ទីក្រុងម៉ូស្គូ៖ រដ្ឋាភិបាលរុស្ស៊ីដាក់ផែនការកាត់បន្ថយចំនួនខ្លាឃ្មុំសម្បុរត្នោតជាអតិបរមារហូតដល់៣០%ដើម្បីអាចគ្រប់គ្រងពួកវាបាន។ ចំណាត់ការនេះធ្វើឡើងបន្ទាប់ពីខ្លាឃ្មុំសម្លាប់មនុស្ស៣៦នាក់នៅឆ្នាំ២០២៦។ នេះបើយោងតាមការប្រកាសរបស់ក្រសួងគ្រប់គ្រងធនធានធម្មជាតិ។ ទីភ្នាក់ងារព័ត៌មានរុស្ស៊ី RIA បានដកស្រង់សេចក្ដីប្រកាសរបស់ក្រសួងខាងលើមកផ្សាយថាការកំណត់ចំនួនខ្លាឃ្មុំនេះដើម្បីគ្រប់គ្រងពួកវាឱ្យបានល្អ និងដើម្បីកាត់បន្ថយអត្រាវាយប្រហារពីសំណាក់ខ្លាឃ្មុំមកលើមនុស្ស។

ក្រសួងបានយកបញ្ហានេះទៅពិគ្រោះជាមួយក្រសួងយុត្តិធម៌រួចហើយ។ ចាប់តាំងពីដើមឆ្នាំ២០២៦រហូតមកដល់បច្ចុប្បន្ន មានសេចក្ដីរាយការណ៍ថាខ្លាឃ្មុំបានដើរទៅក្បែរមនុស្ស១,២ម៉ឺនករណី។ ក្នុងនោះ ពួកវាវាយប្រហារមនុស្ស៨៧ករណី និងបណ្ដាលឱ្យស្លាប់៣៦នាក់។ ក្រសួងប្រកាសថាដោយសារបញ្ហានេះ ខ្លួនសម្រេចចិត្តកាត់បន្ថយចំនួនខ្លាឃ្មុំសម្បុរត្នោតរហូតដល់៣០%នៃចំនួនសរុបរបស់ពួកវានៅក្នុងតំបន់នីមួយៗ។ ទីភ្នាក់ងារព័ត៌មាន RIA មិនបានបញ្ជាក់ឱ្យបានច្បាស់ថាតើយុទ្ធនាការកាត់បន្ថយចំនួនខ្លាឃ្មុំសម្បុរត្នោតនោះនឹងចាប់ផ្ដើមឡើងនៅពេលណា និងថាតើវិធានការនេះនឹងអូសបន្លាយពេលរហូតដល់ពេលណាទេ។

អត្រាមរណភាពដោយសារការវាយប្រហាររបស់ខ្លាឃ្មុំចេះតែកើនឡើងបន្ថែមពីលើរបាយការណ៍ដែលចុះផ្សាយដោយ RIA កាលពីមុននេះបន្ទាប់ពីបុគ្គលិកសន្តិសុខម្នាក់ប្រចាំការនៅជំរំលំហែកាយមួយកន្លែងនៃឧបទ្វីបកាំឆាត់កា (Kamchatka) ប្រទេសរុស្ស៊ីភាគខាងកើត ត្រូវខ្លាឃ្មុំខាំសម្លាប់។ ក្រសួងគ្រប់គ្រងធនធានធម្មជាតិអះអាងថាខ្លាឃ្មុំសរុបនៅទូទាំងប្រទេសរុស្ស៊ីមានចំនួន៣,០៨សែនក្បាល។ យុទ្ធនាការកាត់បន្ថយចំនួនរបស់ពួកវាអាចនឹងល្អៀងគ្នាពីតំបន់មួយទៅតំបន់មួយទៀត។ ឧទាហរណ៍ នៅតំបន់កាំឆាត់កា ក្រសួងត្រៀមកាត់បន្ថយ១៤% ខណៈដែលនៅក្រាស់ណូយ៉ាស់ (Krasnoyarsk) នៃតំបន់ស៊ីបេរី ក្រសួងត្រៀមកាត់បន្ថយ១៩%។

ក្រសួងបានផ្ទេរសាច់ប្រាក់សរុបជាង៩៧ម៉ឺនដុល្លារសម្រាប់យុទ្ធនាការកាត់បន្ថយចំនួនខ្លាឃ្មុំសម្បុរត្នោតដែលឧស្សាហ៍ដើរទៅកៀកនឹងផ្ទះរបស់ប្រជាជន និងដើរស៊ីចំណីអាហារនៅតាមទីវាល។ យោងតាមទិន្នន័យរបស់រដ្ឋាភិបាលរុស្ស៊ី ខ្លាឃ្មុំសម្បុរត្នោតកើនចំនួនទ្វេមួយជាពីរនៅក្នុងរយៈពេលបីទសវត្សរ៍ចុងក្រោយ។ កត្តានេះមួយផ្នែកដោយសាររដូវរងាមានរយៈពេលខ្លីជាងមុន និងអាកាសធាតុមិនសូវត្រជាក់ខ្លាំង៕ ប្រភព៖ Reuters

ចែករំលែកព័តមាននេះ