ទីក្រុងវ៉ាស៊ីនតោន៖ លោកដូណាល់ត្រាំនឹងលើកយកបញ្ហាកាត់បន្ថយអាវុធនុយក្លេអ៊ែរទៅនិយាយគ្នាជាមួយប្រធានាធិបតីចិន លោកស៊ីជីនពីង និងលោកពូទីន។ នេះបើយោងតាមការអះអាងរបស់មន្ត្រីសេតវិមាន។ លោកស្រីអូលីវៀ វេល (Olivia Wales) ជាអ្នកនាំពាក្យសេតវិមានថ្លែងថាលោកត្រាំនឹងពិភាក្សាអំពីការកាត់បន្ថយអាវុធនុយក្លេអ៊ែរនៅលើសាកលលោក។ ការរីកសាយភាយនៃអាវុធនេះត្រូវលោកចាត់ទុកថាជារឿងដ៏គ្រោះថ្នាក់បំផុត។ ការជួបគ្នារវាងថ្នាក់ដឹកនាំទាំងបីនឹងធ្វើឡើងនៅថ្ងៃព្រហស្បតិ៍សប្ដាហ៍ក្រោយនៅប្រទេសចិន។ មែនទែនទៅ ការជួបគ្នានិយាយអំពីការបញ្ហានុយក្លេអ៊ែរធ្វើឱ្យប្រទេសចិនមិនសូវសប្បាយចិត្តប៉ុន្មានទេព្រោះចិនត្រៀមរៀបចំកិច្ចប្រជុំកំពូលអេប៉ិចដែលផ្ដោតសំខាន់លើវិស័យពាណិជ្ជកម្ម។ ហេតុដូច្នេះ ចិនរិះគន់ការព្យាយាមលើកយកបញ្ហានុយក្លេអ៊ែរមកនិយាយ។

លោកពូទីន លោកស៊ីជីនពីង និងលោកដូណាល់ត្រាំនឹងជួបគ្នាត្រីភាគីនៅពេលអស់លោកអញ្ជើញទៅចូលរួមកិច្ចប្រជុំអេប៉ិចនៅទីក្រុងស៊ឹនចិន។ លោកត្រាំត្រៀមចាកចេញពីវ៉ាស៊ីនតោននៅថ្ងៃចន្ទសប្ដាហ៍ក្រោយដើម្បីបំពេញទស្សនកិច្ចរយៈពេល៤ថ្ងៃនៅទ្វីបអាស៊ី។ ក្នុងនោះ លោកក៏ត្រៀមធ្វើដំណើរទៅប្រទេសហ្វ៊ីលីពីនផងដែរ។ មន្ត្រីជាន់ខ្ពស់របស់អាមេរិកម្នាក់ប្រាប់ថាយើងមិនរំពឹងថានឹងមានកិច្ចព្រមព្រៀងអ្វីនោះទេពាក់ព័ន្ធនឹងគម្រោងពិភាក្សាអំពីបញ្ហានុយក្លេអ៊ែរ។ នេះជាប្រធានបទដ៏ពិបាកមួយសម្រាប់ប្រទេសចិនដែលត្រូវឆ្លើយតប។ ប៉ុន្តែយើងយល់ថានេះជាពេលដែលប្រទេសចិនត្រូវគិតគូរ។ នេះជាចំណុចចាប់ផ្ដើមការសន្ទនាគ្នាដែលអាចនឹងកើតមានជាបន្តទៀតនៅក្នុងផ្លូវវិជ្ជមាន។

គួរកត់សម្គាល់ថាអស់រយៈពេលជាច្រើនឆ្នាំមកហើយ ប្រទេសចិនព្យាយាមមិននិយាយផ្ទាល់ជាមួយទីក្រុងវ៉ាស៊ីនតោនទេពាក់ព័ន្ធនឹងកម្មវិធីនុយក្លេអ៊ែរ។ ចិនយល់ថាគួរតែអាមេរិក និងរុស្ស៊ីនិយាយគ្នាតែ២នាក់ទៅ ព្រោះពួកគេមានអាវុធនុយក្លេអ៊ែរស្តុកទុកនៅក្នុងឃ្លាំងច្រើនជាងគេ។ សព្វថ្ងៃនេះ រុស្ស៊ីមាននុយក្លេអ៊ែរច្រើនជាងគេបំផុតនៅលើសាកលលោក។ បន្ទាប់មកគឺអាមេរិក និងបន្ទាប់មកទៀតគឺប្រទេសចិន។ នេះបើយោងតាម «វិទ្យាស្ថានស្រាវជ្រាវអំពីសន្តិភាពជាអន្តរជាតិ» ដែលមានទីស្នាក់ការនៅទីក្រុងស្តក់ហូម ប្រទេសស៊ុយអែត។

សន្ធិសញ្ញាស្ដីពីការកាត់បន្ថយអាវុធជាយុទ្ធសាស្ត្រដែលព្រមព្រៀងគ្នារវាងរុស្ស៊ី និងអាមេរិកបានផុតសុពលភាពកាលពីដើមឆ្នាំនេះ។ គេមិនទាន់ដឹងថាច្បាស់ថាតើចិន និងរុស្ស៊ីមានចិត្តចង់ចូលរួមការសន្ទនាគ្នាជាមួយលោកត្រាំដើម្បីនិយាយអំពីការកាត់បន្ថយនុយក្លេអ៊ែរដែរឬទេ។ មន្ត្រីរដ្ឋាភិបាលអាមេរិកដដែលប្រាប់ថានៅក្នុងគម្រោងជួបគ្នានោះ លោកត្រាំក៏ត្រៀមលើកយកបញ្ហាស្ដីពីសង្គ្រាមអុីរ៉ង់ទៅពិភាក្សាគ្នាផងដែរ។ ប៉ុន្តែលោកនឹងមិននិយាយអំពីសង្គ្រាមអ៊ុយក្រែនទេ។ តាមមើលទៅ បំណងរបស់លោកត្រាំដែលចង់ជួបគ្នាជាមួយលោកគីមជុងអ៊ុននោះក៏ប្រហែលជាមិនបានសម្រេចនោះដែរ៕ ប្រភព៖ Reuters

ចែករំលែកព័តមាននេះ