ខេត្តពោធិ៍សាត់ ៖ មន្ត្រីនគរបាលជាតិខេត្តពោធិ៍សាត់ចំនួ១១៨រូបត្រូវក្រសួងមហាផ្ទៃបំពាក់ឋានន្តរស័ក្តិ កាលពីថ្ងៃទី២៤ វិច្ឆិកា ២០១១ ក្រោមអធិបតីភាពលោកឧត្តមសេនីយ៍ទោ ដួង សារឿន អនុប្រធាននាយកដ្ឋានបុគ្គលិកក្រសួងមហាផ្ទៃ និងលោកខូយ សុខា អភិបាលខេត្ត។
លោកវរសេនីយ៍ទោ កៅ មុយឃាង នាយរងការិយាល័យបុគ្គលិករាជធានី-ខេត្តបានអានប្រកាសរបស់ក្រសួងមហាផ្ទៃ និងសេចក្តីសម្រេចរបស់អគ្គស្នងការដ្ឋាននគរបាលជាតិក្នុងការតែងតាំងមុខតំណែង និងផ្ទេរភារកិច្ចមន្ត្រីនគរបាលប៉ុស្តិ៍មួយចំនួន។ ដោយឡែកមន្ត្រីនគរបាលជាតិខេត្តពោធិ៍សាត់ដែលធ្វើពិធីបំពាក់ឋានន្តរស័ក្តិនេះមានចំនួន១១៨រូប ក្នុងនោះថ្នាក់វរសេនីយ៍ទោ ២រូប វរសេនីយ៍ត្រី១១រូប ថ្នាក់អនុសេនីយ៍ឯក ៣០រូប អនុសេនីយ៍ទោ២៥រូប អនុសេនីយ៍ត្រី២២រូប និងព្រិន្ទបាលឯក២៩រូប។
លោកឧត្តមសេនីយ៍ទោ ដួង សារឿន អនុប្រធាននាយកដ្ឋានបុគ្គលិកមានប្រសាសន៍ថា នគរបាលជាតិមានតួនាទីយ៉ាងសំខាន់ក្នុងការការពារសន្តិសុខ សណ្តាប់ធ្នាប់ សង្គម ដូច្នេះត្រូវស្មោះត្រង់នឹងជាតិ សាសនា ព្រះមហាក្សត្រ។ ការបំពាក់ឋានន្តរស័ក្តិនេះជាការយកចិត្តទុកដាក់របស់ក្រសួងមហាផ្ទៃ និងអគ្គស្នងការនគរបាលជាតិក្នុងការលើកទឹកចិត្តដល់មន្ត្រីនគរបាលជាតិ ដែលខិតខំបំពេញការងារកន្លងមក ហើយការបំពាក់នេះនឹងធ្វើជាបន្តបន្ទាប់នៅទូទាំងប្រទេស។ យើងត្រូវរួមគ្នាអនុវត្តគោលនយោបាយរបស់រាជរដ្ឋាភិបាលក្រោមការដឹកនាំដ៏ត្រឹមត្រូវរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ធ្វើអ្វីត្រូវយកច្បាប់ជាគោល និងគោរពបទបញ្ជារបស់ថ្នាក់ដឹកនាំ គោរពគ្នាទៅតាមឋានានុក្រម ឆ្លៀតពេលសិក្សារៀនសូត្របន្ថែម មានទំនាក់ទំនងល្អជាមួយអាជ្ញាធរគ្រប់លំដាប់ថ្នាក់ ប្រជាពលរដ្ឋដើម្បីឱ្យការងារដំណើរការទៅបានល្អប្រសើរ។
លោកសូមឱ្យកម្លាំងតាមស្រុក ពិសេសនគរបាលប៉ុស្តិ៍ដែលនៅជាប់ជាមួយប្រជាពលរដ្ឋត្រូវពង្រឹងកម្លាំងឱ្យបានជាប់ជាប្រចាំក្នុងការការពារសន្តិសុខ និងធ្វើសេចក្តីរាយការណ៍ទៅថ្នាក់លើ ៕
ចែករំលែកព័តមាននេះ