រាជធានីភ្នំពេញ ៖ នៅរសៀលថ្ងៃទី១៦ វិច្ឆិកា ឆ្នាំ២០១១ លោកងី តាយី រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុនិងជាប្រធានក្រុមប្រឹក្សាជាតិគណនេយ្យបានអញ្ជើញជាអធិបតីក្នុងពិធីចែកប័ណ្ណសរសើរជូនដល់និស្សិតឆ្នើមចំនួន២០នាក់ ទាំងនិស្សិតឯកជននិងនិស្សិតដែលទទួលបានអាហារូបករណ៍ពីក្រសួងសេដ្ឋកិច្ចនិងហិរញ្ញវត្ថុដែលកំពុងសិក្សាវគ្គគណនេយ្យជំនាញ(ACCA) និងវគ្គគណនេយ្យបច្ចេកទេស (CAT) នៅវិទ្យាស្ថានខេមអេដ (CamEd Institute ) ស្ថិតនៅអគារ៦៤ ផ្លូវ១០៨ សង្កាត់វត្តភ្នំ រាជធានីភ្នំពេញ ព្រមទាំងមានការអញ្ជើញចូលរួមពីលោកនាយកសាលា សាស្ត្រាចារ្យ និងនិស្សិតប្រមាណ១០០នាក់ ។
លោកខេស៊ី បាណេត នាយកវិទ្យាស្ថានខេមអេដ មានប្រសាសន៍ថា ចាប់តាំងពីឆ្នាំ២០០៣ មកវិទ្យាស្ថានខេមអេដ សហការជាមួយក្រសួងសេដ្ឋកិច្ចនិងហិរញ្ញវត្ថុបណ្តុះបណ្តាលនិស្សិតគណនេយ្យការជំនាញ (ACCA) ១៣ជំនាន់ និងគណនេយ្យបច្ចេកទេស(CAT) ៣ជំនាន់ រួចមកហើយ ។
លោកនាយកវិទ្យាស្ថានបញ្ជាក់ថា ជាលទ្ធផលវិទ្យាស្ថានត្រូវបានទទួលស្គាល់ពីសាធារណជនទាំងក្នុងនិងក្រៅប្រទេសដូចជាសមាគមគណនេយ្យករជំនាញរបស់ចក្រភពអង់គ្លេសជាដើម ។ និស្សិតដែលសិក្សានៅវិទ្យាស្ថានខេមអេដ តែងទទួលបានចំណាត់ថ្នាក់ល្អ បើប្រៀបធៀបទៅនឹងប្រទេសផ្សេងទៀតនៅលើសាកលលោក ។
វិស័យគណនេយ្យនិងសវនកម្មត្រូវបាននិងកំពុងមានការយកចិត្តទុកដាក់ពីក្រសួងសេដ្ឋកិច្ចនិងហិរញ្ញវត្ថុយ៉ាងខ្លាំង ដោយមានក្រុមប្រឹក្សាជាតិគណនេយ្យជាអ្នកដើរតួនាទីដ៏សំខាន់ក្នុងការអភិវឌ្ឍវិស័យនេះ ព្រោះថាប្រព័ន្ធគណនេយ្យនិងសវនកម្មត្រូវបានគេទទួលស្គាល់ទូទាំងសាកលលោកថាជាប្រព័ន្ធមួយដែលអាចជួយធានាឱ្យមានតម្លាភាព គណនេយ្យភាពត្រឹមត្រូវសម្រាប់ភាគីដែលពាក់ព័ន្ធនានាក្នុងការគ្រប់គ្រង និងការវិភាគលើស្ថានភាពហិរញ្ញវត្ថុរបស់ស្ថាប័នណាមួយ។ ជាមួយនេះដែរប្រព័ន្ធនេះវាក៏បានជួយដល់រាជរដ្ឋាភិបាលឱ្យទទួលបានសុក្រឹតភាព ក្នុងការប្រមូលពន្ធចូលរដ្ឋផង ហើយទីផ្សារភាគហ៊ុន ពិតជាត្រូវការនូវប្រព័ន្ធគណនេយ្យនិងសវនកម្មដ៏រឹងមាំមួយផងដែរ ។
លោកងី តាយី រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុនិងជាប្រធានក្រុមប្រឹក្សាជាតិ គណនេយ្យបានសម្តែងការកោតសរសើរ និងមានមោទនភាពយ៉ាងខ្លាំងចំពោះនិស្សិតខ្មែរយើងដែលកន្លងមកបានខិតខំសិក្សាផ្នែកគណនេយ្យ និងសវនកម្មប្រកបដោយជោគជ័យមិនត្រឹមតែកម្រិតថ្នាក់ជាតិប៉ុណ្ណោះទេ ថែមទាំងក្នុងកម្រិតអន្តរជាតិផងដែរ ដូចជានៅពេលនេះ មាននិស្សិតឆ្នើមចំនួន២០រូប ដែលបានជាប់លេខល្អថ្នាក់អន្តរជាតិ ។
លោកប្រធានក្រុមប្រឹក្សាជាតិគណនេយ្យសំណូមពរដល់វិទ្យាស្ថានខេមអេដបន្តការយកចិត្តទុកដាក់បន្ថែមទៀតក្នុងការបណ្តុះបណ្តាលអាជីពនេះឱ្យកាន់តែបានលទ្ធផលល្អប្រសើរជាងមុនសំដៅបំពេញផែនការរបស់ក្រសួងសេដ្ឋកិច្ចនិងហិរញ្ញវត្ថុដែលបានគ្រោងទុក ៕
ចែករំលែកព័តមាននេះ