ប្រធានាធិបតីអាមេរិក លោកបារ៉ាក់ អូបាម៉ា បានធ្វើដំណើរតាមរថយន្តបឺសពាសដែកកាត់តាមរដ្ឋគន្លឹះ៣ ដើម្បីស្តារប្រជាប្រិយភាពរបស់លោក ព្រោះតែបណ្តាអ្នកបោះឆ្នោតមានការព្រួយបារម្ភចំពោះសភាពការណ៍សេដ្ឋកិច្ច ខណៈសល់ពេល១៥ខែទៀតដល់ការបោះឆ្នោតប្រធានាធិបតី។
ប្រធានាធិបតីអាមេរិក លោកបារ៉ាក់ អូបាម៉ា បានធ្វើដំណើរតាមរថយន្តបឺសពាសដែកកាត់តាមរដ្ឋគន្លឹះ៣ ដើម្បីស្តារប្រជាប្រិយភាពរបស់លោក ព្រោះតែបណ្តាអ្នកបោះឆ្នោតមានការព្រួយបារម្ភចំពោះសភាពការណ៍សេដ្ឋកិច្ច ខណៈសល់ពេល១៥ខែទៀតដល់ការបោះឆ្នោតប្រធានាធិបតី។
តាមរថយន្តបឺសពាសដែកដ៏ថ្មីសន្លាងមានតម្លៃ១,១លានដុល្លារ លោកអូបាម៉ា ចាប់ផ្តើមកាលពីថ្ងៃទី១៥ សីហា នូវដំណើរទស្សនកិច្ចរបស់លោករយៈពេល៥ថ្ងៃ កាត់តាមរដ្ឋមីនីសូតា អៃយូវ៉ា និងរដ្ឋអ៊ីលីណយ។ ក្នុងការបោះឆ្នោតប្រធានាធិបតីអាមេរិកកាលពីឆ្នាំ២០០៨ លោកអូបាម៉ា បានឈ្នះឆ្នោតក្នុងរដ្ឋទាំង៣នេះ ហើយលោកត្រូវខិតខំកុំឱ្យបាត់សំឡេងក្នុងរដ្ឋទាំង៣នេះ ប្រសិនបើលោកចង់ជាប់ឆ្នោតក្នុងការបោះឆ្នោតខែវិច្ឆិកា ឆ្នាំ២០១២ទៀត។
សេតវិមានពន្យល់ថា ដោយសារការខ្វែងគំនិតគ្នាជាមួយពួកសាធារណរដ្ឋលើបញ្ហាបំណុល ព្រមទាំងដោយសារសេដ្ឋកិច្ចធ្លាក់ចុះ ហើយអត្រាអ្នកឥតការងារធ្វើមានខ្ពស់ដល់៩,១% និងបញ្ហាអំពីសមត្ថភាពនៃការដឹកនាំរបស់លោក ទើបលោកបារ៉ាក់ អូបាម៉ា ចង់ធ្វើដំណើរទៅជួបផ្ទាល់ជាមួយបណ្តាអ្នកបោះឆ្នោត។
ប្រជាប្រិយភាពរបស់ប្រធានាធិបតីអាមេរិក លោកអូបាម៉ា បានធ្លាក់ចុះយ៉ាងខ្លាំងជាលើកដំបូងមកនៅក្រោម៤០% ។ នេះបើតាមការស្ទាបស្ទង់មតិរបស់ GAL’LUP ចេញផ្សាយកាលពីថ្ងៃទី១៤ សីហា ។ យោងតាមការស្ទាបស្ទង់មតិនេះធ្វើលើមនុស្ស១.៥០០នាក់ តាមរយៈទូរស័ព្ទរវាងថ្ងៃទី១១ និងទី១៣ សីហា ពួកអ្នកត្រូវសាកសួរ៣៩% នៅគាំទ្រសកម្មភាពរបស់ប្រធានាធិបតីទល់នឹងអ្នកមិនសប្បាយចិត្តដែលមានដល់ទៅ៥៤%។
តួលេខនេះ គឺជាលទ្ធផលយ៉ាងអាក្រក់បំផុតចាប់តាំងពីលោកអូបាម៉ា ឡើងកាន់អំណាចមក។ ប្រជាប្រិយភាពរបស់លោកអូបាម៉ា ដែលជាបេក្ខជនសម្រាប់អាណត្តិទី២ មួយទៀតក្នុងឆ្នាំ២០១២ ធ្លាប់មានដល់៥៣% ក្នុងបណ្តាសប្តាហ៍ក្រោយការសម្លាប់មេដឹកនាំអាល់កៃដា អូសាម៉ា ប៊ីនឡាដេន ។ ក៏ប៉ុន្តែតួលេខនេះបានធ្លាក់ចុះពេលចេញផ្សាយតួលេខសេដ្ឋកិច្ចធ្លាក់ចុះមក ៕
ចែករំលែកព័តមាននេះ