លោកស្រី CATHERINE ASHTON តំណាងជាន់ខ្ពស់របស់សហភាពអឺរ៉ុបទទួលបន្ទុកកិច្ចការបរទេស និងនយោបាយសន្តិសុខប្រកាសកាលពីថ្ងៃទី២៣ សីហា នៅទីក្រុងព្រុចសែល ថា សហភាពអឺរ៉ុបនឹងបញ្ចេញទ្រព្យសម្បត្តិរបស់រដ្ឋលីប៊ី ដែលផ្អឹបទុកសម្រាប់ផ្គត់ផ្គង់ខាងហិរញ្ញវត្ថុដល់ការកសាងប្រទេសឡើងវិញ ។
ក្នុងសន្និសីទសារព័ត៌មានមួយប្រមុខការទូត របស់សហភាពអឺរ៉ុបរូបនេះឱ្យដឹងថា ផែនការសេដ្ឋកិច្ចរបស់លីប៊ីក្រោយជម្លោះជាកម្មវត្ថុនៃការពិភាក្សាគ្នានានា ។ បញ្ហាដំបូងៗនៃសេដ្ឋកិច្ច គឺការបញ្ចេញទ្រព្យសម្បត្តិទាំងឡាយដែលផ្អឹបទុករបស់ប្រទេសនេះ ។ លោកស្រីបន្តថា លីប៊ីជាប្រទេសមួយដែលមានទ្រព្យសម្បត្តិយ៉ាងមហាសាលព្រោះជាប្រទេសអ្នកមានមួយ ។ បញ្ហានៅត្រង់ថា តើយើងត្រូវជំរុញសេដ្ឋកិច្ចរបស់ប្រទេសនេះយ៉ាងណាឱ្យបានឆាប់រហ័ស ។ ក្រោយរបបលោកកាដាហ្វីយើងត្រូវបញ្ចេញទ្រព្យសម្បត្តិទាំងឡាយរបស់ប្រទេសនេះ ។
សហភាពអឺរ៉ុប និងសហរដ្ឋអាមេរិកបានផ្អឹប ទុកទ្រព្យសម្បតិ្តរបស់លីប៊ីមានទឹកប្រាក់ប្រមាណជាជាង៦០ពាន់លានដុល្លារក្នុងធនាគារបរទេសទាំងឡាយ ។ អ្នកនាំពាក្យក្រសួងការបរទេសអាមេរិកលោកស្រី VICTORIA NULAND ថ្លែងថា សហរដ្ឋអាមេរិកកំពុងធ្វើការ ដើម្បីបញ្ចេញនាប៉ុន្មានថ្ងៃខាងមុខនេះ នូវទឹកប្រាក់រវាងពី១០០០ ទៅ១៥០០លានដុល្លារជាទ្រព្យសម្បត្តិលីប៊ីដែលផ្អឹបទុកដើម្បីជួយដល់ពួកឧទ្ទាមលីប៊ី ។ លោកស្រីប្រកាសកាលពីថ្ងៃទី២៣ សីហា ថា ទឹកប្រាក់ទាំងនេះនឹងត្រូវផ្ទេរទៅឱ្យក្រុមប្រឹក្សាជាតិបណ្តោះអាសន្នលីប៊ី CNT សម្រាប់ឆ្លើយតបដល់សេចក្តីត្រូវការទាំងឡាយខាងមនុស្សធម៌ និងដើម្បីជួយដល់ការបង្កើតរដ្ឋាភិបាលប្រាកដប្រជា និងមានស្ថិរភាពមួយ ៕
ចែករំលែកព័តមាននេះ