អាជ្ញាធរមូលដ្ឋានរាយការណ៍ថា អគ្គិភ័យមួយកើតមានកាលពីព្រឹកថ្ងៃទី២៣ សីហា ក្នុងរោងចក្រសេរ៉ាមិកមួយបណ្តាលឱ្យស្លាប់មនុស្ស១៥នាក់ ហើយមនុស្សម្នាក់ទៀតរបួសធ្ងន់ ក្នុងខេត្ត ហ្គង់ដុង ភាគខាងកើតប្រទេសចិន។
ភ្លើងឆាបឆេះនាវេលាម៉ោង៦និង១៨នាទីម៉ោងក្នុងស្រុកក្នុងអគាររោងចក្រ SHENG-FENG CERAMICS COMPANY ស្ថិតក្នុងស្រុក SANSHUI ក្រុងហ្វូសាន។ ក្នុងចំណោមជនរងគ្រោះមនុស្ស១២នាក់ស្លាប់ក្នុងភ្លើង ហើយមនុស្ស២នាក់ទៀតស្លាប់ពេលលោតចេញតាមបង្អួចអគារមានកម្ពស់៤ជាន់ ចំណែកមនុស្សម្នាក់ទៀតស្លាប់នៅមន្ទីរពេទ្យ។ ភ្លើងបានឆាបឆេះដំបូងនៅជាន់ទី២ នៃអគាររោងចក្រ ហើយឆេះរាលដាលយ៉ាងឆាប់ដល់ជាន់ឯទៀតៗ។
មូលហេតុនៃគ្រោះអគ្គិភ័យនេះនៅពុំទាន់ដឹងនៅឡើយ។ អ្នកពន្លត់ភ្លើង១០០នាក់ និងរថយន្តទឹក២៤គ្រឿង ត្រូវបានកេណ្ឌប្រមូល។ ភ្លើងត្រូវបានពន្លត់ប្រមាណជា២ម៉ោងក្រោយមក។ តំណាងស្របច្បាប់របស់រោងចក្រនេះ លោក HUO JINHONG អាយុ៤៦ឆ្នាំ ត្រូវប៉ូលិសចាប់ឃុំខ្លួន។ ការស៊ើបអង្កេតមួយត្រូវបើកធ្វើដើម្បីកំណត់ពីមូលហេតុនៃគ្រោះថ្នាក់នេះ៕
ចែករំលែកព័តមាននេះ