន ចំណែកជនរងគ្រោះជិះម៉ូតូសង់កូរ៉េមិនព្រមឡើងរថយន្ដសាមុយទេ ដោយទូរស័ព្ទហៅបងប្អូនយកទៅមន្ទីរពេទ្យដោយខ្លួនឯងវិញ ៕
ចែករំលែកព័តមាននេះ