លោកនាយកក្រុមហ៊ុនម្នាក់កាចដូចខ្លា មួយថ្ងៃៗ បើមិនបានជេរបញ្ចោរថ្នាក់ក្រោមលេបបាយអត់ចូលទេ ។ ថ្ងៃមួយលោកនាយកក្រុមហ៊ុនរូបនោះដឹងក្លិនថ្នាក់អគ្គនាយកក្រុមហ៊ុនត្រៀមចុះស្រាវជ្រាវ ដើម្បីកែសម្រួលក្នុងជួរថ្នាក់ដឹកនាំឡើងវិញ ក៏បើកការប្រជុំបុគ្គលិកកម្មករទាំងអស់ក្នុងក្រុមហ៊ុន ៖
-ថ្ងៃនេះខ្ញុំសូមជូនដំណឹងដល់បងប្អូនទាំងអស់ថា ថ្នាក់អគ្គនាយកក្រុមហ៊ុនជិតចុះមកស្រាវជ្រាវដើម្បីកែសម្រួលការងារឡើងវិញ ។ ដូច្នេះខ្ញុំសូមផ្តាំ បើថ្នាក់លើសួរថាម៉េចក៏ដោយ សូមឆ្លើយដូចគ្នាថា ខ្ញុំពេញចិត្តណាស់, ឮទេ?
ទាំងអស់គ្នាងក់ក្បាល និងឆ្លើយបាទ, ចាស…លាន់ទ្រហឹង ។ លោកនាយកញញឹមពេញចិត្ត ព្រោះយល់ថា ថ្នាក់លើពិតជាចុះមកស្ទាបស្ទង់ការដឹកនាំរបស់ខ្លួនជាបឋម, ដូច្នេះឮពាក្យ «ខ្ញុំពេញចិត្តណាស់!» មុខជាឱ្យខ្លួនធ្វើនាយកបន្តទៀតមិនខាន ។ ដឹងអីថ្នាក់លើមិនបានសួរបុគ្គលិកកម្មករពីចរិត និងការដឹកនាំរបស់នាយកក្រុមហ៊ុនឯណា, ក្រោយពេលដើរពិនិត្យការងាររួច បើកការប្រជុំមនុស្សក្នុងក្រុមហ៊ុន ព្រមទាំងសួរ ៖
-បើពួកខ្ញុំប្តូរនាយកក្រុមហ៊ុន តើបងប្អូនយល់យ៉ាងណាដែរ?
ពួកបុគ្គលិកកម្មករដែលទន្ទេញចាំមាត់ពាក្យសម្រាប់ឆ្លើយរួចហើយ ឮសួរភ្លាមឆ្លើយព្រមគ្នា ៖
-ខ្ញុំពេញចិត្តណាស់!
ចែករំលែកព័តមាននេះ