ខេត្តស្ទឹងត្រែង ៖ នៅមុខទីបញ្ជាការកងរាជអាវុធហត្ថក្រុងស្ទឹងត្រែងកំពុងក្លាយជាកន្លែងចាក់ សំរាមយ៉ាងអនាធិបតេយ្យ ដែលគំនរសំរាមទាំងនេះស្ថិតក្នុងស្ថានភាពរប៉ាត់រប៉ាយហៀរមកដល់ ផ្លូវថ្នល់និងបង្កការលំបាកដល់ប្រជាពលរដ្ឋក្នុងការធ្វើដំណើរ ឆ្លងកាត់ទីនោះម្តងៗ ។
ខេត្តស្ទឹងត្រែង ៖ នៅមុខទីបញ្ជាការកងរាជអាវុធហត្ថក្រុងស្ទឹងត្រែងកំពុងក្លាយជាកន្លែងចាក់សំរាមយ៉ាងអនាធិបតេយ្យ ដែលគំនរសំរាមទាំងនេះស្ថិតក្នុងស្ថានភាពរប៉ាត់រប៉ាយហៀរមកដល់ផ្លូវថ្នល់និងបង្កការលំបាកដល់ប្រជាពលរដ្ឋក្នុងការធ្វើដំណើរឆ្លងកាត់ទីនោះម្តងៗ ។
អ្នកធ្វើដំណើរដោយជិះម៉ូតូតាមផ្លូវនេះនិយាយថា ពេលធ្វើដំណើរឆ្លងកាត់ម្តងៗដៃម្ខាងកាន់ចង្កូតម៉ូតូ រីឯម្ខាងទៀតលើកខ្ទប់ច្រមុះ ខណៈពេលធ្វើដំណើរមកដល់ទីបញ្ជាការកងរាជ អាវុធហត្ថក្រុង។ ក្រុមអ្នកដំណើរបានសំដែងការមិនពេញចិត្តពីកាកសំណល់នៅលើទ្រូងថ្នល់ដែលជះក្លិនស្អុយអសោចិ៍មកលើពួកគាត់។ ការចាក់សំរាមចោលយ៉ាងអនាធិបតេយ្យបែបនេះកំពុងធ្វើឱ្យប៉ះពាល់ដល់សណ្តាប់ធ្នាប់សាធារណៈ ខូចសោភ័ណភាពក្រុង បំពុលបរិស្ថាន និងប៉ះពាល់ដល់សុខភាពប្រជាពលរដ្ឋ។
លោកឱ បូរិន មេបញ្ជាការកងរាជអាវុធហត្ថខេត្តបានឱ្យដឹងថា ការចាក់សំរាមចោលនៅមុខទីបញ្ជាការប៉េអឹមរាល់ថ្ងៃនេះ ប្រាកដជាមិនត្រឹមត្រូវទេ ព្រោះវាជះក្លិនស្អុយនិងបាត់សោភ័ណភាពអង្គភាពរបស់លោក។ កាលពីពេលថ្មីៗកន្លងទៅនេះនៅទីបញ្ជាការបានប្រជុំស្វែងរកដំណោះស្រាយរួចហើយ គឺរកទីតាំងថ្មីឱ្យសាលាក្រុង ដែលជាអ្នកទទួលការប្រមូលកាកសំណល់តាមផ្ទះប្រជាពលរដ្ឋក្នុងក្រុងយកទៅចោលនៅទីលានសំរាម ។ ប៉ុន្តែទោះជាមានទីតាំងថ្មីក៏ដោយក៏រថយន្តដឹកសំរាមនៅតែបន្តយកកាកសំណល់ទាំងនោះមកចាក់នៅមុខអង្គភាពរបស់លោកដដែល។
ប្រជាពលរដ្ឋនិងមន្ត្រីពន្ធនាគារខេត្តដែលជារៀងរាល់ថ្ងៃតែងធ្វើដំណើរឆ្លងកាត់ទីនោះ និយាយថា ពីមុនផ្លូវមួយខ្សែនេះជាផ្លូវក្រាលក្រួសក្រហមធម្មតាប៉ុណ្ណោះ តែក្រោយមកដោយសារលោកឡូយ សូផាត អភិបាលខេត្ត បានមើលឃើញថា ប្រជាពលរដ្ឋក៏ដូចជាមន្ត្រីនគរបាលនិងមន្ត្រីនានាធ្វើដំណើរតាមផ្លូវមួយខ្សែនេះមានការលំបាកពេក ជាពិសេសនៅរដូវវស្សាមានទឹកដក់ពិបាកធ្វើចរាចរណ៍ ទើបលោកអភិបាលខេត្តបានខ្នះខ្នែងរកថវិកាស្ថាបនាផ្លូវមួយខ្សែនេះពីក្រាលក្រួសក្រហមមកជាផ្លូវក្រាលកៅស៊ូដ៏ស្អាតមួយ ។ ទីបំផុត បន្ទាប់ពីមានផ្លូវកៅស៊ូ បែរជាមានកាកសំណល់ដែលប្រមូលពីក្នុងក្រុងត្រូវបានគេយកមកចាក់តាំងពិព័រណ៍លើថ្នល់កៅស៊ូមុខទីបញ្ជាការកងរាជអាវុធហត្ថនេះតែម្តង ធ្វើឱ្យប្រជាពលរដ្ឋមានការលំបាក ព្រោះពេលធ្វើដំណើរឆ្លងកាត់ម្តងៗតែងតែទទួលក្លិនស្អុយជាប្រចាំ ។ ចំណែកផ្លូវក៏មានសភាពតូចចង្អៀតដោយសារសំរាមហៀររាយប៉ាយពេញថ្នល់ ។
លោក ផឹក សុបិន អភិបាលក្រុងស្ទឹងត្រែងបានបញ្ជាក់ឱ្យដឹងនៅព្រឹកថ្ងៃទី៣០ សីហា ថា ចំពោះសំរាមដែលប្រមូលពីក្នុងក្រុងទៅចាក់ចោលនៅមុខទីបញ្ជាការកងរាជអាវុធហត្ថក្រុងនោះ ជារៀងរាល់ចុងខែគេតែងតែកើបចេញពីផ្លូវថ្នល់នាំយកទៅកាន់ទីលានចាក់
សំរាម ។ ប៉ុន្តែដោយសារប៉ុន្មានថ្ងៃនេះគ្រឿងចក្រមិនទំនេរ ទើបធ្វើឱ្យមានការរាំងស្ទះហើយសំរាមចេះតែគរច្រើនទៅៗ ។
លោកអភិបាលក្រុងបានឱ្យដឹងបន្តថា សាលាក្រុងបានរកដីថ្មីរួចហើយនៅភូមិសាស្រ្តសង្កាត់សាមគ្គីចំណុចគីឡូម៉ែត្រលេខ១០ ឱ្យទៅអង្គការអុីប៉ាដេ ជាអង្គការដៃគូធ្វើការជីករណ្តៅនៅដីថ្មី ហើយអង្គការនេះក៏ជាអ្នកប្រមូលកាកសំណល់ពីក្នុងក្រុងទៅចាក់នៅកន្លែងថ្មីដែរ។ លោកផឹក សុបិន បាននិយាយទៀតថា ចំពោះដីថ្មីសំរាប់ផ្ទុកសំរាម គឺមិនទាន់អនុវត្តនៅឡើយទេព្រោះខែនេះជារដូវភ្លៀង ។ ម្យ៉ាងទៀតគ្រឿងចក្រមិនទំនេរ ទើបអង្គការនេះមិនទាន់បានជីករណ្តៅត្រូវរង់ចាំដល់ខែប្រាំង ទើបធ្វើការជីករណ្តៅ ដើម្បីប្រមូលសំរាមពីក្នុងក្រុងទៅចាក់នៅទីតាំងថ្មីនោះ ។
បើតាមការបកស្រាយរបស់លោកអភិបាលក្រុង មើលទៅឃ្លាំងសំរាមនេះច្បាស់ជាទុកឱ្យប៉េអឹមហិតក្លិនបន្តទៀតហើយ ។ មិនសង្ឃឹមថា អភិបាលក្រុងអាចដោះស្រាយបានឆាប់ៗឡើយ៕
ចែករំលែកព័តមាននេះ