ខេត្តឧត្តរមានជ័យ ៖ កងកម្លាំងការពារព្រំដែនកម្ពុជា និងថៃបានជួបពិភាក្សារវាងថ្នាក់មេបញ្ជាការ មេបញ្ជាការរងដោយលើកយកគម្រោងបើកច្រកទ្វារតំបន់សម្រាប់នាំចេញ មុខទំនិញដោះដូរគ្នាទៅវិញទៅមករបស់ប្រជាពលរដ្ឋទាំង២ប្រទេស តាមមាត់ច្រកទ្វារថ្មដូន និងច្រកទ្វារជប់គគីរដែលស្ថិតនៅក្នុងស្រុកបន្ទាយអំពិលកាលពី
ខេត្តឧត្តរមានជ័យ ៖ កងកម្លាំងការពារព្រំដែនកម្ពុជា និងថៃបានជួបពិភាក្សារវាងថ្នាក់មេបញ្ជាការ មេបញ្ជាការរងដោយលើកយកគម្រោងបើកច្រកទ្វារតំបន់សម្រាប់នាំចេញមុខទំនិញដោះដូរគ្នាទៅវិញទៅមករបស់ប្រជាពលរដ្ឋទាំង២ប្រទេសតាមមាត់ច្រកទ្វារថ្មដូន និងច្រកទ្វារជប់គគីរដែលស្ថិតនៅក្នុងស្រុកបន្ទាយអំពិលកាលពីថ្ងៃទី១៦ សីហា ។
លោកអនុសេនីយ៍ទោ ខាត់ សុខឿន នាយប៉ុស្តិ៍ជប់គគីរអង្គភាពកងវរលេខ៧០២ប៉ូលិសការពារព្រំដែនកម្ពុជា-ថៃឱ្យកោះសន្តិភាពដឹងថា លោកវរសេនីយ៍ឯកយឹម ផាន មេបញ្ជាការសឹករងខេត្តប្រចាំទិសជប់គគីរបានដឹកនាំកម្លាំងថ្នាក់មេបញ្ជាការសឹករងស្រុកបន្ទាយអំពិល និងថ្នាក់មេបញ្ជាការរង ព្រមទាំងប៉ូលិសការពារព្រំដែនមួយចំនួនជួបពិភាក្សាគ្នាជាមួយភាគីថៃដឹកនាំដោយលោកណាត់ សុអីុម មេបញ្ជាការកងវរសេនាធំឈុតខ្មៅលេខ២៦នៅបន្ទាយថៃក្បែរព្រំដែនទល់មុខប៉ុស្តិ៍ជប់គគីរកាលពីថ្ងៃទី១៦ សីហា ជាជំហានទី១ក្នុងការពិភាក្សាគ្នា។
លោកអនុសេនីយ៍ទោបញ្ជាក់ថា ការជួបពិភាក្សាគ្នារវាងថ្នាក់មេបញ្ជាការតំបន់ទាំងសងខាងគឺលើកយកគម្រោងបើកច្រកតំបន់សម្រាប់ឱ្យប្រជាពលរដ្ឋទាំងពីរប្រទេសនាំទំនិញដោះដូរគ្នា បន្ទាប់ពីមានសភាពធូរស្រាលនៅតាមខ្សែបន្ទាត់ព្រំដែនដោយស្រុកបន្ទាយអំពិលក្នុងខេត្តឧត្តរមានជ័យមានព្រំប្រទល់ជាប់នឹងស្រុកបានត្រួត ខេត្តបុរីរ៉ាម។
លោកអនុសេនីយ៍ទោបន្តទៀតថា ការជួបពិភាក្សាគ្នានៅជំហានទី២កំណត់ធ្វើនៅថ្ងៃទី៣១ សីហា ដោយមានការចូលរួមពីអាជ្ញាធរស្រុកបន្ទាយអំពិល និងអាជ្ញាធរស្រុកបានត្រួត ដោយលើកយកគម្រោងបើកច្រកតំបន់ថ្មដូន ។ ទោះជាយ៉ាងណាក្តី គម្រោងបើកច្រកទ្វារតំបន់នេះពុំទាន់ជាផ្លូវការនៅឡើយទេ ព្រោះមិនទាន់ពិភាក្សាគ្នារលូននៅឡើយនិងអាចមានការរាំងស្ទះលើចំណុចណាមួយ ៕
ចែករំលែកព័តមាននេះ