ខេត្តព្រៃវែង ៖ នៅក្នុងភូមិអន្លង់ចា ឃុំព្រះស្តេច ស្រុកព្រះស្តេច មានមេគោ១ក្បាលកើតកូនមកមានភាពចម្លែកមុខនិងក្បាលដូចមនុស្ស។ ទោះបីជាបែបណា កូនគោចម្លែកនេះកើតមកក៏ងាប់ទៅវិញ ។
លោកឈុន សឿន អាយុ៤០ឆ្នាំ ជាម្ចាស់គោនិយាយថា គាត់មានគោមេ២ក្បាល ហើយមេគោ១ក្បាលបានកើតកូនមកជាលើកទី២ នៅថ្ងៃទី៩ មករា ស្រាប់តែចម្លែកព្រោះដងខ្លួននិងជើងជាគោធម្មតា តែដោយឡែកក្បាលនិងមុខមានសណ្ឋានប្រហាក់ប្រហែលមនុស្សទៅវិញ ។ កូនគោនេះក៏មានសក់ដូចសក់មនុស្សក្មេងកើតមកអាយុ២ឆ្នាំ មានភ្នែកតែម្ខាងស្តាំ ខាងឆ្វេងខ្វាក់ ។ រីឯមាត់ដូចមាត់មនុស្សហើយមានធ្មេញ៣ទៀតផង ។ ដោយឡែកមេគោនេះ កាលពីកូនលើកទី១ មានលក្ខណៈជាគោធម្មតា ។
ស្ត្រីម្ចាស់គោឈ្មោះញឹម ស្រីពៅ អាយុ៤០ឆ្នាំ ក៏បានឱ្យដឹងថា កាលណោះគាត់យល់សប្តិឃើញ មានគេឱ្យគោមេ១ក្បាល យកទៅជល់ភ្នាល់នឹងដំរីសីល១ក្បាល ដោយគេប្រាប់ថាបើជល់ឈ្នះនឹងបានរង្វាន់ធំ តែបើចាញ់ច្បាស់ជាងាប់ធ្លាក់ទៅនរកមិនខាន ។ ព្រលឹងគាត់ក៏យកកូនគោមេ១ក្បាលនោះទៅជល់នឹងដីរី លុះជល់ទៅក៏ចាញ់ដំរី ហើយគោនោះពេលកំពុងជល់ក្លាយខ្លួនជាក្របីឈ្មោល លុះពេលជល់ចាញ់បានក្លាយជាក្របី១កំណាត់ និងសេះ១កំណាត់ហើយក៏រលាយរូបបាត់ទៅ ។
ទាក់ទងនឹងការយល់សប្តិនេះគាត់មិនចាប់អារម្មណ៍ទេ លុះកូនគោកើតមកក៏ស្រាប់តែមានរូបរាងចម្លែកបែបនេះអ្នកភូមិនាំគ្នាផ្អើលមើលគ្រប់ៗគ្នា តែគាត់មានការនឹកអាណិតកូនគោចម្លែកពេលងាប់គាត់បានធ្វើសង្ឃទានឱ្យមួយព្រឹកផងដែរ ៕
ចែករំលែកព័តមាននេះ