រាជធានីភ្នំពេញ ៖ រាជរដ្ឋាភិបាលកម្ពុជាបានសម្រេចប្រគល់មេដាយសហមេត្រីថ្នាក់ធិប ឌិន្ទ ថ្នាក់សេនា មុនីសារាភណ្ឌ និងថ្នាក់អស្សឫទ្ធិជូនមន្ត្រីដៃគូអភិវឌ្ឍន៍ចំនួន១០នាក់របស់ GIZ-CIDA និង Finland មកពីប្រទេសហ្វាំងឡង់ អាល្លឺម៉ង់ កាណាដា និងមានម្នាក់នៅកម្ពុជា ដោយសារតែអ្នកទាំងនោះមានស្នាដៃល្អនៅក្នុងការ
រាជធានីភ្នំពេញ ៖ រាជរដ្ឋាភិបាលកម្ពុជាបានសម្រេចប្រគល់មេដាយសហមេត្រីថ្នាក់ធិបឌិន្ទ ថ្នាក់សេនា មុនីសារាភណ្ឌ និងថ្នាក់អស្សឫទ្ធិជូនមន្ត្រីដៃគូអភិវឌ្ឍន៍ចំនួន១០នាក់របស់ GIZ-CIDA និង Finland មកពីប្រទេសហ្វាំងឡង់ អាល្លឺម៉ង់ កាណាដា និងមានម្នាក់នៅកម្ពុជា ដោយសារតែអ្នកទាំងនោះមានស្នាដៃល្អនៅក្នុងការចូលរួមចំណែកជួយគាំទ្រដល់អនុវិស័យរដ្ឋបាលដីធ្លី អនុវិស័យរៀបចំដែនដី និងអនុវិស័យបែងចែកដីធ្លីនៅកម្ពុជា។ ពិធីនេះរៀបចំធ្វើឡើងនៅក្រសួងរៀបចំដែនដី នគរូបនីយកម្ម និងសំណង់កាលពីថ្ងៃទី២៤ សីហា ក្រោមអធិបតីភាពលោកអ៊ឹម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម។
លោកអ៊ឹម ឈុនលឹម ថ្លែងថា ប្រទេសអាល្លឺម៉ង់ កាណាដា និងហ្វាំងឡង់គឺជាដៃគូអភិវឌ្ឍន៍ដ៏មានសារសំខាន់ និងយូរអង្វែងរបស់ប្រទេសកម្ពុជាដែលបានជួយគាំទ្រដល់វិស័យសំខាន់ៗជាច្រើននៅកម្ពុជា។ ជាក់ស្តែងចំពោះវិស័យដីធ្លី រដ្ឋាភិបាលអាល្លឺម៉ង់ ហ្វាំងឡង់ និងកាណាដាបានជួយផ្តល់ជំនួយទាំងផ្នែកបច្ចេកទេស និងហិរញ្ញប្បទានតាំងពីពាក់កណ្តាលទសវត្សទី៩០មកម្ល៉េះ។ ការជួយជ្រោមជ្រែងរបស់ដៃគូអភិវឌ្ឍន៍ទាំង៣នេះបានបម្រើដល់ផលប្រយោជន៍របស់កម្មវិធីដីធ្លីទាំងមូល ដែលក្នុងនោះរួមមាន អនុវិស័យរដ្ឋបាលដីធ្លី អនុវិស័យរៀបចំដែនដី និងអនុវិស័យបែងចែកដីធ្លី។ មួយភាគធំនៃជំនួយឥតសំណងនេះត្រូវបានប្រើប្រាស់សម្រាប់អនុវិស័យរដ្ឋបាលដីធ្លីក្នុងគោលដៅកសាងសមត្ថភាព ពន្លឿនការងារចុះបញ្ជី និងចេញប័ណ្ណកម្មសិទ្ធិ ការងារដោះស្រាយវិវាទ ការងារគោលនយោបាយវាយតម្លៃដីធ្លី ការងារអនុវត្តសារាចរលេខ០៣ និងការងារបញ្ជ្រាបសមភាពរវាងបុរស និងស្ត្រី(យេនឌ័រ)។ល។
ដៃគូអភិវឌ្ឍន៍បានចាត់ទុកអនុវិស័យទាំងបីនោះជាអនុវិស័យដ៏មានសារសំខាន់ដោយបានផ្តល់ការគាំទ្រយ៉ាងពេញទំហឹង និងបានសហការយ៉ាងជិតស្និទ្ធជាមួយរាជរដ្ឋាភិបាលក្នុងគ្រប់កាលៈទេសៈ។ ក្រោមជំនួយមនុស្សធម៌នេះ រាជរដ្ឋាភិបាលបានអនុវត្ត និងសម្រេចលទ្ធផលគួរជាទីមោទនៈ ដែលនេះជាលទ្ធផលរួមគ្នាកើតចេញពីកិច្ចសហប្រតិបត្តិការយ៉ាងជិតស្និទ្ធរវាងរាជរដ្ឋាភិបាលកម្ពុជា និងរដ្ឋាភិបាលជាដៃគូអភិវឌ្ឍន៍។ ចំពោះកាយវិការប្រកបដោយមនុស្សធម៌របស់ដៃគូអភិវឌ្ឍន៍ទាំងបីនេះរាជរដ្ឋាភិបាលកម្ពុជាចងចាំជានិច្ច និងថ្លែងអំណរគុណយ៉ាងជ្រាលជ្រៅ និងពុំអាចបំភ្លេចបាន។
លោកបញ្ជាក់ថា ជំនួយគាំទ្ររបស់ដៃគូអភិវឌ្ឍន៍ទាំងនោះពិតជាបានជួយចូលរួមចំណែកដល់ការកាត់បន្ថយភាពក្រីក្រនៅកម្ពុជាតាមរយៈការងារចុះបញ្ជីដីធ្លីមានលក្ខណៈជាប្រព័ន្ធ និងចេញប័ណ្ណកម្មសិទ្ធិសមូហភាពដល់សហគមន៍ជនជាតិដើមភាគតិចដែលធានាបានសិទ្ធិលើដីធ្លី និងសុវត្ថិភាពកាន់កាប់ដីដោយស្របច្បាប់របស់ប្រជាពលរដ្ឋ ការងាររៀបចំដែនដី និងក្របខណ្ឌគោលនយោបាយគតិយុត្តនានា ព្រមទាំងការងារបែងចែកដីធ្លីដល់គ្រួសារគ្មានដី និងខ្វះដី។
លោកសង្ឃឹមជឿជាក់ថា នាពេលអនាគតភាគីដៃគូនៅតែបន្តជួយគាំទ្រដល់វិស័យទាំងនោះថែមទៀតដើម្បីរួមចំណែកអនុវត្តទិសដៅផែនការយុទ្ធសាស្ត្រអភិវឌ្ឍជាតិ និងគោលនយោបាយអាទិភាពទាំងឡាយរបស់រាជរដ្ឋាភិបាលសម្រាប់នីតិកាលទី៤នៃរដ្ឋសភាដូចមានចែងក្នុងយុទ្ធសាស្ត្រចតុកោណដំណាក់កាលទី២ ៕
ចែករំលែកព័តមាននេះ