កីឡាការិនីដាណឺម៉ាកការ៉ូលីន វ៉ូនីអាកគីកំពុងខិតចូលកាន់តែជិតពានជើងឯកតឺន្នីសកម្មវិធី China Openជាថ្មីម្តងទៀតបន្ទាប់ពីនាងបានយកឈ្នះកីឡាការិនីជើងខ្លាំងអេស្តូនីកាអ៊ីយ៉ា កាណេពីក្នុងជុំទី៣កាលពីថ្ងៃព្រហស្បតិ៍ទី៦ខែតុលាកន្លងមកនេះ។
កីឡាការិនីដាណឺម៉ាកការ៉ូលីន វ៉ូនីអាកគីកំពុងខិតចូលកាន់តែជិតពានជើងឯកតឺន្នីសកម្មវិធី China Openជាថ្មីម្តងទៀតបន្ទាប់ពីនាងបានយកឈ្នះកីឡាការិនីជើងខ្លាំងអេស្តូនីកាអ៊ីយ៉ា កាណេពីក្នុងជុំទី៣កាលពីថ្ងៃព្រហស្បតិ៍ទី៦ខែតុលាកន្លងមកនេះ។
នៅលើទីលានប្រកួតឈ្មោះមជ្ឈមណ្ឌលកីឡាតឺន្នីសជាតិស្ថិតក្នុងទីក្រុងប៉េកាំងរបស់ប្រទេសចិន នាងវ៉ូនីអាកគីបានបំបាក់នាងកាណេពីក្នុងលទ្ធផល៦-៣និង៧-៦ឈានចូលទៅវគ្គ១/៤ផ្តាច់ព្រ័ត្រជាបន្តទៀត។ នេះអាចនិយាយបានថា ជាការសងសឹកចំពោះការបរាជ័យរបស់ខ្លួនក្រោមថ្វីដៃនាងកាណេពីនៅប្រទេសជប៉ុន។ កីឡាការិនីវ័យក្មេងរូបនេះបាននិយាយថា៖«ខ្ញុំបានដឹងជាមុនរួចហើយថា ការប្រកួតនេះគឺពិតជាស្វិតស្វាញនិងតឹងតែងខ្លាំង។ ខ្ញុំសប្បាយចិត្តដែលបានយកឈ្នះការប្រកួតនេះជាពិសេសគឺអាចសងសឹកបាន»។ កីឡាការិនីលំដាប់ទី១ពិភពលោករូបនេះនៅវគ្គបន្ទាប់នឹងជួបប្រកួតជាមួយកីឡាការិនីអ៊ីតាលីហ្វ្លាវៀ ប៉េនីតាដែលបានយកឈ្នះកីឡាការិនីស្លូវ៉ាគីដូមីនីកា ស៊ីប៊ុលកូវ៉ាក្នុងលទ្ធផល៦-១,៤-៦និង៦-៤។
នាងវិចតូរីយ៉ា អាហ្សារិនកាបានដកខ្លួនពាក់កណ្តាលការប្រកួតបន្ទាប់ពីបានរបួសប្រអប់ជើងឆ្វេង។ ការដកខ្លួនរបស់នាងបានធ្វើឲ្យកីឡាការិនីរុស្ស៊ីអាណាស្តាស៊ី ប៉ាវលូឆិនកូវ៉ាឡើងទៅវគ្គបន្ទាប់ដោយមិនបាច់ប្រឹង។ នាងអាហ្សារិនកាបានបញ្ជាក់ថា របួសជើងនេះបានរំខាននាងតាំងពីនៅប្រទេសជប៉ុនមកម៉្លេះ។ នាងបានបន្ថែមថា៖«ខ្ញុំមិនដឹងពិតប្រាកដថា ពេលណាទើបវាជាសះស្បើយនោះទេ។ ទោះជាយ៉ាងណាក្តី ខ្ញុំនឹងពិគ្រោះយោបល់គ្នាជាមួយវេជ្ជបណ្ឌិត»។ នៅវគ្គបន្ទាប់នាងប៉ាវលូឆិនកូវ៉ានឹងជួបប្រកួតជាមួយកីឡាការិនីអាល្លឺម៉ង់អង់ឌ្រា ប៉េតកូវិច។
ក្នុងពេលដំណាលគ្នានេះដែរ កីឡាការិនីប៉ូឡូញអានីយេស្កា រែដវ៉ាន់ស្កាបានបញ្ចប់នូវក្តីសង្ឃឹមរបស់កីឡាការិនី Sofia Arvidssonដោយបានយកឈ្នះក្នុងលទ្ធផល៦-៤និង៦-២។ នៅវគ្គបន្ទាប់នាងនឹងជួបប្រកួតជាមួយនាងអាណា អ៊ីវ៉ាណូវិច។
ចំណែកលទ្ធផលនៃការប្រកួតឯកត្តជនផ្នែកបុរសវិញ កីឡាករបារាំងហ្សូវីលហ្វ្រ៊ី សុងហ្គាបានឈានចូលដល់វគ្គ១/៤ផ្តាច់ព្រ័ត្រផងដែរបន្ទាប់ពីបានយកឈ្នះគូប្រកួតដ៏ស្វិតស្វាញរបស់ខ្លួនកីឡាករចិន Zheng Zeក្នុងលទ្ធផល៦-៣និង៦-៤។ នៅវគ្គបន្ទាប់គេនឹងជួបប្រកួតជាមួយកីឡាករអេស្ប៉ាញចូអាន កាឡូសហ្វឺរេរ៉ូដែលបានយកឈ្នះកីឡាករ Marcel Granollersក្នុងលទ្ធផល៦-៤និង៦-៤ ។ និយាយពីការជួបជាមួយកីឡាករសុងហ្គា ហ្វឺរេរ៉ូបានបញ្ជាក់ថា៖«ខ្ញុំគិតថា គាត់ជាកីឡាករដ៏អស្ចារ្យម្នាក់។ គេមានរាងកាយមាំមួន ហើយលេងបានល្អស្ទើរគ្រប់ទីលានប្រកួត ៕
ចែករំលែកព័តមាននេះ