បុរសម្នាក់រស់នៅរដ្ឋ Virginia ភាគអាគ្នេយ៍សហរដ្ឋអាមេរិក កំពុងទាមទារឱ្យចុះកំណត់ត្រាក្នុងសៀវភៅហ្គីណេសប៊ុកសម្រាប់ស៊ុតមាន់របស់គាត់ ដែលមានទំហំធំជាងកាក់តម្លៃមួយសេនប៉ុណ្ណោះ។ លោក Reverand Donnie Russell បាននិយាយថា គាត់ប្រទះឃើញស៊ុតមាន់តូចនេះនៅក្នុងកសិដ្ឋានរបស់គាត់ កាលពីចុងខែកក្កដា កន្លងមក។ វាមានប្រវែង២,១សង្ទីម៉ែត្រ និងទម្ងន់៣,៤៦ក្រាម ដែលមានទំហំធំជាងកាកតម្លៃមួយសេនបន្តិចបន្តួចប៉ុណ្ណោះ ។
លោកបានបន្តថា ភរិយារបស់គាត់ជាមនុស្សចូលចិត្តចិញ្ចឹមសត្វ នាងតែងតែប្រមូលសត្វមកចិញ្ចឹមដូចជា ៖ សត្វឆ្មា ក្ងាន ទាមាន់ និងប្រភេទសត្វផ្សេងជាច្រើនទៀតក្នុង១ឆ្នាំៗ ។
ជាធម្មតាគ្រួសាររបស់គាត់គឺជាអ្នកផ្គត់ផ្គង់ស៊ុតទៅឱ្យ Rok Creek Community Church ដែលមានលោកជាអ្នកគ្រប់គ្រង។
ជារៀងរាល់ថ្ងៃពួកគាត់តែងតែទៅប្រមូលស៊ុតនៅក្នុងកសិដ្ឋានមករក្សាទុក ។ ថ្ងៃមួយគាត់ភ្ញាក់ផ្អើលយ៉ាងខ្លាំងនៅពេលគាត់ប្រទះឃើញស៊ុតមាន់តូចបែបនេះ ហើយគាត់កំពុងរក្សាវាទុកដើម្បីចុះក្នុងសៀវភៅកំណត់ត្រាឯតទគ្គកម្មពិភពលោក។
ដោយឡែកកំណត់ត្រាឯតទគ្គកម្មពិភពលោកត្រូវបានចុះបញ្ជីទៅលើស៊ុតមាន់មួយមានប្រវែង២,៧សង្ទីម៉ែត្រ ខណៈដែលបុរសម្នាក់នៅចក្រភពអង់គ្លេស ក៏បានអះអាងកាលពីខែឧសភា ឆ្នាំនេះថា គាត់មានស៊ុតមាន់មួយដែលតូចជាងនេះ២មីល្លីម៉ែត្រទៀត ដែលកំពុងតែទាមទារចុះក្នុងកំណត់ត្រាដែរ ។
លោក Russel និយាយថា គាត់នៅតែមិនទាន់សម្រេចចិត្តថា តើគួរត្រូវចុះក្នុងបញ្ជីរបស់ហ្គីណេសប៊ុក ឬយ៉ាងណាទេ។ ប៉ុន្តែគាត់កំពុងតែមានគម្រោងរក្សាស៊ុតនេះទុក ដោយដាក់ឈ្មោះវាថា «John Spencer Russel Egg»ដើម្បីផ្តល់កិត្តិយសដល់ចៅប្រុសពីរនាក់របស់គាត់ឈ្មោះ John Kenny Ressel និង Spencer Matthew Russel ៕
ចែករំលែកព័តមាននេះ