រាជធានីភ្នំពេញ ៖តើនៅពេលណាអង្គជំនុំ ជម្រះតុលាការកំពូលនឹងប្រកាសសាលដីកា ស្ថាពរលើបណ្តឹងសាទុក្ខក្នុងសំណុំរឿង០០១ ប្រឆាំងនឹងអតីតកាំង ហ្កេកអ៊ាវ ហៅឌុច អតីត ប្រធានគុកទួលស្លែង? តើសវនាការលើអង្គ សេចក្តីក្នុងសំណុំរឿង០០២ នឹងបើកនៅពេល ណាបើជនជាប់ចោទមានវ័យចាស់ៗអស់ទៅ ហើយនោះ?
រាជធានីភ្នំពេញ ៖តើនៅពេលណាអង្គជំនុំ ជម្រះតុលាការកំពូលនឹងប្រកាសសាលដីកា ស្ថាពរលើបណ្តឹងសាទុក្ខក្នុងសំណុំរឿង០០១ ប្រឆាំងនឹងអតីតកាំង ហ្កេកអ៊ាវ ហៅឌុច អតីត ប្រធានគុកទួលស្លែង? តើសវនាការលើអង្គ សេចក្តីក្នុងសំណុំរឿង០០២ នឹងបើកនៅពេល ណាបើជនជាប់ចោទមានវ័យចាស់ៗអស់ទៅ ហើយនោះ? ទាំងនេះគឺជាសំណួរដែលបានចោទ សួរឡើងដោយពលរដ្ឋ សិស្ស និស្សិត និងព្រះ សង្ឃ នៅក្នុងពេលធ្វើដំណើរទស្សនកិច្ចសិក្សាពី សាលាក្តីខ្មែរក្រហមកាលពីថ្ងៃទី២៥ ខែសីហា ឆ្នាំ២០១១ ។
ស្រេង ម៉េងស្រ៊ាង និស្សិតឆ្នាំទី១នៃមហា វិទ្យាល័យសេដ្ឋកិច្ច សាកលវិទ្យាល័យភូមិន្ទនីតិ សាស្ត្រនិងវិទ្យាសាស្ត្រសេដ្ឋកិច្ចបាននិយាយថា៖«ខ្ញុំទន្ទឹងរង់ចាំជា យូរមកហើយនូវការប្រកាសសាលដីកាលើករណីឌុច បន្ទាប់ពីតុលាការកំពូលរបស់សាលាក្តីខ្មែរក្រហមបានបើកសវនាការលើបណ្តឹងសាទុក្ខនាពេលកន្លងមក។ ការទន្ទឹងរង់ចាំរបស់ខ្ញុំគឺព្រោះថា សំណុំរឿងប្រឆាំងនឹងអតីតប្រធានគុកទួលស្លែងគឺជាសំណុំរឿងប្រវត្តិសាស្ត្រ និងចង់ដឹងថា តើទោសទណ្ឌដែលបានដាក់លើគាត់នោះ នឹងមានការប្រែប្រួលយ៉ាងណា?»។
ព្រះតេជគុណ វ័ន្ត វណ្ណា និមន្តមកពីវត្តមួយក្នុងខេត្តកណ្តាល ដែលបានចូលរួមក្នុងដំណើរទស្សនកិច្ចសិក្សាមកកាន់សាលាក្តីខ្មែរក្រហមបានមានថេរដីកាថា៖«អាត្មាបានតាមដានដំណើរការសវនាការលើករណីឌុចនេះយ៉ាងខ្ជាប់ខ្ជួន ហើយឥឡូវនេះ អាត្មាកំពុងទន្ទឹងរង់ចាំការប្រកាសសាលដីការបស់តុលាការកំពូលថា តើតុលាការកំពូលនឹងសម្រេចសេចក្តីយ៉ាងណា បន្ធូរបន្ថយទោសដូចអ្វីដែលមេធាវីឌុចបានស្នើសុំ ឬក៏បន្ថែមទោសពៃរ៍ទៅលើឌុចតាមការស្នើសុំរបស់សហព្រះរាជអាជ្ញា និងមេធាវីការពារក្តី? អាត្មាចង់ដឹងណាស់ ប៉ុន្តែមិនទាន់ដឹងថា នៅពេលណានឹងបានស្តាប់ការប្រកាសសាលដីកានេះនៅឡើយទេ»។
រីឯកញ្ញាស៊ា នារី និស្សិតមកពីវិទ្យាស្ថានខ្មែរជំនាន់ថ្មី បានស្នើដោយទទូចដល់អង្គជំនុំជម្រះតុលាការកំពូលពន្លឿនការប្រកាសសាលដីកាលើបណ្តឹងសាទុក្ខក្នុងសំណុំរឿង០០១ ដោយកញ្ញាបាននិយាយថា៖«ខ្ញុំចង់ដឹងថា តើឌុចនឹងជាប់ទោសប៉ុន្មានឆ្នាំពិតប្រាកដ ចំពោះទង្វើបញ្ជាឱ្យសម្លាប់អ្នកទោសនៅគុកទួលស្លែង និងនៅវាលពិឃាតជើងឯក»។ រីឯនិស្សិតពៅ ពុន មកពីសាកលវិទ្យាល័យនីតិសាស្ត្រនិងវិទ្យាសាស្ត្រសេដ្ឋកិច្ច ក៏បានគូសបញ្ជាក់ពីសារសំខាន់នៃការប្រកាសសាលក្រម ដោយបានលើកឡើងថា៖«ខ្ញុំក៏ដូចជាប្រជាពលរដ្ឋខ្មែរដទៃទៀត គឺពិតជាចង់ដឹងអំពីការសម្រេចរបស់តុលាការកំពូល ព្រោះជនរងគ្រោះបានទន្ទឹងរង់ចាំការសម្រេចនេះជាច្រើនខែមកហើយ»។
ប៉ុន្តែបើតាមលោកចៅក្រមគង់ ស្រុីម ប្រធានអង្គជំនុំជម្រះតុលាការកំពូលដែលបានថ្លែងនៅក្នុងកិច្ចប្រជុំពេញអង្គលើកទី១០ របស់អង្គជំនុំជម្រះវិសាមញ្ញក្នុងតុលាការកាលពីដើមខែសីហាកន្លងទៅនេះថា៖« ក្រោយពីការបញ្ចប់ការជំនុំជម្រះក្តីលើកទី១ របស់អ.វ.ត.ក នៅក្នុងសំណុំរឿង កាំង ហ្កេកអ៊ាវ និងការប្រកាសសាលក្រមរបស់អង្គជំនុំជម្រះសាលាដំបូង កាលពីខែ កក្កដា ឆ្នាំ២០១០មក ភាគីពាក់ព័ន្ធនានាបានដាក់បណ្តឹងសាទុក្ខដែលត្រូវបានពិនិត្យពិចារណាយ៉ាងយកចិត្តទុកដាក់ដោយអង្គជំនុំជម្រះតុលាការកំពូល»។ លោកចៅក្រម គង់ ស្រុីមបន្តថា៖«អង្គជំនុំជម្រះតុលាការកំពូលបានបើកសវនាការជាសាធារណៈកាលពីខែមីនា ឆ្នាំ២០១១ កន្លងទៅ ហើយសង្ឃឹមថា សាលដីកានឹងត្រូវ ប្រកាសក្នុងពេលឆាប់ៗខាងមុខតាមតែអាចធ្វើទៅបាន»។
ការទន្ទឹងរង់ចាំរបស់ពលរដ្ឋខ្មែរ មិនបញ្ឈប់ត្រឹមការចង់បានការប្រកាសសាលដីកាលើសំណុំរឿង០០១ ឱ្យបានឆាប់រហ័សឡើយ ប៉ុន្តែពលរដ្ឋទាំងនេះក៏បានលើកឡើងពីការទន្ទឹងរង់ចាំរបស់ខ្លួនចំពោះការបើកសវនាការលើអង្គសេចក្តីក្នុងសំណុំរឿង០០២ ប្រឆាំងនឹងជនជាប់ចោទ៤ រូប គឺនួន ជា, ខៀវ សំផន, អៀង សារី និងអៀង ធីរិទ្ធ ផងដែរ។ សវនាការលើអង្គសេចក្តីមិនទាន់ត្រូវបានកំណត់ពេលវេលានៅឡើយ ខណៈអង្គជំនុំជម្រះសាលាដំបូងត្រៀមខ្លួនក្នុងការបើកសវនាការស្តីពីកាយសម្បទារបស់ជនជាប់ចោទពីររូបនៅថ្ងៃទី២៩ ដល់ថ្ងៃទី៣១ ខែសីហា ឆ្នាំ២០១១ខាងមុខ។
ព្រះតេជគុណ វ័ន្ត វណ្ណា មានថេរដីកាថា៖«សម្រាប់សំណុំរឿង០០២ បើអង្គជំនុំជម្រះសាលាដំបូងបើកសវនាការបានកាន់តែលឿនកាន់តែល្អ ព្រោះជនជាប់ចោទមានវ័យចាស់ៗអស់ហើយ រីឯជនរងគ្រោះក្នុងរបបខ្មែរក្រហមដែលទន្ទឹងរង់ចាំយុត្តិធម៌នោះ ក៏មានវ័យចាស់ៗដែរ។
ប្រជាពលរដ្ឋទូទៅរង់ចាំមើលការកាត់ក្តីលើអង្គសេចក្តីនេះថា តើនឹងមានព័ត៌មានអ្វីខ្លះនឹងចេញពីមាត់របស់ជនជាប់ចោទជាអតីតមេដឹកនាំខ្មែរក្រហមទាំងនោះ»។ ភិក្ខុ វ័ន្ត វណ្ណា មានថេរដីកាបន្ថែមថា៖«ពលរដ្ឋខ្មែរក៏ចង់ដឹងដែរថា តើជនជាប់ចោទទាំង៤រូបក្នុងសំណុំរឿង០០២នេះនឹងត្រូវតុលាការផ្តន្ទាទោសកម្រិតណាចំពោះបទឧក្រិដ្ឋរបស់ខ្លួនដែលបានប្រព្រឹត្តនៅក្នុងពេលពួកគាត់គ្រប់គ្រងប្រទេសចន្លោះពីឆ្នាំ ១៩៧៥ ដល់ឆ្នាំ១៩៧៩»។
និស្សិតស្រេង ម៉េងស្រ៊ាង បាននិយាយថា សវនាការលើអង្គសេចក្តីក្នុងករណី០០២ខាងមុខនឹងផ្តល់ព័ត៌មានសំខាន់ៗជាច្រើនទាក់ទងនឹងប្រវត្តិសាស្ត្រនៃរបបខ្មែរក្រហមសម្រាប់ពលរដ្ឋទូទៅ និងជាពិសេសយុវជនជំនាន់ក្រោយដែលមិនបានឆ្លងកាត់របបខ្មែរក្រហម។ និស្សិតម៉េងស្រ៊ាង និយាយថា៖ «សវនាការលើជនជាប់ចោទទាំង៤រូបក្នុងសំណុំរឿង០០២ ពិតជាផ្តល់សារសំខាន់ទាំងផ្នែកព័ត៌មានប្រវត្តិសាស្ត្រ ទិដ្ឋភាពច្បាប់ និងរបៀបនៃការដំណើរការជំនុំជម្រះក្តីដល់ពលរដ្ឋ និងនិស្សិត។ ដូច្នេះខ្ញុំចង់ឱ្យអង្គជំនុំជម្រះសាលាដំបូងពន្លឿននីតិវិធីចំពោះសវនាការលើអង្គសេចក្តីឱ្យទាន់ពេលដែលជនជាប់ចោទទាំងនេះនៅមានសុខភាពល្អ និងរស់រានមានជីវិតនៅឡើយ»។
និស្សិត ពៅ ពុន ក៏បានលើកឡើងផងដែរថា៖ «ខ្ញុំពិតជាចង់ដឹងពីការជំនុំជម្រះក្តីនៅក្នុងសំណុំរឿង០០២នេះណាស់ ព្រោះថាមិនមែនគ្រាន់តែខ្ញុំដែលជាក្មេងជំនាន់ក្រោយទេ សូម្បីតែពលរដ្ឋដទៃទៀតក៏ចង់ដឹងពីការពិតនៅក្នុងរបបខ្មែរក្រហមដែរ។ ដូច្នេះ ខ្ញុំសូមឱ្យអង្គជំនុំជម្រះសាលាដំបូងបើកសវនាការកាត់សេចក្តីលើជនជាប់ចោទទាំង៤នាក់នេះឱ្យបានឆាប់ៗតាមតែអាចធ្វើបាន ដើម្បីអាចយើងខ្ញុំបានស្តាប់ដោយផ្ទាល់ត្រចៀកនូវអ្វីដែលជនជាប់ចោទលើកឡើង បើគាត់ស្លាប់ទៅនោះការពិតក៏បាត់បង់ទៅតាមគាត់ដែរ»៕
ចែករំលែកព័តមាននេះ