ពួកឧទ្ទាមលីប៊ីសន្យាតាមចាប់ខ្លួនលោកមូអាម៉ា កាដាហ្វី ឱ្យបានហើយអូតង់បានបន្តនាព្រឹកព្រលឹមថ្ងៃទី២៣ សីហា នូវការវាយប្រហារតាមអាកាសលើប្លុកអគារជាទីតាំងរឹងមាំរបស់លោកកាដាហ្វីនៅក្រុងទ្រីប៉ូលី ។
ក្នុងសន្និសីទសារព័ត៌មានមួយកាលពីថ្ងៃទី២២ សីហា លោកមូស្តាហ្វា អាប់ដែល ចាលីល ប្រមុខក្រុមប្រឹក្សាជាតិបណ្តោះអាសន្នលីប៊ីគូសបញ្ជាក់ថា សករាជរបស់លោកកាដាហ្វីត្រូវបានបញ្ចប់ ហើយជោគជ័យនៃបដិវត្តន៍លីប៊ីត្រូវមាននិមិត្តរូប គឺការចាប់ខ្លួនលោកកាដាហ្វី ។
លោកបានសន្យាថា លោកកាដាហ្វីនឹងត្រូវទទួលការកាត់ទោសដោយត្រឹមត្រូវ ប្រសិនបើត្រូវចាប់ខ្លួនបានទាំងរស់ ។ ទីក្រុងទ្រីប៉ូលីស្ថិតក្រោមការត្រួតត្រាទាំងស្រុងរបស់ពួកឧទ្ទាមលើកលែងតែតំបន់ BAB AL AZIZIYAH ជាមជ្ឈមណ្ឌលទីបញ្ជាការចាប់តាំងពីយូរមកហើយ របស់លោកកាដាហ្វី ។ ប្រមុខក្រុមឧទ្ទាមរូបនេះបន្តថា កន្លែងលាក់ខ្លួនរបស់លោកកាដាហ្វីនៅពុំទាន់ដឹងនៅឡើយ ។
ទីក្រុងSURT និងទីក្រុងសាបាហ៍ ស្ថិតក្នុងកណ្តាប់ដៃរបស់កងកម្លាំង ស្និទ្ធិលោកកាដាហ្វីនៅឡើយ ។ ក៏ប៉ុន្តែលោកជឿជាក់ថា កងកម្លាំងទាំងនោះនឹងអាចក្រោកបះបោរពីខាងក្នុងពេលការហ៊ុមព័ទ្ធទីក្រុងទាំងនោះត្រូវលុបចេញ ។ លោកអាប់ដែលចាលីលអះអាងថា ប្រទេសលីប៊ីថ្មីនឹងជារដ្ឋប្រកាន់ជំហរកណ្តាលមួយ និងជាសមាជិកដែលមានការទទួលខុសត្រូវរបស់សហគមន៍អន្តរជាតិជាមួយក្រុងទ្រីប៉ូលីជាអនាគតរដ្ឋធានី ៕
ចែករំលែកព័តមាននេះ