ខេត្តមណ្ឌលគិរី ៖ ដោយមានដីកាពីព្រះរាជអាជ្ញាអមសាលាដំបូងខេត្ត និងដឹកនាំកម្លាំងផ្ទាល់ពីលោកសោ វុទ្ធី ព្រះរាជអាជ្ញារង លោកអ៊ុំ សុវណ្ណសុភៈ នាយផ្នែករដ្ឋបាលព្រៃឈើ និងលោកកែវ សុភគ៌ ប្រធានព្រែកពៅកោះញែក ព្រមទាំងមានការចូលរួមពីកងកម្លាំងប្រដាប់អាវុធទាំងបីប្រភេទ និងលោកមេភូមិ មេឃុំផងដែរបានឆែកឆេរលំនៅឋានមួយស្ថិតនៅក្នុងភូមិពូជ្រៃចាង ឃុំពូជ្រៃ ស្រុកពេជ្រាដារកឃើញឈើប្រណីតមានបេង ធ្នង់ នាងនួន ជាច្រើនម៉ែត្រគូបដែលគេលាក់ទុកខាងក្រោយផ្ទះ និងនៅក្នុងឃ្លាំង។ ការបង្ក្រាបនេះចាប់ផ្តើមនៅម៉ោង៩ និង១០នាទីព្រឹក ថ្ងៃទី១៨ សីហា។
ម្ចាស់ផ្ទះនោះឈ្មោះសុខ ខឿន ភេទប្រុស អាយុប្រហែល៥០ឆ្នាំ ប្រពន្ធឈ្មោះណាវី អាយុប្រហែល៤០ឆ្នាំ ។ ពេលចូលទៅដល់ខាងក្រោយផ្ទះសមត្ថកិច្ចបានឃើញឈើប្រណីតមុខកាត់តូចធំប្រវែងប្រហែលបីម៉ែត្រចំនួន៥៣ដុំ ។ លោកសោ វុទ្ធី បញ្ជាឱ្យសមត្ថកិច្ចគាស់ទ្វារឃ្លាំងមួយនៅក្រោយផ្ទះឃើញឈើប្រណីត១០២ដុំទៀត សរុបទាំងអស់មានចំនួន១៥៥ដុំ ។ ឈើទាំងអស់ត្រូវសមត្ថកិច្ចជំនាញវាស់វែង និងរឹបអូស។
លោកកែវ សុភគ៌ ប្រធានព្រែកពៅមណ្ឌលគិរីនៃអង្គការ WWF ឱ្យដឹងមូលហេតុដែលឈានដល់ការឡោមព័ទ្ធលំនៅឋាននោះ ព្រោះតែមានសេចក្តីរាយការណ៍ពីប្រជាពលរដ្ឋថា ឈើប្រណីតជាច្រើនម៉ែត្រគូបត្រូវគេយកទៅលាក់ទុក។ លោកបញ្ជាកម្លាំងឃ្លាំមើលពេញមួយយប់ ហើយនៅព្រឹកថ្ងៃទី១៨ ខែសីហា លោកសុំកម្លាំងសហការបន្ថែមមាននាយផ្នែករដ្ឋបាលមន្ត្រីខណ្ឌ និងកងកម្លាំងប្រដាប់អាវុធ ព្រមទាំងមានប្រជាពលរដ្ឋ អាជ្ញាធរចូលរួមឆែកឆេរ ។ ក្នុងករណីនេះដែរក៏មានដីកាផ្ទាល់ពីលោកឃុត សុភាង ព្រះរាជអាជ្ញាអមសាលាដំបូងខេត្តផងដែរ។
លោកបន្ថែមទៀតថា ឈើប្រណីតទាំងនោះកំពុងវាស់វែងមិនទាន់ដឹងថា ចំនួនប៉ុន្មានទេ រីឯម្ចាស់ផ្ទះមិនឃើញនៅក្នុងផ្ទះទេ។ លោកនឹងខិតខំដឹកនាំកម្លាំងដើម្បីបង្ក្រាបបទល្មើសដែលកើតមានបន្តទៀត ៕
ចែករំលែកព័តមាននេះ