ខេត្តបន្ទាយមានជ័យ ៖ ក្នុងថ្ងៃតែមួយយ៉ាងហោចណាស់ក៏មានឧប្បត្តិហេតុគ្រោះថ្នាក់ ចរាចរណ៍២ករណីកើតឡើង ដោយឡែកពីគ្នានៅស្រុកភ្នំស្រុកនិងស្រុកមង្គលបុរី ខេត្តបន្ទាយមានជ័យ បណ្តាលឱ្យមនុស្សម្នាក់ស្លា.ប់ និង២នាក់ទៀតរងរបួសធ្ងន់ ។
ខេត្តបន្ទាយមានជ័យ ៖ ក្នុងថ្ងៃតែមួយយ៉ាងហោចណាស់ក៏មានឧប្បត្តិហេតុគ្រោះថ្នាក់ចរាចរណ៍២ករណីកើតឡើង ដោយឡែកពីគ្នានៅស្រុកភ្នំស្រុកនិងស្រុកមង្គលបុរី ខេត្តបន្ទាយមានជ័យ បណ្តាលឱ្យមនុស្សម្នាក់ស្លាប់ និង២នាក់ទៀតរងរបួសធ្ងន់ ។
លោកវរសេនីយ៍ត្រីស៊ី ឌី អធិការនគរបាលស្រុកភ្នំស្រុកបានឱ្យដឹងថា នៅវេលាម៉ោង២ និង១៥នាទីរសៀលថ្ងៃទី៦ កុម្ភៈ ឆ្នាំ២០១២ នៅលើផ្លូវលំស្ថិតក្នុងភូមិស្វាយស ឃុំពន្លៃ ស្រុកភ្នំស្រុក មានគ្រោះថ្នាក់ចរាចរណ៍មួយកើតឡើងរវាងម៉ូតូបុកជាមួយគោយន្តកន្ត្រៃបណ្តាលឱ្យអ្នកបើកបរម៉ូតូរងរបួសយ៉ាងធ្ងន់ធ្ងរ ។ ជនរងគ្រោះឈ្មោះជុំ រំចង់ ភេទប្រុស អាយុ២១ឆ្នាំ នៅភូមិក្រសាំង ឃុំជប់វ៉ារី ស្រុកព្រះនេត្រព្រះ ខេត្តបន្ទាយមានជ័យ ។
លោកអធិការរូបនោះ បានបន្តថា មុនពេលកើតហេតុជនរងគ្រោះឈ្មោះជុំ រំចង់ បានចេញពីហូបការបើកម៉ូតូយ៉ាងលឿនពេលមកដល់កន្លែងកើតហេតុបានវាក់នឹងគោយន្តកន្ត្រៃដែលបើកចេញពីក្នុងភូមិឡើងមកលើថ្នល់ ។ ពេលនោះជនរងគ្រោះបានព្យាយាមគេចដែរតែគេចមិនផុតក៏បុកគោយន្តពេញទំហឹងបណ្តាលឱ្យបាក់ស្មងជើងខាងឆ្វេងត្រូវបានក្រុមគ្រួសារដឹកយកទៅព្យាបាលនៅមន្ទីរពេទ្យខេត្តបាត់ដំបង ។
មួយករណីផ្សេងទៀត នៅស្រុកមង្គលបុរី កាលពីវេលាម៉ោង៨យប់ ថ្ងៃទី៦ កុម្ភៈ នេះដែរ មានគ្រោះថ្នាក់ចរាចរណ៍នៅលើផ្លូវជាតិលេខ៥ ស្ថិតក្នុងភូមិសាស្រ្ត ភូមិពោធិរៀង ឃុំអូរប្រាសាទ ស្រុកមង្គលបុរី រវាងរថយន្តទំនើបបុកជាមួយម៉ូតូ បណ្តាលឱ្យស្លាប់ម្នាក់ និងម្នាក់ទៀតត្រូវរងរបួសធ្ងន់ ។
លោកវរសេនីយ៍ត្រីយ៉ត សុផល អធិការនគរបាលស្រុកមង្គលបុរីបានឱ្យដឹងថា ជនរង គ្រោះក្នុងហេតុការណ៍គ្រោះថ្នាក់ចរាចរណ៍ខាងលើឈ្មោះយិន សឿន ភេទប្រុស អាយុ៦៤ឆ្នាំ នៅភូមិព្រៃចង្ហារលិច ឃុំបន្ទាយនាង ស្រុកមង្គលបុរីជាអ្នកបើកបរម៉ូតូស្លាប់នៅនឹងកន្លែងកើតហេតុ និងអ្នករួមដំណើរឈ្មោះរុំ នី ភេទប្រុស អាយុ៣២ឆ្នាំ នៅភូមិជាមួយគ្នារបួស
ធ្ងន់ ។ មុនពេលកើតហេតុរថយន្តបានបើកពីត្បូងទៅជើងក្នុងល្បឿនលឿន លុះដល់កន្លែងកើតហេតុបានបុកម៉ូតូបើកឆ្លងផ្លូវក្នុងទិសដៅពីកើតទៅលិចពេញមួយទំហឹងតែម្តង ។
លោកវរសេនីយ៍ទោឈឿម សុផុន នាយការិយាល័យនគរបាលចរាចរជើងគោកខេត្ត បានឱ្យដឹងថា រថយន្តបន្ទាប់ពីបង្កគ្រោះថ្នាក់បានបើករត់គេចរហូតដល់ស្រុកអូរជ្រៅ ដោយឃើញរថយន្តរបស់សមត្ថកិច្ចដេញតាមប្រផាប់ចាប់ពភីងអ្នកបើកបរ និងអ្នកជិះក្នុងរថយន្ត បានបើកទ្វាររត់គេចខ្លួនចោលរថយន្តម៉ាកកាមរីបាឡែន ពណ៌ខ្មៅ ដែលបច្ចុប្បន្នរថយន្តនេះកំពុងរក្សាទុកនៅការិយាល័យចរាចរណ៍ខេត្ត។
លោកនាយការិយាល័យបានបញ្ជាក់ថា តាមការត្រួតពិនិត្យសម្ភារនៅក្នុងរថយន្តក្រោមការចូលរួមពីសំណាក់លោកផាន់ ភីរម្យ ព្រះរាជអាជ្ញារងអមសាលាដំបូងខេត្តបន្ទាយមានជ័យ នាព្រឹកថ្ងៃទី៧ កុម្ភៈ យើងបានរកឃើញសម្ភារមួយចំនួនដូចជារូបថត និងសម្លៀកបំពាក់របស់នគរបាលការពារព្រំដែនតែមិនដឹងថា ជារបស់ម្ចាស់រថយន្តឬអ្នកបើកបរនោះទេ ។ ពេលនេះ សមត្ថកិច្ចកំពុងតែធ្វើការស្រាវជ្រាវ ហើយមិនយូរមិនឆាប់គង់តែសមត្ថកិច្ចរកមុខអ្នកបើកបរឃើញជាមិនខាន ៕
ចែករំលែកព័តមាននេះ