រាជធានីភ្នំពេញ ៖ សមាគមអាជីវករចែកចាយកាសែតរាជធានីភ្នំពេញកាលពីថ្ងៃទី១៦ សីហា ឆ្នាំ២០១១ បានរៀបចំសន្និបាតបូកសរុបសកម្មភាពការងារអាណត្តិទី១ និងជ្រើសរើសក្រុមប្រឹក្សាសម្រាប់អាណត្តិថ្មីដោយមានការចូលរួម ពីលោកប៉ែន សមិទ្ធិ ប្រធានក្លឹបអ្នកកាសែតកម្ពុជា លោកឃុត សំខាន់ អនុប្រធានមន្ទីរព័ត៌មានរាជ
រាជធានីភ្នំពេញ ៖ សមាគមអាជីវករចែកចាយកាសែតរាជធានីភ្នំពេញកាលពីថ្ងៃទី១៦ សីហា ឆ្នាំ២០១១ បានរៀបចំសន្និបាតបូកសរុបសកម្មភាពការងារអាណត្តិទី១ និងជ្រើសរើសក្រុមប្រឹក្សាសម្រាប់អាណត្តិថ្មីដោយមានការចូលរួមពីលោកប៉ែន សមិទ្ធិ ប្រធានក្លឹបអ្នកកាសែតកម្ពុជា លោកឃុត សំខាន់ អនុប្រធានមន្ទីរព័ត៌មានរាជធានីភ្នំពេញ និងលោកយ៉ែម ណយ ប្រធាននាយកដ្ឋានមណ្ឌលព័ត៌មាននៃក្រសួងព័ត៌ មាន និងអាជីវករលក់កាសែតក្នុងរាជធានីភ្នំពេញ ប្រមាណជាង១០០នាក់ ។
លោកស្រីហុក ប៊ុនណាត ប្រធានក្រុមប្រឹក្សា សមាគមអាជីវករចែកចាយកាសែតមានប្រសាសន៍ថា សមាគមនេះបានចាប់កំណើតឡើងនៅឆ្នាំ២០០៦ ហើយរយៈពេល៥កន្លងមកនេះ សមាគមបានធ្វើសកម្មភាពជាច្រើនដើម្បីការពារ និងបម្រើផលប្រយោជន៍អាជីវករលក់កាសែតរួមចំណែកក្នុងការអភិវឌ្ឍប្រជាធិបតេយ្យនៅកម្ពុជា ។ ប៉ុន្តែអ្វីដែលជាការកត់សម្គាល់នោះគឺមានបញ្ហាប្រឈមជាច្រើនបាននិងកំពុងរារាំងដល់ដំណើរការសកម្មភាពសមាគម រួមមានកម្រិតសមត្ថភាពដឹកនាំរបស់ក្រុមប្រឹក្សានៅទាប កង្វះខាតបទពិសោធន៍ និងថវិកា រួមទាំងបញ្ហាអាជ្ញាធរដែលនៅតែបន្តបណ្តេញតូបលក់កាសែតចេញពីទីតាំងក្រោមរូបភាពនៃការអភិវឌ្ឍទីក្រុង ។
លោកស្រីហុក ប៊ុនណាត បានអំពាវនាវដល់អាជ្ញាធរគ្រប់ថ្នាក់ សំខាន់អាជ្ញាធរដែនដីឱ្យយោគយល់ និងអធ្យាស្រ័យចំពោះកង្វះខាតមួយចំនួនរបស់អាជីវករលក់កាសែតដោយយកវិធានការអប់រំណែនាំមកជំនួសការបណ្តេញចេញដោយគ្មានមូលហេតុ និងបង្កើតឱ្យមានជាវេទិកាពិភាក្សាគ្នាមុននឹងសម្រេចបណ្តេញតូបលក់កាសែតពីទីតាំងកំពុងលក់ដូរ ។
លោកប៉ែន សមិទ្ធិ ប្រធានក្លឹបអ្នកកាសែត កម្ពុជាបានថ្លែងកោតសរសើរចំពោះអាជីវករលក់កាសែតដែលពុះពារការលំបាកបង្កើតសមាគមអាជីវករចែកចាយកាសែតដោយខ្លួនឯង ។ សមាគមនេះបានធ្វើសកម្មភាពជាច្រើនក្នុងការការពារផលប្រយោជន៍របស់អាជីវករលក់កាសែតក្នុងរាជធានីភ្នំពេញ ។
លោកប្រធានក្លឹបអ្នកកាសែតកម្ពុជាអំពាវនាវឱ្យអាជីវករចូលរួមឱ្យបានសកម្មថែមទៀតក្នុងសកម្មភាពសមាគម ដើម្បីសមាគមមានលទ្ធភាពក្នុងការបំពេញការងារជួយអាជីវករវិញ ។ លោកបញ្ជាក់ថា តូបលក់កាសែតមានសារសំខាន់ខ្លាំងណាស់ ចំពោះសារព័ត៌មានបោះពុម្ពក្នុងពេលដែលវិស័យនេះកំពុងមានការរីកចម្រើន ប៉ុន្តែមួយរយៈចុងក្រោយនេះតូបលក់កាសែតត្រូវប្រឈមនឹងការបណ្តេញចេញដែលធ្វើឱ្យចំនួនតូបមានការថយចុះ និងជះឥទ្ធិពលដល់ចំនួននៃការបោះពុម្ពផ្សាយរបស់សារព័ត៌មាន ។
នាឱកាសនោះ សមាជិកសមាគមអាជីវករចែកចាយកាសែតបានជ្រើសរើសតំណាងចំនួន៩រូបជាក្រុមប្រឹក្សាសមាគមសម្រាប់អាណត្តិទី២ក្នុងនោះលោកស្រីហុក ប៊ុនណាត ត្រូវបានជ្រើសរើសជាប្រធានសម្រាប់អាណត្តិទី២បន្តទៀត ។
កាលពីប៉ុន្មានឆ្នាំមុន តូបលក់កាសែតក្នុងរាជធានីភ្នំពេញមានចំនួន១៨៣ តូប ប៉ុន្តែបច្ចុប្បន្ននេះនៅសល់តែចំនួន១២៦តូបប៉ុណ្ណោះ ។ ការថយចុះតូបលក់កាសែតនេះមិនមែនបណ្តាលមកពីការលក់កាសែតមិនដាច់ទេ គឺតូបភាគច្រើនត្រូវអាជ្ញាធររុះរើ និងបណ្តេញចេញ ៕
ចែករំលែកព័តមាននេះ