ខេត្តស្ទឹងត្រែង ៖ នៅពេលដែលទឹកទន្លេមេគង្គ ទន្លេសេកុង ទន្លេសេសាន និងទន្លេស្រែពក កំពុងស្រកទៅវិញជាបណ្តើរៗ អាជ្ញាធរក៏បានអំពាវនាវឱ្យប្រជាពលរដ្ឋក្នុងក្រុងក៏ដូចជាបង ប្អូនប្រជាពលរដ្ឋនៅតាមដងទន្លេដែលរងគ្រោះដោយសារទឹកជំនន់ នេះ ត្រូវធ្វើការសំអាតអនាម័យនៅក្នុងតំបន់ និងជុំវិញលំនៅឋានដែលមាន
ខេត្តស្ទឹងត្រែង ៖ នៅពេលដែលទឹកទន្លេមេគង្គ ទន្លេសេកុង ទន្លេសេសាន និងទន្លេស្រែពក កំពុងស្រកទៅវិញជាបណ្តើរៗ អាជ្ញាធរក៏បានអំពាវនាវឱ្យប្រជាពលរដ្ឋក្នុងក្រុងក៏ដូចជាបងប្អូនប្រជាពលរដ្ឋនៅតាមដងទន្លេដែលរងគ្រោះដោយសារទឹកជំនន់នេះ ត្រូវធ្វើការសំអាតអនាម័យនៅក្នុងតំបន់ និងជុំវិញលំនៅឋានដែលមានការស្អុយរលួយពីស្មៅ និងរបស់របរផ្សេងៗទៀតដើម្បីជាការថែរក្សាសុខភាព។
ជាមួយគ្នានេះ ប្រជាពលរដ្ឋមួយចំនួនក៏បានទទួលអំណោយពីគណៈកម្មាធិការគ្រប់គ្រងគ្រោះមហន្តរាយនិងកាកបាទក្រហមកម្ពុជា ក្នុងនោះមានក្រុងស្ទឹងត្រែង ស្រុកសៀមបូក ស្រុកថាឡាបរិវ៉ាត់ និងស្រុកសេសាន។ នៅស្រុកថាឡាបរិវ៉ាត់ មានឃុំអូរស្វាយ និងឃុំព្រះរំកិលប្រជាពលរដ្ឋរងគ្រោះចំនួន៥៤៦គ្រួសារ ក្នុងនោះមានអំណោយរបស់សាខាកាកបាទក្រហមខេត្តចំនួន៤៦គ្រួសារ និងអំណោយរបស់កាកបាទក្រហមកម្ពុជា ចំនួន៥០០គ្រួសារ ដោយក្នុងមួយគ្រួសារៗទទួលបានអង្ករចំនួន៣០គីឡូក្រាម មី១កេស ត្រីខ១០កំប៉ុង ទឹកត្រី១យួរ ទឹកស៊ីអ៊ីវ១យួរ ខ្លាញ់២លីត្រ មុង១ ក្រមា១ ភួយ១ និងសារុង១។ ចំណែកស្រុកសៀមបូក ស្រុកសេសាន និងក្រុងស្ទឹងត្រែង អាជ្ញាធរនឹងធ្វើការចែកជូនជាបន្តបន្ទាប់ទៀត ។
លោកឡូយ សុផាត អភិបាលខេត្ត និងជាប្រធានកិត្តិយសសាខាកាកបាទក្រហមខេត្ត បានពាំនាំនូវប្រសាសន៍ផ្តាំផ្ញើរបស់សម្តេចតេជោ និងលោកជំទាវកិត្តិព្រឹទ្ធបណ្ឌិត ដល់ប្រជាពលរដ្ឋទាំងអស់ឲ្យខិតខំប្រឹងប្រែងយកចិត្តទុកដាក់ដោយខ្លួនឯងផ្ទាល់ក្នុងការថែរក្សាសុខភាពដោយហូបស្អាត ផឹកស្អាត ព្រោះពេលទឹកស្រកចុះទៅនឹងមានមេរោគកើតឡើង។
ជាមួយនេះលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានជួយឧបត្ថម្ភថវិកាចំនួន២០.០០០ដុល្លារ ជូនសាខាកាកបាទក្រហមខេត្តស្ទឹងត្រែងបន្ថែមទៀត សម្រាប់ទិញស្បៀងអាហារជូនប្រជាពលរដ្ឋរងគ្រោះដោយសារទឹកជំនន់ទន្លេមេគង្គ។ ចំណែកលោកឡូយ សុផាត បានជួយឧបត្ថម្ភថវិកាចំនួន១០.០០០ដុល្លារ ដើម្បីជួយសង្គ្រោះប្រជាពលរដ្ឋដែលរងគ្រោះពីផលប៉ះពាល់ដោយសារទឹកជំនន់នេះផងដែរ៕
ចែករំលែកព័តមាននេះ