ខេត្តព្រៃវែង ៖ ប្រជាពលរដ្ឋរស់នៅតាមបណ្តាស្រុកមួយចំនួនក្នុងខេត្ត មានស្រុកស្វាយអន្ទរ បាភ្នំ កំពង់ត្របែក និងស្រុកព្រះស្តេច បច្ចុប្បន្នកំពុងជួបបញ្ហាខ្វះទឹកប្រើប្រាស់ជាលក្ខណៈ គ្រួសារ ក៏ដូចជាប្រើប្រាស់ក្នុងការបូមដាក់ស្រូវប្រាំង ឬស្រោចផលដំណាំ។
ខេត្តព្រៃវែង ៖ ប្រជាពលរដ្ឋរស់នៅតាមបណ្តាស្រុកមួយចំនួនក្នុងខេត្ត មានស្រុកស្វាយអន្ទរ បាភ្នំ កំពង់ត្របែក និងស្រុកព្រះស្តេច បច្ចុប្បន្នកំពុងជួបបញ្ហាខ្វះទឹកប្រើប្រាស់ជាលក្ខណៈគ្រួសារ ក៏ដូចជាប្រើប្រាស់ក្នុងការបូមដាក់ស្រូវប្រាំង ឬស្រោចផលដំណាំ។
លោកម៉ម សុភាត មេភូមិកន្លោង ក្នុងឃុំទឹកថ្លា ស្រុកស្រាយអន្ទរ បានឱ្យដឹងថា ប្រជាពលរដ្ឋក្នុងភូមិលោកដែលមានចំនួន១៤០គ្រួសារ កំពុងប្រឈមនឹងការគ្មានទឹកប្រើប្រាស់ជាលក្ខណៈគ្រួសារប្រចាំថ្ងៃ មូលហេតុដោយសារអណ្តូងដែលពួកគាត់បានប្រើប្រាស់ជាលក្ខណៈ គ្រួសារដែលមានជម្រៅពី៣០ទៅ៤០ម៉ែត្រ មួយចំនួនធំលែងចេញទឹក សប់ក៏មិនចេញ ទោះជាបាញ់ខ្យល់បញ្ចូលក៏លែងចេញ ។ លោកបន្តថា ក្នុងភូមិកន្លោងរបស់លោកមានអណ្តូង៧៨អណ្តូងដែលនៅប្រើប្រាស់បានមានចំនួនតិចតួចបំផុត ដែលក្នុង១០គ្រួសាររួមគ្នាមកប្រើប្រាស់អណ្តូងតែមួយដែលនៅចេញ ដោយសារអណ្តូងនោះគេបុកក្នុងជម្រៅពី៧០ម៉ែត្រ ទៅ៨០ម៉ែត្រ ហើយចំខ្សែទឹក។
លោកតាក់ រ៉ន ដែលរស់នៅក្នុងភូមិនោះបញ្ជាក់ថា ប្រជាពលរដ្ឋជាង១០គ្រួសារមកយកទឹកពីអណ្តូងរបស់គាត់ទៅប្រើប្រាស់ ចាប់តាំងពីម៉ោង៣ទៀបភ្លឺ រហូតដល់ម៉ោង៧-៨ព្រឹកទើបស្ងាត់។ លោកឆូវ ឌុំ មេឃុំទឹកថ្លាក៏បានឱ្យដឹងដែរថា ប្រជាពលរដ្ឋក្នុងឃុំនេះមានចំនួន២.៣០០គ្រួសារ មានអណ្តូងប្រើប្រាស់ស្ទើរគ្រប់គ្រួសារ ប៉ុន្តែបច្ចុប្បន្នមានភូមិចំនួន២ គឺភូមិកន្លោង១ និងភូមិព្រៃស្វាយ កំពុងជួបបញ្ហាខ្វះទឹកប្រើប្រាស់ ដោយសារអណ្តូងដែលពួកគាត់បុកប្រើប្រាស់ជាលក្ខណៈគ្រួសារនោះសប់លែងចេញ។
ចំណែកប្រជាបលរដ្ឋនៅស្រុកបាភ្នំក៏ដូចជាប្រជាពលរដ្ឋនៅក្នុងស្រុកកំពង់ត្របែកដែរ ពួកគាត់បានត្អូញត្អែរថា សព្វថ្ងៃពួកគាត់ក៏កំពុងជួបបញ្ហាខ្វះទឹកប្រើប្រាស់ដែរ ដោយសារបឹង បួ រីងអស់ ឯអណ្តូងទឹកក៏សប់លែងសូវចេញតិចៗ ដូច្នេះពួកគាត់មានការព្រួយបារម្ភយ៉ាងខ្លាំងចំពោះបញ្ហាទឹកនៅថ្ងៃខាងមុខ។ ឯប្រជាពលរដ្ឋរស់នៅក្នុងស្រុកព្រះស្តេចទាំងមូល កំពុងជួបបញ្ហាខ្វះទឹកប្រើប្រាស់ជាលក្ខណៈគ្រួសារ ក៏ដូចជាសម្រាប់ប្រើប្រាស់ធ្វើស្រែយ៉ាងធ្ងន់ធ្ងរជាទីបំផុត ដោយសារនៅក្នុងភូមិសាស្ត្រស្រុកពុំសម្បូរបឹង-ទន្លេ ប្រជាពលរដ្ឋធ្វើស្រែពឹងផ្អែកលើការបុកអណ្តូងបូមយកទឹក ឥឡូវអណ្តូងលែងសូវចេញហើយ គឺចេញតិចបំផុត។
ព្រះចៅអធិការវត្តទួលពោធិអង្គ ឬវត្តពោធិតាតន់ ហៅវត្តថ្មី នាមស សុវត្តិ មានថេរដីកាថា បច្ចប្បន្នប្រជាពលរដ្ឋដែលរស់នៅជុំវិញវត្តនេះ កំពុងនូវការខ្វះខាតទឹកប្រើប្រាស់ទាំងស្រុង ដោយអណ្តូងពួកគាត់លែងចេញ ក៏នាំគ្នាមកប្រើប្រាស់អណ្តូងនៅក្នុងវត្តនេះ ។ ជាក់ស្តែងចាប់តាំងពីខែវិច្ឆិកា-ធ្នូ ឆ្នាំ២០១១ រហូតមកដល់ខែមករា នេះ បញ្ហាខ្សត់ទឹកកំពុងតែចោទឡើង ដែលគ្រប់គ្នាចាប់ពីម៉ោង៣ទៀបភ្លឺ រហូតដល់ម៉ោង៨ព្រឹក នាំគ្នាមកជញ្ជូនទឹក លុះដល់ល្ងាចចាប់ពីម៉ោង៥ រហូតដល់ម៉ោង៧ទៅ៨យប់ ប្រជាពលរដ្ឋដែលនៅជុំវិញវត្ត នាំគ្នាមកយកទឹកពីអណ្តូងវត្តទៅប្រើប្រាស់។
លោកអ៊ុក សុផល អភិបាលរងស្រុកព្រះស្តេចមានប្រសាសន៍ថា លោកបានដឹងពីបញ្ហានេះច្បាស់ណាស់ ហើយមានការព្រួយបារម្ភយ៉ាងខ្លាំង ព្រោះនៅក្នុងស្រុកព្រះស្តេចទាំងមូលមាន១១ឃុំ ដែលត្រូវប្រឈមនឹងការអត់ទឹកប្រើប្រាស់ ក្នុងនោះអត់ទាំងស្រុងមានឃុំអង្គររាជ្យ ឃុំព្រះស្តេច និងឃុំបឹងដោល ដែលអណ្តូងស្នប់បូមលែងចេញ ក្រៅពីនេះនៅចេញតិចៗ។ លោកបន្តថា ស្រុកព្រះស្តេចគ្មានបឹង-ទន្លេដែលជាប្រភពទឹកក្នុងការធានានូវការប្រើប្រាស់ជាលក្ខណៈគ្រួសារ និងធ្វើស្រែចម្ការទេ ដូច្នេះលោកបានធ្វើការប្រជុំផ្សព្វផ្សាយដល់ប្រជាពលរដ្ឋ ដើម្បីឱ្យពួកគាត់ព្យាយាមជីកស្រះ សម្រាប់ស្តុបទឹកទុកប្រើប្រាស់ជាការជួយសម្រួលពីការបុកអណ្តូង១ ដែលមានតម្លៃពី៨០ម៉ឺនទៅ១លាន២សែនរៀល បុកអស់លុយហើយប្រើមិនបានគ្រប់គ្រាន់ ដោយសារអណ្តូងចេញទឹកតិចពេក ឬមិនចេញតែម្តង។
ជុំវិញបញ្ហាខាងលើនេះ ទាក់ទងទៅនឹងស្ថាប័នទាំង៤មាន មន្ទីរធនធានទឹក មន្ទីរឧស្សាហកម្មរ៉ែ និងថាមពល មន្ទីរបរិស្ថន និងមន្ទីរអភិវឌ្ឍជនបទ ក្រុមមន្ត្រីនិយាយប្រហាក់ប្រហែលគ្នាថា ជាការពិតណាស់ចាប់តាំងពីឆ្នាំ១៩៨៥ រហូតដល់ឆ្នាំ១៩៩០ ទឹកនៅក្រោមដីមានជម្រៅពី៥,៥០ម៉ែត្រ។ ទៅ៦,៥ម៉ែត្រ មកដល់ឆ្នាំ២០១០ រហូតដល់ឆ្នាំ២០១២នេះ ទឹកនៅក្រោមដីមានជម្រៅពី៧មែ៉ត្រ រហូតដល់៩,៣០ម៉ែត្រទៅតាមតំបន់ មានន័យថា ទឹកចេះតែមានជម្រៅជ្រៅទៅៗ ធ្វើឱ្យតំបន់មួយចំនួនប្រឈមនឹងការខ្វះទឹកប្រើប្រាស់ជាលក្ខណៈគ្រួសារ ក៏ដូចជាសម្រាប់បូមប្រើប្រាស់ធ្វើស្រែ។ ពេលនេះ ក្រុមមន្ត្រីជំនាញកំពុងចុះទៅពិនិត្យជាក់ស្តែង ដើម្បីងាយស្រួលក្នុងការរកវិធីដោះស្រាយ៕
ចែករំលែកព័តមាននេះ