កម្លាំងការពារព្រំដែនរឹបអូសបានបារី២៦ប៊ិកក្នុងទឹកដីស្រុកម៉ាឡៃ ត្រៀមផ្លោះឆ្លងអូរព្រំដែនចូលស្រុកសៀម
- បន្ទាយមានជ័យ
ខេត្តបន្តាយមានជ័យ ៖ បារីចំនួន២៦ប៊ិកដែលគេសង្ស័យថា មានប្រភពចេញពីស្រុកសំពៅលូន ខេត្តបាត់ដំបង ត្រូវបានកម្លាំងយោធា និងកម្លាំងការពារព្រំដែន រឹបអូសបាននៅក្បែរអូរព្រំដែន កាលពីវេលាម៉ោង៥ និង៤០នាទីល្ងាចថ្ងែទី១៥ វិច្ឆិកា ស្ថិតក្នុងភូមិល្វា ឃុំបឹងបេង ស្រុកម៉ាឡៃ ខេត្តបន្តាយមានជ័យ តែរបូតក្រុមដឹកជញ្ជូនបារី ។

យោងតាមប្រភពព័ត៌មានពីមន្ត្រីព្រំដែនបានឲ្យដឹងថា បារីទាំងនោះត្រូរបានពួកឈ្មួញទុច្ចរិតដឹកជញ្ជូនតាមរថយន្តយ៉ាងសម្ងាត់យកទៅទម្លាក់ទុកនៅក្បែរអូរព្រំដែន ដើម្បីត្រៀមនាំឆ្លងដែនចេញទៅប្រទេសថៃនៅពេលយប់ តែត្រូវកម្លាំងការពារព្រំដែនប្រទះឃើញក៏រឹបអូសយក តែចាប់មិនបានក្រុមជនទុច្ចរិតណាម្នាក់ឡើយ ។
ស្រុកម៉ាឡៃ ខេត្តបន្ទាយមានជ័យ ជាស្រុកមួយជាប់ព្រំដែននៃប្រទេសថៃ ដែលមានអំណោយផល និងមានភាពធូររលុងបំផុត សម្រាប់ពួកជនទុច្ចរិត នាំទំនិញ និងនាំមនុស្សឆ្លងដែនដោយខុសច្បាប់ចេញចូលប្រទេសថៃ ។ នេះបើតាមការកត់សម្គាល់កន្លងមក ដែលសកម្មភាពរត់ពន្ធបទល្មើសនេះ នៅតែកើតមានឡើងស្ទើររាល់ថ្ងៃរហូតមកទល់នឹងពេលនេះ ។

បើតាមប្រភពពីក្រុមអ្នកតាមដានសកម្មភាពពួកឈ្មួញរត់ពន្ធទំនិញ និងរត់ពន្ធមនុស្សឆ្លងដែននេះបានឲ្យដឹងថា ទំនិញបារីភាគច្រើនត្រូវគេសង្ស័យថា ពួកឈ្មួញនាំចេញពីឃ្លាំងស្ដុកនៅក្នុងស្រុកសំពៅលូនទៅកាន់ស្រុកម៉ាឡៃ ដែលមានព្រំប្រទល់ជាប់គ្នា រវាងស្រុកទាំងពីរនេះ ។
ប្រភពដដែលបានបញ្ជាក់ថា បច្ចុប្បន្ន មានឈ្មួញសកម្មដែលតែងនាំទំនិញឆ្លងដែនចេញចូលប្រទេសថៃខុសច្បាប់សម្ងំនៅក្នុងស្រុកសំពៅលូន មានប្រុស មានស្រី ប្រហែល៣-៤នាក់ និងមានសមាសសភាពជាមន្ត្រីផង និងស៊ីវិលផង ។ ក្រុមនេះ មានឃ្លាំងស្ដុកទំនិញនេះ នៅស្រុកសំពៅលូន ហើយបាននាំចេញតាមរថយន្ត ដោយលួចលាក់នៅពេលយប់ ឬពេលថ្ងៃទៅកាន់តាមបណ្ដាស្រុកនានា ដែលជាប់ព្រំដែនខ្មែរ-ថៃនៅពេលមានឱកាសល្អ។

ជាក់ស្ដែង នៅបារីចំនួន២៦ប៊ិក ដែលកម្លាំងទាហាន និងកម្លាំងនគរបាលការពារព្រំដែន នៅស្រុកម៉ាឡៃរឹបអូសបានខាងលើនេះ ត្រូវគេសង្ស័យថា មានប្រភពនាំចេញពីស្រុកសំពៅលូន ។ ហើយចំណុចដែលបង្ក្រាបបាននោះ មានទីតាំងស្ថិត នៅជាប់ព្រំប្រទល់ ស្រុកសំពៅលូនតែម្ដង ។ ពួកជនទុច្ចរិត បានដឹកជញ្ជូនយកទៅស្ដូកទុកដោយលួចលាក់នៅក្បែរអូរព្រំដែន ដើម្បីរងចាំដល់ពេលយប់មានឪកាស ពួកគេបញ្ជូនឆ្លងអូរព្រំដែន ចេញទៅប្រទេសថៃ ប៉ុន្តែចៃដន្យត្រូវបានកម្លាំងការពារព្រំដែន បង្ក្រាបបានទាន់ពេល ។

មេបញ្ជាការរង និងជានាយសេនាធិការ យោធភូមិភាគទី៥ លោក សេង ធារិន បានបង្ហោះសារស្ដីពីកិច្ចប្រតិបត្តិការបង្ក្រាបទំនិញបារីចំនួន២៦ប៊ិកដែលពួកឈ្មួញបំរុងនាំឆ្លងដែនចេញទៅប្រទេសថៃ ដោយខុសច្បាប់ខាងលើនេះដូច្នេះថា «កម្លាំងវរសេនាតូចលេខ៥១១ចំណុះកងពលលេខ៥១ សហការជាមួយកម្លាំងវរសេនាតូចលេខ៨១៥ ចំណុះស្នងការនគរបាលខេត្តបន្ទាយមានជ័យ ជាអ្នកបង្ក្រាបបានបារី ដែលបំរុងឆ្លងដែនចំនួន២៦ប៊ិក នៅស្រុកម៉ាឡៃ ខេត្តបន្តាយមានជ័យ» ។
ប៉ុន្តែយ៉ាងណា សមត្ថកិច្ចនិងកម្លាំងការពារព្រំដែន គួរតែធ្វើការស្រាវជ្រាវតាមចាប់ខ្លួន ពួកឈ្មួញទុច្ចរិត ដែលតែងនាំទំនិញ ឬមនុស្សឆ្លងដែនចេញចូលប្រទេសថៃយ៉ាងសកម្មនេះឲ្យបានខ្លះទៅ ចៀសវាងកុំឲ្យមហាជនរិះគន់ថា សមត្ថកិច្ច «ខ្សោយ» ៕


ចែករំលែកព័តមាននេះ