ទីក្រុងវ៉ាស៊ីនតោន៖ រឿងអាស្រូវស្នេហារវាងអតីតនាយកប្រតិបត្តិក្រុមហ៊ុន Nvidia លោកជេនសិន ហួង ដែលទើបតែលាលែងពីតំណែងកាលពីពេលថ្មីៗនេះ ចាប់ផ្ដើមរាលដាលដល់រដ្ឋាភិបាលអាមេរិកជាបណ្ដើរៗហើយ។ ថ្មីៗនេះ រដ្ឋមន្ត្រីក្រសួងរតនាគារអាមេរិក (ស្មើនឹងក្រសួងហិរញ្ញវត្ថុនៅប្រទេសដទៃទៀត) លោកស្កុតបឺសឹន (Scott Bessent) ដាក់ការស្ដីបន្ទោសទៅក្រសួងពាណិជ្ជកម្មដែលពន្យារពេលរឹតត្បិតការនាំចេញបន្ទះឈីប Nvidia ទៅក្រុមហ៊ុនទាំងឡាយណាដែលជាប់សង្ស័យថាជាភ្នាក់ងារចារកម្មរបស់រដ្ឋាភិបាលចិន។ លោកថ្លែងថាលោកមានការខឹងសម្បារយ៉ាងខ្លាំងនឹងទង្វើរបស់ក្រសួងនេះ។

លោកបឺសឹនថ្លែងប្រាប់ទូរទស្សន៍ស៊ីអឹនប៊ីស៊ី (CNBC) ថាក្រសួងរបស់លោក សហការជាមួយក្រសួងការបរទេស, ក្រសួងការពារជាតិ និងក្រសួងពាណិជ្ជកម្មគាំទ្រការដាក់បញ្ចូលក្រុមហ៊ុននៅសិង្ហបុរីឈ្មោះ Megaspeed ទៅក្នុងបញ្ជីដែលស្ថិតក្រោមការត្រួតពិនិត្យជាច្រើនខែមកហើយ ហើយក្រសួងពាណិជ្ជកម្មជាអ្នករ៉ាប់រងធ្វើកិច្ចការនេះ (ប៉ុន្តែជាក់ស្ដែងក្រសួងមិនព្រមធ្វើទេ)។ បទអត្ថាធិប្បាយរបស់លោកបឺសឹនហាក់ដូចជារិះគន់ឥតសំចៃមាត់ខុសពីធម្មតាទៅលើសហការីនៅក្នុងគណៈរដ្ឋមន្ត្រីជាមួយគ្នាគឺលោកហូវើត លូតនីក (Howard Lunick) ដែលជារដ្ឋមន្ត្រីក្រសួងពាណិជ្ជកម្ម។ ក្រសួងនេះមានតួនាទីត្រួតពិនិត្យមើលការនាំចេញនូវទំនិញប្រភេទបច្ចេកវិទ្យាជាន់ខ្ពស់លាក់ការណ៍សម្ងាត់។ ការថ្លែងរបស់លោកស្កុតបឺសឹនកើតមានឡើងចំពេលដែលទំនាក់ទំនងរវាងក្រុមហ៊ុន Nvidia ជាមួយ Megaspeed ក្លាយជាប្រធានបទក្ដៅដែលនាំទៅដល់ការលាលែងពីតំណែងរបស់លោកជេនសិនហួង។

លោកហួងទទួលស្គាល់ថាលោកពិតជាមានទំនាក់ទំនងស្នេហាក្រៅចំណងអាពាហ៍ពិពាហ៍មែន។ លោកមិនបានបញ្ជាក់ថាមានទំនាក់ទំនងជាមួយនារីកំណាន់ណាទេ។ ប៉ុន្តែគេសង្ស័យថានៅក្នុងចំណោមនារីមួយចំនួនដែលលោកហួងទាក់ទងនោះក៏មានអ្នកស្រីអាលីសហួង (Alice Huang) ម្នាក់ផងដែរ។ ភ្នាក់ងារសម្ងាត់អាមេរិកសង្ស័យថាអ្នកស្រីជាភ្នាក់ងារបង្កប់ដែលរដ្ឋាភិបាលចិនបញ្ជូនទៅបង្កើតស្នេហាក្លែងក្លាយជាមួយលោកជេនសិនហួង។ គោលបំណងធំគឺដើម្បីលួចផ្ទេរបន្ទះឈីបរបស់ Nvidia ទៅផ្គត់ផ្គង់ក្រុមហ៊ុនតូចធំនានាទូទាំងប្រទេសចិន។ ទោះជាមានការសង្ស័យបែបនេះក្ដី ប្រទេសចិនបានប្រកាសបដិសេធរួចហើយ។ លោកហូវើត លូតនីកចាប់ផ្ដើមជាប់ការសង្ស័យកាន់តែខ្លាំងឡើងៗដោយសារលោកមានទំនាក់ទំនងជិតស្និទ្ធជាមួយលោកជេនសិនហួង ហើយលោកហួងក៏មានទំនាក់ទំនងជិតស្និទ្ធជាមួយលោកត្រាំទៅទៀត។ លោកហួងបានធ្វើដំណើរទៅសេតវិមានកាលពីថ្ងៃទី២៩ ខែតុលាកន្លងទៅនេះដើម្បីពិភាក្សាអំពីការការពារសុវត្ថិភាពនៅក្នុងវិស័យអេអាយ។

សារព័ត៌មានញូយ៉កថាមស៍ចុះផ្សាយថាទោះបីមានការស្នើសុំឱ្យរឹតត្បិតការនាំចេញបន្ទះឈីបបំពាក់បច្ចេកវិទ្យាទំនើបរបស់ Nvidia ទៅប្រទេសចិនយ៉ាងណាក្ដី ប៉ុន្តែលោកលូតនីកជំទាស់នឹងសំណើនេះ។ ក្រុមហ៊ុននានារបស់ចិនអាចមានឱកាសប្រើប្រាស់បន្ទះឈីបរបស់ Nvidia ក៏ដោយសារក្រុមហ៊ុនខ្លះដូចជា Megaspeed ជាដើម។ មានសេចក្ដីរាយការណ៍ថា Megaspeed បានទិញបន្ទះឈីបរបស់ Nvidia ជាង៤ពាន់លានដុល្លារ។ យោងតាមព័ត៌មានបច្ចុប្បន្នភាពចុងក្រោយនេះ ទាំងលោកលូតនីក និងលោកជេនសិនហួងយល់ព្រមឡើងផ្ដល់សក្ខីកម្មនៅចំពោះមុខសភាខង់ហ្ក្រែសរបស់អាមេរិកនៅខែធ្នូខាងមុខនេះ។

ទាំងសមាជិកព្រឹទ្ធសភារបស់គណបក្សប្រជាធិបតេយ្យ និងសាធារណរដ្ឋកំពុងចោទជាសំណួរថាតើលោកលូតនីកហេតុដូចម្ដេចបានជាខិតខំជំរុញការនាំចេញបន្ទះឈីបទៅក្រៅប្រទេសខ្លាំងម៉្លេះទោះបីរដ្ឋាភិបាលអាមេរិកក្រើនរំលឹកឱ្យប្រុងប្រយ័ត្នអំពីការបែកធ្លាយប្រព័ន្ធសន្តិសុខសម្ងាត់យ៉ាងណាក្ដី។ តាមគម្រោង លោកលូតនីកនឹងចូលបំភ្លឺនៅចំពោះមុខគណៈកម្មការព្រឹទ្ធសភានៅថ្ងៃទី១០ ខែធ្នូ។ សមាជិកព្រឹទ្ធសភាមកពីគណបក្សសាធារណរដ្ឋ លោកធីមស្កុត (Tim Scott) បានចេញលិខិតមួយច្បាប់ស្នើសុំឱ្យលោកលូតនីក និងលោកជេនសិនហួងបង្ហាញខ្លួននៅក្នុងសភាខង់ហ្ក្រែសនាដើមខែធ្នូ៕ ប្រភព៖ AP និងប្រភពដទៃទៀត

ចែករំលែកព័តមាននេះ