រាជធានីភ្នំពេញ ៖ សាលាដំបូងរាជធានីបានសម្រេចផ្អាកការងារទាំងអស់របស់លោកឡោ សុជាតិ អតីតសាកលវិទ្យាធិការនៃសាកលវិទ្យាល័យជាតិគ្រប់គ្រង និងជាទីប្រឹក្សាសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីមានឋានៈស្មើរដ្ឋលេខាធិការ ដោយសារលោកឡោ សុជាតិ ជាប់ពាក់ព័ន្ធបទក្លែងលិខិត
រាជធានីភ្នំពេញ ៖ សាលាដំបូងរាជធានីបានសម្រេចផ្អាកការងារទាំងអស់របស់លោកឡោ សុជាតិ អតីតសាកលវិទ្យាធិការនៃសាកលវិទ្យាល័យជាតិគ្រប់គ្រង និងជាទីប្រឹក្សាសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីមានឋានៈស្មើរដ្ឋលេខាធិការ ដោយសារលោកឡោ សុជាតិ ជាប់ពាក់ព័ន្ធបទក្លែងលិខិតសាធារណៈ និងប្រើប្រាស់លិខិតក្លែងតាមក្រមព្រហ្មទណ្ឌត្រង់មាត្រា៦២៩ និង៦៣០។
ទាក់ទិននឹងសេចក្តីសម្រេចផ្អាកការងាររបស់លោកឡោ សុជាតិ ទាំងអស់នោះ ប្រភពព័ត៌មានពីសាលាដំបូងរាជធានីបានឱ្យដឹងថា លោកឡោ សុជាតិ អាយុ៥៣ឆ្នាំ ស្នាក់នៅផ្ទះលេខ៩៩ ផ្លូវជាតិលេខ៥ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ អតីតសាកលវិទ្យាធិការនៃសាកលវិទ្យាធិការជាតិគ្រប់គ្រង។ កាលពីអំឡុងខែកញ្ញា ២០១០ លោកឡោ សុជាតិ បានត្រូវព្រះមហាក្សត្រចេញព្រះរាជក្រឹត្យតែងតាំងធ្វើជាទីប្រឹក្សាសម្តេចអគ្គមហាសេនាបតីតេជោហ៊ុន សែន លើមុខងារបច្ចុប្បន្ន និងមានឋានៈស្មើរដ្ឋលេខាធិការ។ ព្រះរាជក្រឹត្យតែងតាំងលោកឡោ សុជាតិ ជាទីប្រឹក្សានាយករដ្ឋមន្ត្រីបានបញ្ជាក់យ៉ាងច្បាស់ថា មិនទទួលប្រាក់បៀវត្សរបស់រាជរដ្ឋាភិបាលទេ។ ផ្ទុយទៅវិញលោកសាកលវិទ្យាធិការជាតិគ្រប់គ្រងរូបនេះបានយកព្រះរាជក្រឹត្យដែលតែងតាំងលោកទៅចុះក្នុងទំព័រសារព័ត៌មានក្នុងស្រុកមិនបានដាក់បញ្ចូលពាក្យត្រង់ថា «មិនទទួលយកប្រាក់បៀវត្សរបស់រាជរដ្ឋាភិបាល»នោះឡើយ ពោលគឺលោកឡោ សុជាតិ មានចេតនាធ្វើជាទីប្រឹក្សាផង ទទួលប្រាក់បៀវត្សពីរាជរដ្ឋាភិបាលផង។
ចំណុចនេះហើយបានធ្វើឱ្យលោកមេធាវីរដ្ឋាភិបាល គឺលោកឈិត បូរ៉ាវុធ ដាក់ពាក្យបណ្តឹងចូលសាលាដំបូងរាជធានីចោទប្រកាន់លោកឡោ សុជាតិ ពីបទក្លែងលិខិតសាធារណៈ និងប្រើប្រាស់លិខិតក្លែង។
យោងទៅលើពាក្យបណ្តឹងរបស់លោកមេធាវី រាជរដ្ឋាភិបាលត្រូវបានតំណាងអយ្យការសាលាដំបូងរាជធានីចេញដីកាកោះហៅលោកឡោ សុជាតិ ទៅសាកសួរ ។ បន្ទាប់មកព្រះរាជអាជ្ញាបានធ្វើការចោទប្រកាន់ជាផ្លូវការ រួចដាក់ទៅចៅក្រមស៊ើបសួរដែលសំណុំរឿងនេះស្ថិតលើដៃលោកចៅក្រមកែវ មុនី បើកការសើុបអង្កេត។ លុះដល់ថ្ងៃទី២៩ សីហា ២០១១ ចៅក្រមបានកោះហៅលោកឡោ សុជាតិ ទៅសាកសួរ ហើយក្រោយពីសាកសួរ លោកចៅក្រមបានចេញដីកាសម្រេច៤ចំណុច គឺ៖
១-សម្រេចមិនឃុំខ្លួនលោកឡោ សុជាតិ ប៉ុន្តែបង្គាប់ឱ្យផ្អាកការងារបណ្តោះអាសន្នទាំងអស់។
២-ដាក់លោកស្ថិតក្រោមការត្រួតពិនិត្យតាមផ្លូវតុលាការ។
៣-ហាមផ្លាស់ប្តូរទីលំនៅ ។
៤-ហាមចេញទៅក្រៅប្រទេស ដើម្បីទុកពេលឱ្យតុលាការសើុបអង្កេតបឋម។
ពេលនេះលោកឡោ សុជាតិ កំពុងស្ថិតនៅក្រោមការត្រួតពិនិត្យតាមផ្លូវតុលាការ ហើយការងារទាំងអស់ក៏ត្រូវផ្អាកជាបណ្តោះអាសន្នដែរ។ សូមបញ្ជាក់ថា លោកឡោ សុជាតិ អាយុ៥៣ឆ្នាំ មានស្រុកកំណើតនៅភូមិល្វា ឃុំល្វា ស្រុកព្រះស្តេច ខេត្តព្រៃវែង ។ មុខងារ និងតួនាទីមុនតុលាការផ្អាកការងារបណ្តោះអាសន្នទាំងអស់នោះ គឺលោកជាសាកលវិទ្យាធិការនៃសាកលវិទ្យាល័យជាតិគ្រប់គ្រងដែលបានតែងតាំងដោយព្រះរាជក្រឹត្យលេខនស/រកត/០៥១០/៤៥៤ ចុះថ្ងៃទី២៩ ឧសភា ២០១០ ។ ជាគោលការណ៍សាកលវិទ្យាធិការត្រូវបានតែងតាំងជាសមាជិកស្វ័យប្រវត្តិក្នុងក្រុមប្រឹក្សាភិបាលនៃសាកលវិទ្យាល័យ ប្រធានសាខាសមាគមបុគ្គលិកសិក្សាខ្មែរហៅកាត់ថា ស.ប.ស.ខ និងជាប្រធានគណៈកម្មាធិការសាខាបក្ស សាកលវិទ្យាល័យ។ លោកក៏ត្រូវបានតែងតាំងជាទីប្រឹក្សាសម្តេចអគ្គមហាសេនាបតីតេជោហ៊ុន សែន មានឋានៈស្មើរដ្ឋលេខាធិការផងដែរតាមរយៈព្រះរាជក្រឹត្យលេខស/រកត/០៩១០/៧៣៨ចុះថ្ងៃទី៩ កញ្ញា ២០១០ និងជាទីប្រឹក្សាសម្តេចអគ្គមហាពញាចក្រី ហេង សំរិន ដែលតែងតាំងដោយព្រះរាជក្រឹត្យលេខស/រកត/០១០៩/០០៨ ចុះថ្ងៃទី៥ មករា ២០០៩ ៕
ចែករំលែកព័តមាននេះ