រាជធានីភ្នំពេញ ៖ រថយន្ត២គ្រឿងមួយគ្រឿងម៉ាកមែរសឺដែស ពណ៌ស និងមួយគ្រឿងទៀតម៉ាកកាមរីឆ្លាម ពណ៌ប្រផេះ បានបុកគ្នានៅចំណុចផ្លូវកែងលេខ៦៣ និងផ្លូវម៉ៅសេទុង សង្កាត់ទន្លេបាសាក់ ខណ្ឌចំការមន កាលពីវេលាម៉ោង១រំលងអធ្រាត្រឈានចូល់ថ្ងៃទី២៤ សីហា ២០១១ បណ្តាលឱ្យរថយន្តទាំងពីរខ្ទាតរៀងៗខ្លួន
រាជធានីភ្នំពេញ ៖ រថយន្ត២គ្រឿងមួយគ្រឿងម៉ាកមែរសឺដែស ពណ៌ស និងមួយគ្រឿងទៀតម៉ាកកាមរីឆ្លាម ពណ៌ប្រផេះ បានបុកគ្នានៅចំណុចផ្លូវកែងលេខ៦៣ និងផ្លូវម៉ៅសេទុង សង្កាត់ទន្លេបាសាក់ ខណ្ឌចំការមន កាលពីវេលាម៉ោង១រំលងអធ្រាត្រឈានចូល់ថ្ងៃទី២៤ សីហា ២០១១ បណ្តាលឱ្យរថយន្តទាំងពីរខ្ទាតរៀងៗខ្លួនគឺមួយគ្រឿងទៅបុកបង្គោលភ្លើងដែកមួយដើមបណ្តាលឱ្យវៀចបន្តិច និងមួយគ្រឿងទៀតខ្ទាតទៅបុករបងថ្ម ស្នាក់ការអង្គការឃែ នៅក្បែរកន្លែងកើតហេតុ បាក់អស់មួយចន្លោះ ហើយក្បាលរថយន្តនោះបានធ្លាយចូលខាងក្នុងអើតសួរសុខទុក្ខបុគ្គលិកអង្គការថា សុខសប្បាយជាទេ ប៉ុន្មានថ្ងៃនេះ។
គ្រោះថ្នាក់ចរាចរណ៍ខាងលើនេះ ពុំបណ្តាលឱ្យអ្នកដំណើរណាម្នាក់រងរបួសធ្ងន់ធ្ងរឡើយ ហើយអ្នកបើកបររថយន្តរងរបួសស្រាល ចុះរត់ចោលរថយន្តទៅរកកន្លែងព្យាបាលបាត់អស់ទាំងអធ្រាត្ររកតែសមត្ថកិច្ចសួរនាំអំពីអត្តសញ្ញាណពុំទាន់ផង។ ក្រោយកើតហេតុ ប៉ូលិសមូលដ្ឋានសហការជាមួយនគរបាលការិយាល័យចរាចរណ៍ផ្លូវគោករាជធានីភ្នំពេញចុះវាស់វែងស្ទូចយករថយន្តទាំង២ទៅរក្សាទុក ដើម្បីចាត់ការតាមច្បាប់។
អ្នកឃើញហេតុការណ៍បានឱ្យដឹងថា មុនពេលកើតហេតុ គេបានឃើញរថយន្តម៉ាកមែរសឺដែស បើកបរធ្វើដំណើរលើកំណាត់ផ្លូវលេខ៦៣ ក្នុងទិសដៅពីជើងទៅត្បូង លុះដល់ចំណុចផ្លូវកែងម៉ៅសេទុង ក៏ជ្រុលល្បឿនបុកជាមួយរថយន្តកាមរីឆ្លាម បើកបរពីកើតទៅលិច បណ្តាលឱ្យរថយន្តម៉ាកកាមរីឆ្លាម ខ្ទាតទៅបុករបងអគារអង្គការឃែ ធ្លុះចូលក្នុងអស់ពាក់កណ្តាលរថយន្ត ហើយសួរសុខទុក្ខបុគ្គលិកអង្គការ… រីឯរថយន្តម៉ាកមែរសឺដែសជ្រុលទៅបុកបង្គោលភ្លើងទៅមុខលែងរួចទាំងអស់គ្នា។
សមត្ថកិច្ចសន្និដ្ឋានថា ម្ចាស់រថយន្តទាំងពីរបើកបរមិនគោរពសិទ្ធិគ្នាទៅវិញទៅមក ទើបជួបហេតុការណ៍គ្រោះថ្នាក់កើតឡើងខូចខាតរថយន្តដូចគ្នា ៕
ចែករំលែកព័តមាននេះ