រាជធានីភ្នំពេញ ៖ រថយន្តពណ៌ត្រេអ៊ីមួយគ្រឿង ពាក់ស្លាកលេខខេមរភូមិន្ទ បានក្រឡាប់ខណៈបើកចាក់កួនៅចំណុចកែងមហាវិថីម៉ៅសេទុង និងមហាវិថីព្រះនរោត្តម ស្ថិតក្នុងសង្កាត់ទន្លេបាសាក់ ខណ្ឌចំការមន កាលពីវេលាម៉ោង៤និង៤០នាទីរសៀលថ្ងៃទី១៤ ធ្នូ ។ ទោះជាយ៉ាងណា គ្រោះថ្នាក់នេះមិនបណ្តាលឱ្យមានមនុស្សណាម្នាក់រងរបួសធ្ងន់ធ្ងរឡើយ តែសម្ភារនៅក្នុងរថយន្តមានតុ កៅអី សម្រាប់រៀបចំពិធីត្រូវខូចខាតអស់់មួយចំនួន ។
តាមប្រភពព័ត៌មានបានឱ្យដឹងថា រថយន្តមួយគ្រឿងនេះបើកបរលើមហាវិថីម៉ៅសេទុង ក្នុងទិសដៅពីលិចទៅកើត លុះទៅដល់មហាវិថីព្រះនរោត្តមក៏បត់ទៅទិសខាងជើង ស្រាប់តែក្រឡាប់ផ្ងារពោះពេលបត់រថយន្តនោះតែម្តង ។ សូមបញ្ជាក់ថា រថយន្តដែលជួបហេតុការណ៍គ្រោះថ្នាក់នេះ ជារថយន្តយោធានៅសមរភូមិមុខព្រះវិហារ ដែលដឹកតុ កៅអី និងមន្ត្រីយោធាទៅខេត្តព្រះវិហារដើម្បីរៀបចំពិធីជប់លៀង ហើយក៏ជួបហេតុការណ៍គ្រោះថ្នាក់តែម្តង ។
ករណីគ្រោះថ្នាក់នេះ សមត្ថកិច្ចអនុញ្ញាតឱ្យក្រុមមន្ត្រីយោធារករថយន្តផ្សេងមកផ្ទេរហើយស្ទូចរថយន្តដែលក្រឡាប់យកទៅជួសជុលដើម្បីយកទៅប្រើប្រាស់នៅអង្គភាពវិញ ៕
ចែករំលែកព័តមាននេះ