រាជធានីភ្នំពេញ ៖ ស្ថានទូតឥណ្ឌូណេស៊ី ប្រចាំកម្ពុជាកាលពីព្រឹកថ្ងៃទី១៧ សីហា ឆ្នាំ២០១១ បានរៀបចំពិធីបុណ្យរំលឹកខួបលើកទី៦៦នៃថ្ងៃឯករាជ្យរបស់ខ្លួនដោយ មានការចូលរួមពីលោក Sochard Jono Sastro miharjo ឯកអគ្គរដ្ឋទូតឥណ្ឌូណេស៊ីប្រចាំកម្ពុជា រួមទាំងមន្ត្រីស្ថានទូតឥណ្ឌូណេស៊ីជាច្រើនរូប។
រាជធានីភ្នំពេញ ៖ ស្ថានទូតឥណ្ឌូណេស៊ី ប្រចាំកម្ពុជាកាលពីព្រឹកថ្ងៃទី១៧ សីហា ឆ្នាំ២០១១ បានរៀបចំពិធីបុណ្យរំលឹកខួបលើកទី៦៦នៃថ្ងៃឯករាជ្យរបស់ខ្លួនដោយមានការចូលរួមពីលោក Sochard Jono Sastro miharjo ឯកអគ្គរដ្ឋទូតឥណ្ឌូណេស៊ីប្រចាំកម្ពុជា រួមទាំងមន្ត្រីស្ថានទូតឥណ្ឌូណេស៊ីជាច្រើនរូប។
លោក Sochard Jono Sastromiharjo មានប្រសាសន៍ថា ប្រទេសឥណ្ឌូណេស៊ីបានប្រកាសឯករាជ្យនាថ្ងៃទី១៧ សីហា ឆ្នាំ ១៩៤៥ ពីអាណានិគមនៃប្រទេសហូឡង់ ហើយមកដល់ពេលនេះមានរយៈពេល៦៦ឆ្នាំហើយ ។
ពាក់ព័ន្ធដល់បញ្ហាកម្ពុជា-ថៃលោកឯកអគ្គរដ្ឋទូតបានបញ្ជាក់ថា ប្រទេសឥណ្ឌូណេស៊ីបានដើរតួនាទីយ៉ាងសំខាន់កន្លងមកក្នុងការស្វែងរកសន្តិភាពជូនប្រទេសកម្ពុជា ហើយពេលកម្ពុជាមានជម្លោះជាមួយថៃ គឺឥណ្ឌូណេស៊ីក៏បានបង្ហាញសុច្ឆន្ទៈ ចូលរួមដោះស្រាយបញ្ហានោះបន្តទៀត ។ បច្ចុប្បន្ននេះ ឥណ្ឌូណេស៊ីបានត្រៀមកម្លាំងអ្នកសង្កេតការណ៍រួចរាល់អស់ហើយ ហើយរង់ចាំតែពេលវេលាបញ្ជូនមកកាន់តំបន់មានជម្លោះប៉ុណ្ណោះ ។
លោក Sochardjono ថ្លែងថា លោកបានទទួលព័ត៌មានថា ភាគីកម្ពុជាបានដកទ័ពខ្លះហើយ តែភាគីថៃមិនទាន់ទទួលបានព័ត៌មាននៅឡើយទេ អំពីការដកទ័ពនេះ ។ ប្រសិនបើភាគីកម្ពុជា-ថៃស្រុះស្រួលគ្នាក្នុងការដកទ័ពនោះ គឺអ្នកសង្កេតការណ៍ឥណ្ឌូណេស៊ីនឹងបញ្ជូនទៅកាន់តំបន់គ្មានយោធា ដែលកំណត់ដោយ ICJ ដើម្បីពិនិត្យមើលការដកទ័ពនៃភាគីទាំងពីរ ។ ក្នុងនាមជាសមាជិកអាស៊ានដូចគ្នា ឥណ្ឌូណេស៊ី នឹងធ្វើការងារដើម្បីផលប្រយោជន៍នៃប្រទេសទាំងពីរ និងមិនលំអៀងទៅប្រទេសណាមួយទេ។
លោកឯកអគ្គរដ្ឋទូតអះអាងថា អាស៊ាននឹងដោះស្រាយបាននូវជម្លោះរវាងកម្ពុជា និងថៃ ហើយដំណោះស្រាយនេះនឹងត្រួសត្រាយផ្លូវសម្រាប់សហគមន៍អាស៊ាននាឆ្នាំ២០១៥ខាងមុខ ។
ទាក់ទិននឹងទំនាក់ទំនងពាណិជ្ជកម្មរវាងកម្ពុជា និងឥណ្ឌូណេស៊ីលោក Sachard Jone លើកឡើងថា កន្លងមកនេះទំនាក់ទំនងពាណិជ្ជកម្មរវាងប្រទេសទាំងពីរ គឺមានកំណើនដល់១២% ជារៀងរាល់ឆ្នាំ ហើយបន្តទៅមុខទៀតយើងនឹងធ្វើឱ្យកើនឡើងទៀត ។ អ្វីជាសំខាន់នោះគឺកម្ពុជា សំបូរអង្ករនាំចេញ ខណៈពេលដែលឥណ្ឌូណេស៊ីត្រូវការនាំចូលឬទិញអង្ករ ដូច្នេះទំនាក់ទំនងពាណិជ្ជកម្មប្រាកដជាកើនមិនខាន ។ លោកបញ្ជាក់ថា ប្រទេសឥណ្ឌូណេស៊ីត្រូវការស្បៀងប្រមាណ៧០លានតោនក្នុងមួយឆ្នាំ ។
លោកឯកអគ្គរដ្ឋទូតអះអាងថា ដោយពិនិត្យឃើញថា កម្ពុជាមានសក្តានុពលច្រើនសម្រាប់វិនិយោគទុន ដូច្នេះលោកនឹងអូសទាញអ្នកវិនិយោគឱ្យមកបណ្តាក់ទុននៅកម្ពុជាឱ្យបានកាន់តែច្រើនឡើង សំខាន់ការវិនិយោគលើវិស័យកសិកម្ម ៕
ចែករំលែកព័តមាននេះ