ពស់ខាំខ្លាចពេទ្យកាត់ជើងទុកព្យាបាលគ្រូខ្មែរបានជាងមួយខែស្លាប់

ថ្ងៃទី ២៧ ខែ វិច្ឆិកា ឆ្នាំ ២០១១

ម៉ោង ០១:៣០

ខេត្តពោធិ៍សាត់ ៖ មកដល់សម័យកាលនេះ ហើយនៅតែមានបងប្អូនប្រជាពលរដ្ឋមួយចំនួនជឿជាក់លើគ្រូបុរាណខ្មែរជាជាងគ្រូពេទ្យសម័យទំនើប ទោះបីដឹងថា គ្រូខ្មែរជាការផ្សងព្រេង ហើយគ្រូពេទ្យគេមានថ្នាំព្យាបាលបែបវិទ្យាសាស្ត្រក៏ដោយ។ ជាក់ស្ដែងបុរសម្នាក់រស់នៅភូមិថ្លុកដង្កោ ឃុំផ្ទះរុង ស្រុកភ្នំក្រវាញ ខេត្តពោធិ៍សាត់ កូនរបស់គាត់ត្រូវពស់ពភ្លាក់ខាំ គាត់មិនយកទៅមន្ទីរពេទ្យព្យាបាលទេ បែរជាទុកព្យាបាលនៅគ្រូបុរាណខ្មែរក្នុងភូមិរហូតដល់កូនស្លាប់ ទើបនាំគ្នាយំសោកស្ដាយ។

ជនរងគ្រោះឈ្មោះស៊ឹម ឆុន ភេទប្រុស អាយុ២១ឆ្នាំ ត្រូវពស់ខាំជាងមួយខែមកហើយ ប៉ុន្តែទើបតែស្លាប់នៅថ្ងៃទី២៥ វិច្ឆិកា ២០១១ នេះទេ ខណៈពេលជំងឺកាន់តែធ្ងន់ធ្ងរ ទើបសម្រេចចិត្តចុងក្រោយយកទៅមន្ទីរពេទ្យ ប៉ុន្តែវាហួសពេលទៅហើយ។ លោកអ៊ាម ស៊ឹម អាយុ៥២ឆ្នាំ ជាឪពុកជនរងគ្រោះបានរៀបរាប់ប្រាប់ថា កាលពីខែមុន (មិនចាំថ្ងៃ) លោកនិងកូនប្រុស២នាក់ បានបររទេះទៅរកឈើគ្រញូងក្នុងព្រៃភ្នំ ដើម្បីបានបន្តិចបន្តួចគ្រាន់ដោះស្រាយជីវភាព។ ទៅដល់ចំណុចអូរបុកអង្ករក៏សម្រាកនៅទីនោះ លុះព្រឹកឡើង ទើបនាំគ្នាដើររកឈើគ្រញូង។

ពួកគាត់បានដើររកពេញមួយថ្ងៃរហូតដលម៉ោង៤រសៀល ស្រាប់តែឮសំឡេងកូនប្រុសរបស់គាត់ឈ្មោះឆុន (ជនរងគ្រោះ) ស្រែកឲ្យជួយថា ពស់ពភ្លាក់ខាំជើង។ ភ្លាមៗនោះគាត់ដើរទៅឃើញកូនកំពុងចុកននៀលក៏គ្រាមកឲ្យដេកក្នុងរោងរកថ្នាំបុរាណស្ងោរឲ្យផឹក លុះព្រឹកឡើង ទើបដឹកមកផ្ទះ។ គាត់មិនបានយកកូនទៅព្យាបាលនៅមន្ទីរពេទ្យទេ ដោយសារមានគេនិយាយថា បើយកទៅពេទ្យ ពេទ្យនឹងកាត់ជើងចោល។ ឮដូច្នេះគាត់ខ្លាចកូនពិការក៏ទុកព្យាបាលគ្រូបុរាណខ្មែរក្នុងភូមិសិន បានជាងមួយខែក៏សម្រេចចិត្តនាំកូនទៅមន្ទីរពេទ្យបង្អែកខេត្ត ប៉ុន្តែយឺតពេលទៅហើយ លុះដេកព្យាបាលបាន៣យប់មកដល់ថ្ងៃទី២៥ វិច្ឆិកា ២០១១ វេលាម៉ោង៤ទៀបភ្លឺក៏ស្លាប់ទៅ ៕

អត្រាប្តូរប្រាក់

អត្រាប្តូរប្រាក់ផ្សេងទៀត