ខេត្តកំពង់ចាម ៖ ព្រះតេជគុណ អ៊ន់ គង្គា ព្រះជន្ម៣៨ឆ្នាំ ជាព្រះចៅអធិការវត្តសំរោងបុរី ស្ថិតនៅភូមិរៀវ ឃុំមង់រៀវ ស្រុកត្បូងឃ្មុំ ត្រូវបានឃាតកមិនស្គាល់អត្តសញ្ញាណប្រើកាំភ្លើងខ្លី K59 បាញ់ប្រហារមកលើព្រះអង្គចំនួន១គ្រាប់ ត្រូវចំបំពង់កបៀមគ្រាប់ ខណៈដែលកំពុងអង្គុយទស្សន៍ទាយនៅលើកុដិថ្ម បណ្តាលឱ្យសុគត់ភ្លាមៗ ។ ហេតុការណ៍នេះបានកើតឡើងនៅវេលាម៉ោង៦និង១៥នាទីល្ងាច ថ្ងៃទី២៣ វិច្ឆិកា ២០១១ ជនដៃដល់បានរត់គេចខ្លួនបាត់ស្រមោល ព្រមទាំងបង្កឱ្យពុទ្ធបរិស័ទចំណុះជើងវត្តជិតឆ្ងាយមានការភ្ញាក់ផ្អើលយ៉ាងខ្លាំង ។
តាមលោកអនុសេនីយ៍ឯក ឡាញ់ សត្យា នគរបាលព្រហ្មទណ្ឌខេត្តបានប្រាប់ឱ្យដឹងថា ពេលដែលចៅអធិការវត្តកំពុងតែអង្គុយទស្សន៍ទាយឱ្យបុរសចំណាស់ពីរនាក់ប្តីប្រពន្ធនៅលើកុដិរបស់ព្រះអង្គ ស្រាប់តែមានជនមិនស្គាល់មុខប្រដាប់ទៅដោយអាវុធខ្លី ឈរនៅក្បែរបង្អួចចម្ងាយប្រហែល២ម៉ែត្រ បាញ់សំដៅមកលើព្រះអង្គត្រូវចំនួន១គ្រាប់ចំបំពង់កបណ្តាលឱ្យសុគតភ្លាមៗ ។ លោកបន្តថា មុនពេលកើតហេតុបុរសចំណាស់ម្នាក់ឈ្មោះអ៊ុក ឃន អាយុ៦៦ឆ្នាំ បានដើរឡើងតាមជណ្តើរខាងមុខកុដិ ក៏ឃើញមនុស្សប្រុសម្នាក់ដែលមានអាយុប្រហែលជាង២០ឆ្នាំ មិនស្គាល់អត្តសញ្ញាណបានបន្លំកាន់កាំភ្លើងក្នុងដៃ និងម្ខាងទៀតទៀនធូបតែស្ករស ដើរឡើងមកលើកុដិធ្វើដូចជារង់ចាំឱ្យចៅអធិការវត្តទស្សន៍ទាយដែរ បានបាញ់មួយគ្រាប់ទៅលើព្រះអង្គចំបំពង់ក។ ចំណែកបុរសចំណាស់ពីរនាក់ប្តីប្រពន្ធដែលកំពុងឱ្យព្រះចៅអធិការវត្តទស្សន៍ទាយនោះភ័យស្រឡាំងកាំង ហើយបង្កឱ្យមានការភ្ញាក់ផ្អើលដល់ព្រះសង្ឃ តាជីយាយជី ព្រមទាំងពុទ្ធបរិស័ទចំណុះជើងវត្តភ្លាមៗផងដែរ។
នៅក្រោយហេតុការណ៍បាញ់ប្រហារនេះ ត្រូវបានលោកឧត្តមសេនីយ៍ត្រី ឆាយ គឹមសុន ស្នងការនគរបាលខេត្ត និងលោកវរសេនីយ៍ឯក ជឹម សេងហុង ស្នងការរងនគរបាលខេត្ត បានចាត់រូបលោក (ឡាញ់ សត្យា) និងលោកវរសេនីយ៍ត្រី ប្រេង ហ៊ីម ប្រធានស្តីទីការិយាល័យព្រហ្មទណ្ឌកម្រិតធ្ងន់ដឹកនាំកម្លាំងចុះទៅកាន់កន្លែងកើតហេតុទាំងយប់ធ្វើការស្រាវជ្រាវតាមប្រមាញ់រកឃាតក តែរហូតមកដល់វេលាម៉ោង២រសៀល ថ្ងៃទី២៤ វិច្ឆិកា នេះនៅតែមិនមានពន្លឺណាបន្តិចសោះ៕
ចែករំលែកព័តមាននេះ