ម្ចាស់ជើងឯកទម្ងន់ធ្ងន់ពិភពលោកម៉ាក ហេនរីបានអង្រួនសង្វៀនកីឡាកាសរបស់ស្ថាប័នRAWជាថ្មីទៀត បន្ទាប់ពីកាលពីរាត្រីថ្ងៃចន្ទត្រូវនឹងព្រឹកថ្ងៃអង្គារទី៤តុលាម៉ោងនៅកម្ពុជាគេបានប្រើស្នៀត The World’s Strongest Slam បំបាក់អំនួតរបស់អ្នកកីឡាកាសរលកក្រោយចន ម៉ូរីសុន។
ម្ចាស់ជើងឯកទម្ងន់ធ្ងន់ពិភពលោកម៉ាក ហេនរីបានអង្រួនសង្វៀនកីឡាកាសរបស់ស្ថាប័នRAWជាថ្មីទៀត បន្ទាប់ពីកាលពីរាត្រីថ្ងៃចន្ទត្រូវនឹងព្រឹកថ្ងៃអង្គារទី៤តុលាម៉ោងនៅកម្ពុជាគេបានប្រើស្នៀត The World’s Strongest Slam បំបាក់អំនួតរបស់អ្នកកីឡាកាសរលកក្រោយចន ម៉ូរីសុន។ ការប្រកួតនេះរៀបចំធ្វើនៅឯសង្វៀនRAWស្ថិតក្នុងទីក្រុងLafayetteរដ្ឋល្វ៊ីសស៊ីណាសហរដ្ឋអាមេរិក។
នៅពេលការប្រកួតបានចាប់ផ្តើមភ្លាម ម៉ូរីសុនបានស្ទុះទៅរកម៉ាក ហេនរី ប៉ុន្តែទទួលរង១ដៃដួលផ្ងារលើក្តាររេញ។ អាចចាត់ទុកថាជាការសាកល្បងកម្លាំងគ្នាលើកដំបូង ម៉ូរីសុនមិនចុះញ៉មឡើយដោយបានធ្វើឲ្យហេនរីដួលលុតជង្គង់។ បន្ទាប់មកកម្លាំងទាត់ផ្កាប់ចានរបស់គេបានបញ្ជូនឲ្យហេនរីដេកដួលលើក្តាររេញ។ ម៉ូរីសុនបានលោតទម្លាក់ខ្លួនលើម៉ាក ហេនរីបន្ថែមទៀត ប៉ុន្តែគឺជាការឥតប្រយោជន៍ដ្បិតត្រូវទទួលរងការធាក់១ជើងស្តាំចំផ្ទៃមុខ។
ទម្ងន់ជើងរបស់ម៉ាក ហេនរីនីពេលនេះហាក់ដូចជាទម្ងន់ភ្នំរាប់ពាន់តោនសង្កត់លើម៉ូរីសុនហើយការប្រកួតក៏ដល់ទីបញ្ចប់ផងដែរ ខណៈម៉ូរីសុនរងការឈឺចាប់ជាខ្លាំងព្រមចុះចាញ់ការប្រកួត។ ម៉ាក ហេនរីចូលទៅសង្កត់ម៉ូរីសុនឲ្យអាជ្ញាកណ្តាលរាប់ដល់៣ដើម្បីយកឈ្នះការប្រកួតជាស្ថាពរ។ បន្ទាប់ពីដណ្តើមបានជ័យជម្នះ ម៉ាក ហេនរីបានផ្តល់មេរៀនបន្ថែមទៀតឲ្យម៉ូរីសុននិងបានប្រកាសណាត់ជួបជាមួយយក្ស Big Showដើម្បីសងសឹក។
ជារឿយៗវាមិនមែនជារឿងវៃឆ្លាតនោះទេដែលទៅណាត់ជួបប្រកួតជាមួយគូប្រកួតដែលមានមាឌធំជាងខ្លួននោះ។ ប៉ុន្តែសម្រាប់ម៉ាក ហេនរីអាចនិយាយបានថាជាមនុស្សលោភលន់ម្នាក់។ ម៉ាក ហេនរីអាចប្រហែលជានៅគុំក្នុងចិត្តព្រោះដែលកាលពីខែកក្កដាកន្លងមក រូបគេបានរងការឈឺចាប់យ៉ាងខ្លាំងដោយការបាក់ឆ្អឹងស្មងជើង ពោលគឺបន្ទាប់ពីយក្ស Big Showវាយនឹងកៅអីដែក។ តើនឹងមានអ្វីកើតឡើងប្រសិនជាគូសងសឹកទាំង២នេះជួបគ្នានៅពេលក្រោយ។
ចំណែកការប្រកួតជាក្រុម ចនស៊ីណា ស៊ីអឹមផាំង ស៊ីមើសនិងជើងឯក Tag Team Championsអ៊ែរ ប៊ូមនិងម៉ាសុន រីយ៉ានបានយកឈ្នះអាល់បឺតូ ឌែលរីយ៉ូម្ចាស់ជើងឯកWWE Championសហការជាមួយគ្រីស្ទាន ខូតឌី រ៉ូដ(ម្ចាស់ជើងឯកអន្តរទ្វីប)ដូល ហ្ស៊ីកគ្ល័រ(ម្ចាស់ជើងឯកសហរដ្ឋអាមេរិក)ព្រមទាំងជែក ស្វែកហ្គ័រនិងដេវីដ អូទុនហ្គា។ ការប្រកួតរវាងក្រុមទាំង២នេះសម្រេចជ័យចម្នះចុងក្រោយបន្ទាប់ពីស៊ីមើសយកឈ្នះដូល ហ្ស៊ីកគ្ល័រ ៕
ចែករំលែកព័តមាននេះ