រាជធានីភ្នំពេញ ៖ រសៀលម៉ោង៣ថ្ងៃទី៣១ សីហា ២០១១ នេះ ក្រុមមន្ត្រីក្រសួងការពារ និងបណ្តុះបណ្តាលវិជ្ជាជីវៈ អាជ្ញាធរមូលដ្ឋាន និងមន្ត្រីជំនាញពាក់ព័ន្ធមួយចំនួនទៀតបានចុះទៅពិនិត្យ និងស៊ើបអង្កេតជាក់ស្តែងនៅរោងចក្រហាតអុីនធើរប្រាយ បន្ទាប់ពីមានកម្មករជាង១៣០នាក់ បានដួលសន្លប់កាលពីវេលាម៉ោងជាង
រាជធានីភ្នំពេញ ៖ រសៀលម៉ោង៣ថ្ងៃទី៣១ សីហា ២០១១ នេះ ក្រុមមន្ត្រីក្រសួងការពារ និងបណ្តុះបណ្តាលវិជ្ជាជីវៈ អាជ្ញាធរមូលដ្ឋាន និងមន្ត្រីជំនាញពាក់ព័ន្ធមួយចំនួនទៀតបានចុះទៅពិនិត្យ និងស៊ើបអង្កេតជាក់ស្តែងនៅរោងចក្រហាតអុីនធើរប្រាយ បន្ទាប់ពីមានកម្មករជាង១៣០នាក់ បានដួលសន្លប់កាលពីវេលាម៉ោងជាង៩ព្រឹកថ្ងៃទី៣០ និង៣១ សីហា ២០១១ នោះរួចមក។
កម្មការិនីជាង៩០នាក់ នៃរោងចក្រកាត់ដេរហាតអ៊ីនធើរប្រាយ បានទន់ដៃ ទន់ជើងដួលសន្លប់ជាបន្តបន្ទាប់ បង្កឱ្យមានការភ្ញាក់ផ្អើលយ៉ាងខ្លាំងត្រូវបានចាត់បញ្ជូនទៅសង្គ្រោះនៅមន្ទីរពេទ្យស្រុកអង្គស្នួល យ៉ាងប្រញាប់ប្រញាល់កាលពីវេលាម៉ោង៩និង៤០នាទីព្រឹកថ្ងៃទី៣១ សីហា ហើយសូមបញ្ជាក់ថា កាលពីម្សិលមិញថ្ងៃទី៣០ សីហា ២០១១ ក៏មានកម្មករដួលសន្លប់ប្រមាណ៤០នាក់ផងដែរ ប៉ុន្តែខាងរោងចក្រ និងមន្ត្រីអាជ្ញាធរព្យាយាមលាក់ព័ត៌មានពីអ្នកកាសែតមិនឱ្យធ្លាយ។
រោងចក្រហាតអ៊ីនធើរប្រាយ នេះស្ថិតនៅតាមបណ្តោយផ្លូវជាតិលេខ៤ ក្នុងភូមិត្រពាំងទួល សង្កាត់កំបូល ខណ្ឌដង្កោ មានកម្មករ-កម្មការិនីបម្រើការទាំងអស់ជាង២.០០០នាក់ ហើយការដួលសន្លប់ទាំង២ថ្ងៃជាប់គ្នាសរុបជាង១៣០នាក់នេះ មិនត្រូវបានមន្ត្រីអាជ្ញាធរ និងមន្ត្រីរដ្ឋបាលរោងចក្រអះអាងពីមូលហេតុពិតប្រាកដនៅឡើយទេ ប៉ុន្តែតាមប្រភពពីកម្មករនិយាយថា បណ្តាលមកពីសាយភាយជាតិគីមីចេញពីសាច់ក្រណាត់ ធុំក្លិនមិនល្អ ថប់ខ្យល់ និងការភ័យតៗគ្នា ព្រោះថាពេលឃើញកកម្មករម្នាក់ ឬពីរនាក់ដួលសន្លប់ពួកគេទាំងនោះក៏ផ្តើមទន់ដៃទន់ជើង ដួលសន្លប់តៗគ្នាផ្អើលឈុលតែម្តង។
មជ្ឈដ្ឋានមហាជនទូទៅបានធ្វើការរិះគន់ថា វាស្ទើរតែក្លាយទៅជាប្រពៃណីរបស់មន្ត្រីរដ្ឋបាលរោងចក្រ មន្ត្រីអាជ្ញាធរ និងមន្ត្រីជំនាញទៅហើយ ខាងពូកែលាក់រឿងកម្មករដួលសន្លប់ និងពូកែខាងឆ្លើយថា អត់ដឹងមូលហេតុ ហើយការមិនរវល់ដឹងរឿងហេតុនេះហើយទើបធ្វើឱ្យកម្មករតាមរោងចក្រនានាដួលសន្លប់ញឹកញាប់។ គួររំលឹកថា នៅក្នុងកិច្ចប្រជុំគណៈរដ្ឋមន្ត្រីកន្លងមក សម្តចតេជោនាយករដ្ឋមន្ត្រីហ៊ុន សែន បានបញ្ជាឱ្យនិយោជករោងចក្រ ស្ថាប័នពាក់ព័ន្ធ អាជ្ញាធរមូលដ្ឋាន ប្រញាប់ចុះពិនិត្យកែសម្រួលបញ្ហាកម្មករដួលសន្លប់មិនត្រូវទុកឱ្យកម្មកររងគ្រោះនោះទេ៕
ចែករំលែកព័តមាននេះ