ខេត្តបាត់ដំបង ៖ និស្សិតស្រវឹងធ្លាក់ភ្នែកម្នាក់ត្រូវសមត្ថកិច្ច ចរាចរខេត្តចាប់ញាត់ចូលដេកក្នុងទ្រុងដែកអស់មួយយប់ ខណៈដែលជននេះបើករថយន្តបុកអ្នកជិះម៉ូតូដួលពេញថ្នល់ ហើយព្យាយាមបើករត់ តែបែរជាកុហកសមត្ថកិច្ចថា បើករកអ្នកដែលគប់កញ្ចក់រថយន្តទៅវិញ។
ខេត្តបាត់ដំបង ៖ និស្សិតស្រវឹងធ្លាក់ភ្នែកម្នាក់ត្រូវសមត្ថកិច្ចចរាចរខេត្តចាប់ញាត់ចូលដេកក្នុងទ្រុងដែកអស់មួយយប់ ខណៈដែលជននេះបើករថយន្តបុកអ្នកជិះម៉ូតូដួលពេញថ្នល់ ហើយព្យាយាមបើករត់ តែបែរជាកុហកសមត្ថកិច្ចថា បើករកអ្នកដែលគប់កញ្ចក់រថយន្តទៅវិញ។
តាមព័ត៌មានពីមន្ត្រីសមត្ថកិច្ចនិយាយថា និស្សិតនោះឈ្មោះប៊ុន រិទ្ធ ហៅទី ភេទប្រុស អាយុ២៣ឆ្នាំ រស់នៅភូមិទួលតាឯក សង្កាត់ទួលតាឯក ក្រុងបាត់ដំបង។ ជននេះបានបើករថយន្តម៉ាកនីស្សាន់ ពណ៌កាប់ស្តាំង ពាក់ស្លាកលេខ ២ពោធិ៍សាត់ 2A-0494 បុកអ្នកជិះម៉ូតូនៅចំណុចខាងកើតស្ពានថ្មថ្មី (អតីតស្ពានដែក) ក្នុងភូមិរំចេក៤ សង្កាត់រតនៈ កាលពីវេលាម៉ោង៨និង១៥នាទីយប់ថ្ងៃទី២២ សីហា បណ្តាលឱ្យស្ត្រី៣នាក់ និងក្មេងតូចម្នាក់ដែលរួមដំណើរជាមួយដួលរដូករណែលលើចិញ្ចើមថ្នល់។ ក្រោយពេលបុក រថយន្តបានព្យាយាមបើករត់ តែត្រូវកម្លាំងនគរបាលព្រហ្មទណ្ឌខេត្តបានដេញតាមរថយន្តបង្កនេះធ្វើឱ្យភ្ញាក់ផ្អើលពេញក្រុង លុះមកដល់ខាងមុខមន្ទីពេទ្យអង្គការ Emergency ទើបចាប់បាន។
ក្រោយពេលសមត្ថកិច្ចស្ទាក់ជាប់ឈ្មោះប៊ុន រិទ្ធ ហៅទី ស្ថិតក្នុងស្ថានភាពស្រវឹងធ្លាក់ភ្នែក ដែលរួមដំណើរជាមួយមិត្តភក្តិម្នាក់ទៀតបាននិយាយថា ភាគីម៉ូតូបានមកបុករថយន្តខ្លួន ខណៈដែលកំពុងបើកបរធ្វើដំណើរបញ្ច្រាសទិសគ្នា ហើយនិស្សិតប្រមឹកនេះបានកុហកសមត្ថកិច្ចថា ខ្លួនមិនបានបើករត់ទេ គឺបើករកមើលមុខអ្នកដែលគប់កញ្ចក់រថយន្តខ្លួន។
ប៉ុន្តែស្ត្រីរងគ្រោះឈ្មោះថេង គឹមសេង អាយុ២៨ឆ្នាំ ភាគីម៉ូតូបានប្រាប់សមត្ថកិច្ចថា រថយន្តនេះបានរេចង្កូតទៅបុកនាងទាំងកម្រោល ធ្វើឱ្យពួកគាត់៤នាក់ក្នុងនោះក្មេងតូចម្នាក់ផងដួលដេករដូករណែលទៅលើចិញ្ចើមថ្នល់ ហើយរថយន្តព្យាយាមបើករត់បាត់។ សាក្សីនិយាយថា រថយន្តនេះ ជាអ្នកបង្កហេតុជ្រុលចង្កូតទៅបុកអ្នកជិះម៉ូតូទាំងកម្រោល។
មន្ត្រីនគរបាលចរាចរខេត្តដែលបានចុះពិនិត្យកន្លែងកើតហតុបានបញ្ជាក់ថា និស្សិតប្រមឹកនេះពិតជាបានបើករថយន្តជ្រុលចង្កូតទៅខាងឆ្វេងដៃបណ្តាលឱ្យប៉ះពារអ្នកជិះម៉ូតូមែន តែសំណាងល្អអ្នកជិះម៉ូតូរងរបួសស្រាល និងខូចខាតតែម៉ូតូប៉ុណ្ណោះហើយយើងកំពុងធ្វើការដោះស្រាយតាមផ្លូវច្បាប់៕
ចែករំលែកព័តមាននេះ