ខេត្តកណ្តាល ៖ ដើមជ្រៃមួយដើមដែលត្រូវបានគេគាស់រំលើងងាប់ទៅហើយនោះស្រាប់តែរស់ និងងើបឈរឡើងវិញធ្វើឱ្យប្រជាពលរដ្ឋនៅក្នុងភូមិកណ្តាល ឃុំសន្លុង ស្រុកខ្សាច់កណ្តាល ភ្ញាក់ផ្អើលនាំគ្នាទៅមើលភ្លូកទឹកភ្លូកដីមិនថាតែប្រជាពលរដ្ឋនៅក្នុងស្រុកនេះទេ សូម្បីតែប្រជាពលរដ្ឋដែលនៅឆ្ងាយៗក៏បានមកមើលហេតុការណ៍ដ៏ចំលែកនេះដែរ ។ ប្រជាពលរដ្ឋបានអុជធូបបន់ស្រន់បួងសួងតាមក្តីប្រាថ្នាជាហូរហែទៅតាមជំនឿរបស់ខ្លួន ។ ស្របពេលនោះក៏មានរៀបចំធ្វើពិធីបុណ្យចាំទទួលអ្នកមានជំនឿទាំងឡាយមកគោរពបូជាផងដែរ ។
ពាក់ព័ន្ធទៅនឹងហេតុការណ៍ដ៏ចំលែកនេះប្រជាពលរដ្ឋម្នាក់នៅក្នុងភូមិដែលមានជំនឿបានឱ្យដឹងថា ដើមជ្រៃនេះត្រូវបានគាស់រំលើងជាយូរមកហើយ ស្របពេលដែលរដ្ឋាភិបាលសាងសង់ផ្លូវជាតិលេខ៨ថ្មីជាមួយនឹងការសាងសង់ស្ពានព្រែកតាមាក់ ហើយនៅយប់ថ្ងៃសុក្រ ទី២៤ ធ្នូ ស្រាប់តែវាងើបឈរត្រង់រស់ឡើងវិញ ធ្វើឱ្យប្រជាជននៅក្នុងភូមិមានការភ្ញាក់់ផ្អើលនាំគ្នាទៅមើលទាំងព្រឹក ។ អ្នកខ្លះបានបន់ស្រន់សុំសេចក្តីសុខចំរើន មានទាំងការបូជាបច្ច័យ ទៀន ធូប ផ្កាឈូក និងចេកជាដើម ដោយយល់ថា «ជ្រៃមួយដើមនេះមានបារមីខ្ពស់ងាប់ហើយរស់វិញ» ។ ស្របពេលនោះប្រជាពលរដ្ឋនៅក្នុងភូមិក៏នាំគ្នាសង់រោងបុណ្យ និមន្តព្រះសង្ឃមកសូត្រមន្តនៅជិតដើមជ្រៃដែលល្បីថា ងាប់ហើយ រស់ឡើងវិញនេះ ។
ប្រភពដដែលបន្តឱ្យដឹងថា នៅថ្ងៃដំបូងមានប្រជាពលរដ្ឋមកពីគ្រប់ទិសទីទៅមើល ហើយបូជាបច្ច័យ។ ចំពោះបច្ច័យទាំងនោះបានចាត់ចែងនៅក្នុងកម្មវិធី ដូចជាជួលធុងបាស់សំរាប់ការរាំរែកចំនួនពីរយប់។ អ្នកដែលមានជំនឿបានទៅមើល និងធ្វើការបន់ស្រន់ជាហូរហែមិនដាច់ឡើយ សូម្បីតែអ្នកនៅរាជធានីភ្នំពេញខ្លះមានទាំងថ្នាក់ឯកឧត្តមមួយចំនួនផងនោះក៏ទៅបែបន់ផងដែរ។ អ្នកស្រីចន្ធី ជាអាជីវករម្នាក់នៅឃុំព្រែកតាមាក់បានទៅមើលដើមជ្រៃនោះដែរប្រាប់កោះសន្តិភាពថា គាត់ដឹងរឿងនេះតៗគ្នាពីគេមកដែរដោយល្បីថាដើមជ្រៃដែលងាប់ហើយរស់ឡើងវិញ ដូច្នេះគាត់ក៏ចង់មកឃើញផ្ទាល់ភ្នែក ។ គាត់បានអុជធូបបួងសួងដូចគេដូចឯងដែរ ព្រោះចង់បានសេចក្តីសុខ និងប្រាថ្នាឱ្យការលក់ដូររបស់គាត់កាន់តែដាច់ឡើងៗ។ គាត់បញ្ជាក់ថា អ្នកខ្លះបានយកសំបកជ្រៃនេះទៅត្រាំទឹកផឹកក្នុងជំនឿធ្វើឱ្យត្រជាក់ត្រជំក្នុងគ្រួសារ និងអាចជាជំងឺច្រើនមុខទៀតផង។
លោកលី ចំរើន មេភូមិកណ្តាលឱ្យដឹងថា ដើមជ្រៃនេះត្រូវបានកងវិស្វកម្មកសាងផ្លូវគាស់រំលើងដើម្បីធ្វើផ្លូវប្រហែល២ខែមកហើយ ។ មែកជ្រៃ និងដើមទាំងមូលត្រូវគេកាត់លក់ឱ្យឈ្មួញអស់ហើយ នៅសល់តែគល់ប្រហែលជាពីរម៉ែត្រប៉ុណ្ណោះ ។ ដើមជ្រៃនេះតាមលោកដឹងមានអាយុកាលប្រហែលជា១៥០ឆ្នាំមកហើយ ។ ចំពោះបាតុភូតដើមជ្រៃដួលរលំហើយអាចងើបឈរបានឡើងវិញនោះប្រហែលជាដោយសារឫសស្មែងខាងគល់ធំធ្ងន់ទើបធ្វើឱ្យវាងើបឈរត្រង់ឡើងវិញបាន ម្យ៉ាងប្រវែងដើមដែលកាត់សល់ពីគល់នៅខ្ចីដែរ ។ លោកទៀក ឃុន មេឃុំសន្លុងឱ្យដឹងថា «តាមពិតទៅជំនឿរបស់ប្រជាពលរដ្ឋចេះតែជឿហើយទៅលើរឿងនេះ តែបើពិនិត្យទៅលើលក្ខណៈជាក់ស្តែងវិញ គឺដើមជ្រៃនេះបានរលំទៅហើយ តែដោយសារគល់មានស្មែងឫសច្រើនដែលមានទំងន់ធ្ងន់ ហើយធំវាក៏ផ្ងារត្រង់ឡើងវិញ ។ ចំពោះជំនឿរបស់ប្រជាជនខ្ញុំមិនហ៊ានហាមឃាត់ទេ ព្រោះពួកគាត់ចង់បានសេចក្តីសុខ ដូច្នេះពួកគាត់ក៏នាំគ្នាមកពីទីជិតទីឆ្ងាយមកបន់ស្រន់ តែទោះបីជាយ៉ាងណារឿងនេះនឹងស្ងប់ស្ងាត់ទៅវិញជាមិនខាន» ។ តាមលោកតា លោកយាយដែលនៅប្រចាំការរោងបុណ្យក្បែរដើមជ្រៃនោះឱ្យដឹងថា នៅពេលខាងមុខនេះគំរប់៧ថ្ងៃ នឹងធ្វើបុណ្យរាប់បាត្រ ដល់ព្រះសង្ឃដើម្បីសុំសេចក្តីសុខ សេចក្តីចំរើនផង និងឧទ្ទិសផលបុណ្យបារមីរបស់ដើមជ្រៃនេះផង៕
ចែករំលែកព័តមាននេះ