ADផ្ទាំងផ្សព្វផ្សាយពាណិជ្ជកម្ម

Picture

​អាមេរិក​ចាប់​ផ្ដើម​បើក​ដំណើរ​ការ​ជើង​អាកាស​របស់​ខ្លួន​ឡើង​វិញ​​បន្ទាប់​ពី​ជាប់​គាំង​អស់​ជា​ច្រើន​ម៉ោង

1 ថ្ងៃ មុន

ទី​ក្រុង​វ៉ាស៊ីនតោន៖ គណៈ​កម្ម​ការ​​អាកាស​ចរណ៍​ជាតិ​​​អាមេរិក​ (FAA) បាន​អនុញ្ញាត​ឱ្យ​មាន​ការ​ធ្វើ​ដំណើរ​តាម​អាកាស​ឡើង​វិញ​ហើយ​ បន្ទាប់​ពី​មាន​បញ្ហា​រអាក់​រអួល​បណ្ដាល​មក​ពី​ការ​ជាប់​គាំង​ប្រព័ន្ធ​ទំនាក់​ទំនង​នៅ​តាម​មជ្ឈ​មណ្ឌល​ត្រួត​ពិនិត្យ​ការ​ហោះ​ហើរ​ប្រចាំ​នៅ​តាម​អាកាស​យាន​ដ្ឋាន​នានា​​ទូទាំង​ប្រទេស​។ បញ្ហា​រអាក់​រអួល​នេះ​​នាំ​ឱ្យ​​បិទ​ដំណើរ​ការ​ជើង​ហោះ​ហើរ​រយៈ​ពេល​ដ៏​យូរ​មិន​ធ្លាប់​មាន​ចាប់​តាំង​ពី​ក្រោយ​ព្រឹត្តិ​ការណ៍វាយ​ប្រហារ​បែប​ភេរវ​កម្ម​កាល​ពី​​ថ្ងៃ​១១ ខែ​កញ្ញា​ ឆ្នាំ​២០០១​។

រដ្ឋ​មន្ត្រី​ក្រសួង​ដឹក​ជញ្ជូន​អាមេរិក​ លោក​សង់​ ដាហ្វ៊ី (Sean Duffy) ថ្លែង​ថា​ដែន​អាកាស​​អាមេរិក​ចាប់​ផ្ដើម​បើក​ដំណើរ​ការ​ឡើង​វិញ​កាល​ពី​វេលា​ម៉ោង​៨:១៥​យប់​។ ប៉ុន្តែ​លោក​យល់​ថា​ការ​ហោះ​ហើរ​​នឹង​ចាប់​ផ្ដើម​ឡើង​វិញ​ដោយ​យឺត​ៗ​។ ក្រុម​ហ៊ុន​អាកាស​ចរណ៍​ប្រហែល​ជា​ត្រូវ​ការ​ពេល​យូរ​ដើម្បី​ឱ្យ​ប្រតិ​បត្តិ​ការ​របស់​ខ្លួន​វិល​មក​រក​ភាព​ប្រក្រតី​ឡើង​វិញ​។ លោក​ថ្លែង​ប្រាប់​អ្នក​សារ​ព័ត៌​មាន​នៅ​សេត​វិមានថា​អ្វី​ៗ​នឹង​ចាប់​ផ្ដើម​ឡើង​វិញ​ដោយ​យឺត​ៗ​។​ ​គិត​ត្រឹម​ម៉ោង​១១:៣០​យប់​ ជើង​ហោះ​ហើរ​ជិត​មួយ​ម៉ឺន​ខ្សែ​ត្រូវ​លុប​ចោល​។ ក្នុង​នោះ គ្រាន់​តែ​ក្រុម​ហ៊ុន​អាកាស​ចរណ៍​ Delta Air Lines និង​ American Airlines ត្រូវ​លុប​ចោល​ជើង​ហោះ​​ហើរ​ជាង​២២០០​ខ្សែ​ម្នាក់​ៗ ខណៈ​ដែល​ក្រុម​ហ៊ុន​ United Airlines លុប​ចោល​១៨០០​ខ្សែ​។ នេះ​បើ​យោង​តាម​​ទិន្ន​ន័យ​របស់​ Flightradar24 ដែល​ជា​ស្ថាប័ន​តាម​ដាន​ការ​ហោះ​​ហើរ​។

យន្ត​ហោះ​ខ្លះ​នៅ​តាម​ព្រលាន​យន្ត​ហោះ​ធំ​ៗ​ត្រូវ​រង់​ចាំ​​លើស​​ពី​​​៥​ម៉ោង​ទម្រាំ​បាន​ចេញ​ដំណើរ​។ ​ការ​បិទ​​​ជើង​អាកាស​​រយៈ​ពេល​៤​ម៉ោង​នៅ​ទូទាំង​ប្រទេស​អាមេរិក​អាច​​ប៉ះ​ពាល់​កាល​បរិច្ឆេទ​ហោះ​ហើរ​របស់​ក្រុម​ហ៊ុន​អាកាស​ចរណ៍អស់​ជា​ច្រើន​ថ្ងៃ​ទៅ​មុខ​ទៀត​​។ លោក​ដាហ្វ៊ី​ថ្លែង​ថា​អ្នក​ដំណើរ​រាប់​ម៉ឺន​នាក់​​ត្រូវ​ជាប់​គាំង​​នៅ​មួយ​កន្លែង​ទូទាំង​ប្រទេស​អាមេរិក​។ លោក​ និង​រដ្ឋ​មន្ត្រី​ក្រសួង​សន្តិ​សុខ​មាតុ​ភូមិ​​ទើប​តែ​​​ជួប​លោក​ត្រាំ​នៅ​សេត​វិមាន​​ដើម្បី​ពិ​គ្រោះ​គ្នា​អំពី​បញ្ហា​នេះ​។

លោក​ដាហ្វ៊ី​​ដាក់​ការ​ស្ដី​បន្ទោសទៅ​​លើ​សភា​ខង់​ហ្ក្រែស​ដែល​មិន​ព្រម​ទម្លាក់​ថវិកា​ដើម្បី​​ដាក់​ជំនួស​​ប្រព័ន្ធ​​ទូរ​គមនាគមន៍​​​ថ្មី​នៅ​តាម​​ព្រលាន​យន្ត​ហោះ​។ លោក​អះ​អាង​ថា​ការ​ធ្វើ​ទំនើប​កម្ម​ប្រព័ន្ធ​នេះ​គួរ​ណាស់​បញ្ចៀស​បាន​នូវ​បញ្ហា​ជាប់​គាំង​។ ដូច្នេះ លោក​ស្នើ​សុំ​ឱ្យ​ខង់​ហ្ក្រែស​អនុ​ម័ត​ថវិកា​៥០​ពាន់​លាន​ដុល្លារ​ដើម្បី​ធ្វើ​ទំនើប​កម្ម​។ កាល​ពី​មុន​នេះ​បន្តិច សេត​វិមាន និង​ក្រសួង​ដឹក​ជញ្ជូន​បាន​ជំរុញ​ឱ្យ​ខង់​ហ្ក្រែស​អនុ​​ម័ត​ថវិកា​ជាង​៣០​ពាន់​លាន​ដុល្លារ​ដើម្បី​អភិ​វឌ្ឍ​​ព្រលាន​យន្ត​ហោះ និង​ប្រព័ន្ធ​គ្រប់​គ្រង​ការ​ហោះ​ហើរ​ដែល​ចាស់​ហួស​សម័យ​៕ ប្រភព៖ Reuters​