ខេត្តសៀមរាប ៖ ប្រជាពលរដ្ឋប្រមាណជាង៤០០នាក់ មកពីសហគមន៍ចំនួន៤ នៅទូទាំងប្រទេសកម្ពុជា បានរួបរួមគ្នារៀបចំធ្វើបុណ្យមួយដែលគេដាក់ឈ្មោះថា «សិទ្ធិសេរីភាពនៃអ្នកជាប់ពន្ធនាគារទាំង១២នាក់» ដែលត្រូវបានជាប់គុកជាង២ឆ្នាំ ក្នុងជម្លោះដីធ្លីនៅជីក្រែងនិងវេទិកាសហគមន៍ស្តីពីសិទ្ធិ សេដ្ឋកិច្ច សង្គមកិច្ច និង
ខេត្តសៀមរាប ៖ ប្រជាពលរដ្ឋប្រមាណជាង៤០០នាក់ មកពីសហគមន៍ចំនួន៤ នៅទូទាំងប្រទេសកម្ពុជា បានរួបរួមគ្នារៀបចំធ្វើបុណ្យមួយដែលគេដាក់ឈ្មោះថា «សិទ្ធិសេរីភាពនៃអ្នកជាប់ពន្ធនាគារទាំង១២នាក់» ដែលត្រូវបានជាប់គុកជាង២ឆ្នាំ ក្នុងជម្លោះដីធ្លីនៅជីក្រែងនិងវេទិកាសហគមន៍ស្តីពីសិទ្ធិសេដ្ឋកិច្ច សង្គមកិច្ច និងវប្បធម៌ដើម្បីប្រោះព្រំឱ្យពរជ័យជូនដល់សហគមន៍និងនាំមកនូវសេចក្តីសុខចំរើននិងយុត្តិធម៌។
ពិធីបុណ្យនេះប្រារព្ធធ្វើឡើងកាលពីព្រឹកថ្ងៃទី២១ សីហា ឆ្នាំ២០១១ នៅឯបរិវេណវត្តថ្មី ស្ថិតនៅក្នុងភូមិជីក្រែងឃុំជីក្រែង ស្រុកជីក្រែង ដែលជាកន្លែងកើតមានជម្លោះដីស្រែប្រាំងដ៏រ៉ាំរ៉ៃរហូតកើតមានអំពើហិង្សារវាងក្រុមសមត្ថកិច្ចជាមួយក្រុមអ្នកភូមិដែលក្រាញននៀលការពារដីស្រែប្រាំងកាលពីអំឡុងខែមីនាឆ្នាំ២០០៩កន្លងទៅ និងមានការចូលរួមដោយប្រជាពលរដ្ឋប្រមាណជាង៤០០នាក់មកពីសហគមន៍ចំនួន៤ រួមមានសហគមន៍បឹងកក់ សហគមន៍វ៉ារិន សហគមន៍បន្ទាយស្រី សហគមន៍ជីក្រែង ព្រះភិក្ខុលួន សាវ៉ាត តំណាងសមាគមការពារសិទ្ធិមនុស្សអាដហុក តំណាងអង្គការសហប្រជាជាតិទទួលបន្ទុកផ្នែកសិទ្ធិមនុស្ស អាជ្ញាធរដែនដី ជាពិសេសអ្នកឧកញ៉ាសៀង ណាំ តំណាងរាស្ត្រមណ្ឌលសៀមរាបផងដែរ។
ក្រុមអ្នកភូមិបានថ្លែងថា អាជ្ញាធរបានប្រឹងប្រែងរារាំងមិនឱ្យបុណ្យនេះអាចដំណើរការទៅបានដោយបញ្ជូនកម្លាំងប្រដាប់អាវុធរួមមានប៉ូលិស និងកងរាជអាវុធហត្ថជាច្រើននាក់មកដាក់ទីធ្លាវត្ត និងតាមផ្លូវធ្វើដំណើរមកកាន់វត្តតាំងពីមួយថ្ងៃមុន ប៉ុន្តែដោយមានការជួយអន្តរាគមន៍ពីអ្នកឧកញ៉ាសៀង ណាំ តំណាងរាស្ត្រមណ្ឌលសៀមរាបទើបគេអនុញ្ញាត។
កាលពីព្រឹកថ្ងៃទី២១ សីហា នៅវត្តដែលជាកន្លែងប្រារព្ធពិធីបុណ្យនោះអ្នកភូមិឈ្មោះឆេង សាវៀន ដែលជាអ្នកនៅក្នុងចំណោមតំណាងទាំង១២ រូបដែលត្រូវបានចាប់ដាក់គុកនៅក្នុងជម្លោះដីស្រែប្រាំងកាលពីដើមឆ្នាំ២០០៩ កន្លងទៅនោះបានរៀបរាប់ថា ពិធីបុណ្យនេះធ្វើឡើងទៅតាមគន្លងព្រះពុទ្ធសាសនា ដើម្បីជាការលាបំណន់របស់ប្រជាសហគមន៍រងគ្រោះក្នុងរឿងជម្លោះដីស្រែប្រាំងដែលបានបួងសួងសូមបារមីវត្ថុសក្កិសិទ្ធិជួយឱ្យតំណាងពួកគាត់ទាំង១២ នាក់ដែលកំពុងជាប់គុកឱ្យបានរួចផុតពីការចោទប្រកាន់ និងសុវត្ថិភាពវិញ។ ការបួងសួងរបស់ពួកគាត់បានសម្រេច ទើបមានការរៀបចំពិធីបុណ្យនេះឡើង។
លោកឆេង សាវៀន បញ្ជាក់ទៀតថាតំណាងអ្នកភូមិជីក្រែងទាំង១២រូបដែលត្រូវជាប់ដាក់គុកអស់រយៈកាលជាង២ឆ្នាំដែលគេ ធ្វើពិធីប្រោះព្រំជ័យឱ្យនោះរួមមាន១-រូបគាត់េឆង សាវឿន ២-ឈ្មោះមិន សាយ ៣-ឈ្មោះចាន់ ណូន ៤-ម៉ាសេក ៥-ឈ្មោះវ៉ាន ចាន់ ៦-ឈ្មោះអ៊ូច គី ៧-ញ៉ែម ប្លោក ៨-ជា ខុម ៩-មិ ភ័ក្រ ១០-សឹម លាប ១១-ឃ្លីន លប ១២-ចាន់ លាប។
ក្នុងពិធីបុណ្យនោះ អ្នកឧកញ៉ាសៀង ណាំ មានប្រសាសន៍ថា រឿងរ៉ាវទាំងអស់វាបានកន្លងផុតទៅហើយ ដូច្នេះសូមកុំឱ្យអ្នកឃុំជីក្រែង និងអ្នកឃុំអន្លង់សំណ ដែលជាភូមិផងរបងជាមួយមានការគុំកួនគ្នាតទៅទៀត ផ្ទុយទៅវិញត្រូវស្រឡាញ់គ្នាលើសពីពេលកន្លងទៅ។
អ្នកឧញ៉ាបន្តទៀតថា លោកបានជួយអភិវឌ្ឍហេដ្ឋារចនាសម្ព័ន្ធក្នុងមូលដ្ឋានទាំងពីរនោះច្រើនណាស់មានតាំងពីស្ពាន ផ្លូវថ្នល់ ដូច្នេះលោកមិនចង់ឃើញប្រជាពលរដ្ឋឈ្លោះគ្នាយ៉ាងនេះទេ ហើយបើសិនជាយើងទាំងអស់គ្នាពិតជាមានការខ្វះដីបង្កបង្កើនផលពិតសូមធ្វើបញ្ជីឱ្យបានត្រឹមត្រូវស្នើមកអាជ្ញាធរលោកនឹងជួយអន្តរាគមន៍រកជីដូន។ អ្នកឧកញ៉ាសៀង ណាំ បានចូលបុណ្យចំនួន៥០០ដុល្លារអាមេរិកចផងដែរ។
អ្នកិឃុំអន្លង់សំណ និងអ្នកឃុំជីក្រែង បានកើតមានជម្លោះគ្នាយ៉ាងតឹងតែងតាំងពីអំឡុងឆ្នាំ២០០៨ ក្នុងរឿងដីស្រែប្រាំងទំហំជាង៤០ហិកតា នៅទំនប់សួង ទំនប់៧៨ ហើយកាលពីថ្ងៃទី២២ មីនា ឆ្នាំ២០០៩ មានការប៉ះទង្គិចគ្នាដោយហិង្សាមួយរវាងប្រជាពលរដ្ឋសហគមន៍ឃុំជីក្រែង ជាមួយសមត្ថកិច្ចមួយក្រុមដែលចុះអនុវត្តដីការបស់សាលាខេត្តសៀមរាបរហូតដល់សមត្ថកិច្ចផ្ទុះអាវុធបណ្តាលឱ្យអ្នកភូមិ៤នាក់ រងបួសក្រោយមកតំណាងអ្នកភូមិចំនួន១២រូបត្រូវបានចាប់ខ្លួនយកទៅដាក់គុកជាបន្តបន្ទាប់ បណ្តាលឱ្យប្រជាសហគមន៍នោះលើកគ្នាមកតវ៉ានៅមុខសាលាដំបូងខេត្តសៀមរាបជាច្រើនលើកច្រើនសាដែលមួយលើកនោះក្រុមអ្នកភូមិបានចាក់សោរបងអគារសាលារដ្ឋបាលសាលាដំបូងផងដែរ៕
ចែករំលែកព័តមាននេះ